ຈີນປະກາດເຕືອນໄພແລ້ງຫລາຍພາກໃນປະເທດ

ສູນອຸຕຸນິຍົມວິທະຍາແຫ່ງຊາດຈີນ (NMC) ປະກາດແຈ້ງເຕືອນໄພແລ້ງລະດັບສີເຫລືອງ ເນື່ອງຈາກຫລາຍພາກໃນປະເທດຍັງຜະເຊີນສະພາບປະລິມານນ້ຳຝົນບໍ່ພຽງພໍ.

ທາງສູນອຸຕຸນິຍົມລະບຸວ່າ: ພາກທີ່ຈະຍັງຜະເຊີນໄພແລ້ງລະດັບປານກາງໄປຈົນຮອດລະດັບຮຸນແຮງໄດ້ແກ່ ບາງພື້ນທີ່ຂອງເຈີ້ຈຽງ, ອັນຮຸຍ, ຈຽງຊູ, ຫູເປີຍ, ຫູໜານ, ຈຽງຊີ, ກຸ້ຍໂຈ, ກວາງຊີ, ອວິ໋ນໜານ, ສົງຊິ່ງ, ຊື່ຊວນ, ຝູຈ້ຽນ ແລະ ກວາງຕົງ ເຊິ່ງບາງພື້ນທີ່ຂອງຫູໜານ, ກຸ້ຍໂຈ, ສົງຊິ່ງ, ຈຽງຊີ, ຫູເປີຍ ແລະ ກວາງຊີ ໄດ້ຮັບຜົນກະທົບຈາກໄພແລ້ງຂັ້ນຮຸນແຮງແລ້ວໃນປັດຈຸບັນ.

ສຳນັກຂ່າວຊິນຮົວລາຍງານວ່າ: ເຖິງວ່າປະລິມານນ້ຳຝົນທີ່ຕົກໃນບາງສ່ວນຂອງພາກຕາເວັນຕົກສຽງໃຕ້, ພາກກາງ ແລະ ພາກຕາເວັນອອກຂອງປະເທດ ຈະຊ່ວຍບັນເທົາຄວາມແຫ້ງແລ້ງໄດ້ໃນໄລຍະ 3 ວັນຕໍ່ໜ້າ ແຕ່ພື້ນທີ່ສ່ວນຫລາຍທີ່ກ່າວມາເບື້ອງຕົ້ນຈະຍັງມີສະພາບອາກາດແຫ້ງແລ້ງຕໍ່ໄປ.

ນອກຈາກນີ້, ສູນອຸຕຸນິຍົມໄດ້ແນະນຳໃຫ້ໜ່ວຍງານທ້ອງຖິ່ນໃຊ້ແຫລ່ງນ້ຳສຳຮອງສຸກເສີນໃຫ້ເກີດປະໂຫຍດສູງສຸດ ແລະ ຮັບຮອງການຈັດຫານ້ຳປະປາ ໂດຍສະເພາະນ້ຳໃຊ້ຂອງປະຊາຊົນໃນທ້ອງຖິ່ນ ພ້ອມເຕືອນໃຫ້ເຝົ້າລະວັງເຫດໄຟໄໝ້ປ່າໃນບາງພື້ນທີ່.

ທັງນີ້, ລະບົບເຕືອນໄພສະພາບອາກາດຂອງຈີນແບ່ງເປັນ 4 ລະດັບ 4 ສີ ໂດຍສີແດງໝາຍເຖິງຄວາມຮຸນແຮງສູງສຸດ, ຮອງລົງມາຄືສີສົ້ມ, ສີເຫລືອງ ແລະ ສີຟ້າ ຕາມລຳດັບ.