ຈຳປາສັກ ສັ່ງປິດກິດຈະການຮ້ານເກມອອນລາຍຢູ່ນະຄອນປາກເຊ 11 ຮ້ານ
November 11, 2022 - 1:23 PM
ວັນທີ 9 ພະຈິກ 2022 ນີ້ ຄະນະສະເພາະກິດຂັ້ນແຂວງຈຳປາສັກ ເຊິ່ງນໍາໂດຍ ທ່ານ ວິໄລ ແກ້ວມະນີໄລ ກໍາມະການພັກແຂວງ ຫົວໜ້າພະແນກເຕັກໂນໂລຊີ ແລະການສື່ສານແຂວງ, ທ່ານ ຄຳເພັດ ເທບໄກສອນ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ, ທ່ານ ພັທ ຄໍາສິງ ພົນສະຫວັດ ຮອງຫົວໜ້າກອງບັນຊາການປ້ອງກັນຄວາມສະຫງົບສຸກ ນະຄອນປາກເຊ ແລະ ຫ້ອງການທີ່ກ່ຽວຂ້ອງຂອງນະຄອນປາກເຊ ໄດ້ສົມທົບກັບອໍານາດການປົກຄອງບ້ານ ແລະ ປ.ກ.ສ ກຸ່ມ ພາຍໃນນະຄອນປາກເຊ ລົງເຄື່ອນໄຫວແກ້ໄຂປະກົດການຫຍໍ້ທໍ້ຈາກການບໍລິການຂອງຮ້ານອິນເຕີເນັດຄາເຟ່, ຮ້ານເກມອອນລາຍ ແລະ ການພະນັນອອນລາຍ ຢູ່ທີ່ບ້ານຫ້ວຍເລົາ, ບ້ານດອນເຂາະ, ສະໜາມໄຊ, ບ້ານຈັດສັນຫຼັກ7 ແລະ ໂນນສະຫວ່າງ.
ເຊິ່ງໃນແຕ່ລະບ້ານ ຄະນະສະເພາະກິດຂັ້ນແຂວງ ໄດ້ຜ່ານຂໍ້ຕົກລົງເລກທີ 705 ລົງວັນທີ 6 ກໍລະກົດ 2022 ຂອງທ່ານເຈົ້າແຂວງຈໍາປາສັກ ວ່າດ້ວຍການແຕ່ງຕັ້ງຄະນະສະເພາະກິດຂັ້ນແຂວງໃນການກວດຄົ້ນ, ແກ້ໄຂຮ້ານອິນເຕີເນັດຄາເຟ່, ຮ້ານເກມອອນລາຍ, ຮ້ານພະນັນອອນລາຍ ເພື່ອໃຫ້ອໍານາດການປົກຄອງບ້ານ ແລະ ປ.ກ.ສ ກຸ່ມບ້ານ ໄດ້ຮັບຊາບກ່ອນຈະມີການເຄື່ອນໄຫວຕົວຈິງ.
ຜ່ານການເກັບກໍາຂໍ້ມູນຢູ່ບ້ານຫ້ວຍເລົາມີ 1 ຮ້ານ ໄດ້ເຮັດບົດບັນທຶກໃຫ້ປິດ 1 ຮ້ານ, ບ້ານດອນເຂາະມີ 3 ຮ້ານ ໄດ້ເຮັດບົດບັນທຶກໃຫ້ປິດຈຳນວນ 1 ຮ້ານ ແລະ 2 ຮ້ານແມ່ນໄດ້ປິດກິດຈະການກ່ອນແລ້ວ, ບ້ານສະໜາມໄຊມີຈຳນວນ 10 ຮ້ານ ໄດ້ເຮັດບົດບັນທຶກໃຫ້ປິດຈຳນວນ 1 ຮ້ານ, 4 ຮ້ານແມ່ນໄດ້ເຮັດບົດບັນທຶກໃນການເຄື່ອນໄຫວກິດຈະການໃຫ້ສອດຄ່ອງຕາມຂໍ້ຕົກລົງຂອງລັດຖະມົນຕີກະຊວງໄປສະນີ, ໂທລະຄົມມະນາຄົມ ແລະ ການສື່ສານ ສະບັບເລກທີ 828/ປທສ ລົງວັນທີ 11 ມີນາ 2015 ແລະ ຈຳນວນ 5 ຮ້ານແມ່ນໄດ້ປິດກິດຈະການກ່ອນແລ້ວ, ບ້ານຈັດສັນຫຼັກ 7 ມີຈຳນວນ 14 ຮ້ານ ໄດ້ເຮັດບົດບັນທຶກໃຫ້ປິດຈຳນວນ 4 ຮ້ານ, 3 ຮ້ານແມ່ນໄດ້ເຮັດບົດບັນທຶກໃນການເຄື່ອນໄຫວກິດຈະການໃຫ້ສອດຄ່ອງຕາມຂໍ້ຕົກລົງຂອງລັດຖະມົນຕີກະຊວງໄປສະນີ, ໂທລະຄົມມະນາຄົມ ແລະ ການສື່ສານ ສະບັບເລກທີ 828/ປທສ ລົງວັນທີ 11 ມີນາ 2015 ແລະ ຈຳນວນ 7 ຮ້ານແມ່ນໄດ້ປິດກິດຈະການກ່ອນແລ້ວ, ບ້ານໂນນສະຫວ່າງ ມີຈຳນວນ 7 ຮ້ານໄດ້ເຮັດບົດບັນທຶກໃຫ້ປິດຈຳນວນ 4 ຮ້ານແລະ ຈຳນວນ 3 ຮ້ານແມ່ນໄດ້ປິດກິດຈະການກ່ອນແລ້ວ.
ຄະນະກຳມະການດັ່ງກ່າວ ຈະໄດ້ສືບຕໍ່ໃຫ້ສຳເລັດທົ່ວນະຄອນປາກເຊ ພາຍໃນວັນທີ 11 ພະຈິກຈິກ 2022 ນີ້, ພ້ອມນັ້ນຈະໄດ້ຈັດກອງປະຊຸມຖອດຖອນບົດຮຽນ ແລະ ລາຍງານຂັ້ນເທິງຜົນການແກ້ໄຂໃນຄັ້ງນີ້.
