ສະຖານະການໂຄວິດຈີນຍັງໜ້າເປັນຫ່ວງ ຫລັງຈາກທີ່ເມືອງໃຫຍ່ພົບຜູ້ຕິດເຊື້ອເພີ່ມຂຶ້ນລາຍວັນບໍ່ຕໍ່າກວ່າ 18 ພັນຄົນ
ສໍານັກຂ່າວຕ່າງປະເທດລາຍງານຈາກນະຄອນຫລວງປັກກິ່ງປະເທດຈີນວ່າ: ໃນວັນທີ 13 ພະຈິກ ຄະນະກໍາມາທິການສາທາລະນະສຸກແຫ່ງຊາດຈີນ (NHC) ລາຍງານສະຖິຕິຜູ້ຕິດເຊື້ອໂຄວິດ-19 ເພີ່ມຂຶ້ນຫລາຍຈາກການລາຍງານຜູ້ຕິດເຊື້ອຂອງວັນທີ 11 ພະຈິກ ມີຜູ້ຕິດເຊື້ອ 11.950 ຄົນ ແລະ ມາວັນເສົາ ທີ 12 ພະຈິກ ມີຜູ້ຕິດເຊື້ອເພີ່ມ 18.478 ຄົນ ເຊິ່ງສະຖິຕິນີ້ບໍ່ໄດ້ລວມຜູ້ຕິດເຊື້ອຈາກຕ່າງປະເທດ ໃນນີ້ນະຄອນຫລວງປັກກິ່ງ ພົບຜູ້ຕິດເຊື້ອໃໝ່ 235 ຄົນ, ເມືອງກວາງໂຈທີ່ມີປະຊາກອນປະມານ 19 ລ້ານຄົນ ພົບຜູ້ຕິດເຊື້ອໃໝ່ 3.653 ຄົນ ເຊິ່ງເປັນສະຖິຕິທີ່ສູງທີ່ສຸດຂອງເມືອງ ແລະ ເມືອງເຈີງໂຈ ພົບຜູ້ຕິດເຊື້ອໃໝ່ 2.642 ຄົນ.
ຖະແຫລງການຂອງ NHC ໄດ້ລະບຸວ່າ ສະຖານະການ ການແພ່ລະບາດຂອງໂຄວິດ-19 ໃນຈີນຕອນນີ້ “ຍັງຄົງຮຸນແຮງ ແລະ ມີຄວາມຊັບຊ້ອນ” ແນວໃດກໍຕາມ NHC ປະກາດເມື່ອວັນສຸກທີ່ຜ່ານມາວ່າໄດ້ມີການປັບມາດຕະການ “7+3” ມາເປັນ “5+3” ສໍາລັບຜູ້ທີ່ເດີນທາງມາຈາກຕ່າງປະເທດ ແລະ ຜູ້ທີ່ສໍາຜັດໃກ້ຊິດຈາກການເຝົ້າລະວັງພະຍາດໃນສະຖານທີ່ກັກຕົວຂອງລັດ 7 ມື້ ແລະ ກັກຕົວຕໍ່ຢູ່ເຮືອນ 3 ມື້ ປ່ຽນມາກັກຕົວຢູ່ສະຖານທີ່ກັກຕົວຂອງລັດ 5 ມື້ ແລະ ກັກຕົວຢູ່ເຮືອນອີກ 3 ມື້.
ພ້ອມດຽວກັນນັ້ນກໍໄດ້ປະກາດຢຸດຕິມາດຕະການເຝົ້າລະວັງ “ຜູ້ສໍາຜັດໄລຍະທີສອງ” ເຊິ່ງໝາຍເຖິງຜູ້ທີ່ບໍ່ໄດ້ສໍາຜັດໃກ້ຊິດໂດຍກົງ ທີ່ເປັນມາດຕະການຄວບຄຸມພະຍາດອັນໄດ້ສ້າງຄວາມບໍ່ພໍໃຈແກ່ປະຊາຊົນໃນໄລຍະຜ່ານມາ.
ນອກຈາກນີ້ລັດຖະບານປັກກິ່ງໄດ້ຜ່ອນຜັນມາດຕະການໃຫ້ຜູ້ໂດຍສານທີ່ເດີນທາງມາຈາກຕ່າງປະເທດ ທີ່ຕ້ອງໄດ້ສະແດງຜົນກວດໂຄວິດ-19 ເປັນລົບສອງເທື່ອພາຍໃນເວລາ 48 ຊົ່ວໂມງ ຫລຸດເຫລືອພຽງເທື່ອດຽວ ພາຍໃນໄລຍະເວລາ 48 ຊົ່ວໂມງ ແລະ ຍົກເລີກມາດຕະການລົງໂທດສາຍການບິນດ້ວຍຄໍາສັ່ງ “ລະງັບການບິນຊົ່ວຄາວ” ຖ້າມີຈໍານວນຜູ້ໂດຍສານຕິດໂຄວິດ-19 ສະສົມຮອດເກນອັນຕະລາຍ.
