ຟີຟາ ເລືອກຜູ້ຕັດສິນຍິງ 6 ຄົນ ເຮັດໜ້າທີ່ບານໂລກ 2022
ບານໂລກ 2022 ທີ່ກາຕ້າ ຈະເປັນຄັ້ງທຳອິດທີ່ມີຜູ້ຕັດສິນຍິງລົງເຮັດໜ້າທີ່ ແລະ ຄັ້ງນີ້ຈະມີຫລາຍເຖິງ 6 ຄົນ.
ສຳລັບຂໍ້ມູນຂອງຟີຟາ ລະບຸວ່າ ໃນບານໂລກ 2022 ຈະມີຜູ້ຕັດສິນລົງເຮັດໜ້າທີ່ຈຳນວນ 36 ຄົນ ແລະ ຜູ້ຊ່ວຍຕັດສິນ 69 ຄົນ ລວມທັງຜູ້ຊ່ວຍຜູ້ຕັດສິນໃນຫ້ອງວີດີໂອ (VAR) ອີກ 24 ຄົນ ໃນຈຳນວນນີ້ຈະມີຜູ້ຕັດສິນຍິງຈຳນວນ 6 ຄົນ.
ໂດຍຜູ້ຕັດສິນ 3 ຄົນ ຄື ສະເຕຟານີ ແຟຣບປາ ຈາກຝຣັ່ງ, ຊາລີມາ ມູກັນຊັນກາ ຈາກຣະວັນດາ ແລະ ໂຢຊິມິ ຢາມາຊິຕະ ຈາກຍີ່ປຸ່ນ ແລະ ຜູ້ຊ່ວຍຕັດສິນ 3 ຄົນ ຄື ນູຊາ ແບັກ ຈາກບຣາຊິລ, ຄາເຣນ ດີອາສ ເມດີນາ ຈາກເມັກຊີໂກ ແລະ ແຄດເທີຣີນ ເນສບິດ ຈາກສະຫະລັດ.
ສຳລັບ ສະເຕຟານີ ແຟຣບປາ ຜູ້ຕັດສິນຈາກ ລີກ ເອິງ ຝຣັ່ງ ລົງເຮັດໜ້າທີ່ໃນບານເຕະຢູຟາ ຊຸບເປີ ຄັບ ລະຫວ່າງ ລີເວີພູລ ແລະ ເຊລຊີ ໃນປີ 2019 ແລະ ເປັນຜູ້ຕັດສິນຍິງຄົນທຳອິດທີ່ລົງເຮັດໜ້າທີ່ໃນບານຢູຟາ ແຊ໊ມປຽນ ລີກ.
ສຳລັບ ຜູ້ຕັດສິນຄັ້ງນີ້ ແບ່ງເປັນຜູ້ຕັດສິນຈາກ ສະມາຄົມບານເຕະເອເຊຍ 6 ຄົນ, ຜູ້ຊ່ວຍຜູ້ຕັດສິນ 10 ຄົນ ແລະ ຜູ້ຕັດສິນ VAR 4 ຄົນ.
ຈາກສະມາຄົມບານເຕະແອຟຣິກາ ຜູ້ຕັດສິນ 6 ຄົນ, ຜູ້ຊ່ວຍຜູ້ຕັດສິນ 10 ຄົນ ແລະ ຜູ້ຕັດສິນ VAR 2 ຄົນ.
