ສປປ ເກົາຫລີ ຊ້ອມຮົບໂຈມຕີ ເກາະດ່ານໜ້າຂອງ ສ.ເກົາຫລີ
ຜູ້ນຳສູງສຸດຂອງລັດຖະບານພຽງຢາງຊົມການຊ້ອມຮົບໂຈມຕີເກາະດ່ານໜ້າຂອງ ສ.ເກົາຫລີ 2 ເກາະ ທີ່ຕັ້ງຢູ່ໃກ້ເສັ້ນແບ່ງຊາຍແດນໃນທະເລເຫລືອງ ທ່າມກາງບັນຍາກາດເຄັ່ງຕຶງຄັ້ງໃໝ່ຢູ່ແຫລມເກົາຫລີ.
ສຳນັກຂ່າວຕ່າງປະເທດລາຍງານຈາກນະຄອນຫລວງເຊອຸນ ຂອງ ສ.ເກົາຫລີ ໃນວັນທີ 26 ສິງຫາວ່າ: ສຳນັກຂ່າວກາງເກົາຫລີ (KCNA) ລາຍງານວ່າ: ທ່ານ ກິມ ຈອງອຶນ ຜູ້ນຳສູງສຸດຂອງ ສປປ ເກົາຫລີ ລົງພື້ນທີ່ສັງເກດການການເຝິກຊ້ອມຮົບຄັ້ງຍິ່ງໃຫຍ່ຂອງກອງທັບປະຊາຊົນເກົາຫລີ (KPA) ເຊິ່ງເປັນການກຽມຄວາມພ້ອມຂອງທະຫານໃນການໂຈມຕີເກາະແບງນາຍອງ ແລະ ເກາະຍອນພະຍອງ ໂດຍເກາະທັງສອງແຫ່ງຕັ້ງຢູ່ໃກ້ກັບເສັ້ນຈຳກັດຕອນເໜືອ (NLL) ທີ່ສະຫະປະຊາຊາດ (UN) ໃຊ້ແບ່ງອານາເຂດຂອງທະເລເຫລືອງໃຫ້ ສປປ ເກົາຫລີ ແລະ ສ.ເກົາຫລີ ແລະ ທັງສອງປະເທດຍຶດເປັນເສັ້ນແບ່ງຊາຍແດນທາງທະເລຈົນເຖິງປັດຈຸບັນ.
ທັງນີ້, ລາຍງານດັ່ງກ່າວຂອງ KCNA ເກີດຂຶ້ນໃນເວລາດຽວກັບ ສປປ ເກົາຫລີ ຍິງລູກສອນໄຟໄລຍະໃກ້ 3 ລູກ ອອກຈາກແຂວງຄັງວອນ ໃນພາກຕາເວັນອອກຂອງປະເທດ ໃນຕອນຮຸ່ງເຊົ້າຂອງວັນທີ 26 ສິງຫາຕາມເວລາທ້ອງຖິ່ນ ໂດຍລູກສອນໄຟເດີນທາງມຸ່ງໄປທາງທິດຕາເວັນອອກສຽງເໜືອເປັນໄລຍະທາງປະມານ 250 ກິໂລແມັດ ກ່ອນຕົກລົງໃນທະເລຍີ່ປຸ່ນ ເຊິ່ງການເຄື່ອນໄຫວນີ້ເກີດຂຶ້ນໃນໄລຍະທີ່ກອງທັບ ສ.ເກົາຫລີ ແລະ ອາເມລິກາຢູ່ໃນໄລຍະຊ້ອມຮົບປະຈຳຮ່ວມກັນ ທີ່ຈະສິ້ນສຸດໃນວັນທີ 31 ສິງຫານີ້ ແລະ ທ່ານ ເຣັກ ທິວເລີສັນ ລັດຖະມົນຕີການຕ່າງປະເທດອາເມລິກາ ຫາກໍກ່າວໃນຕົ້ນອາທິດວ່າ: ລັດຖະບານພຽງຢາງມີທ່າທີເຢັນຂຶ້ນ ເນື່ອງຈາກຍັງບໍ່ມີການຍິງລູກສອນໄຟອີກ ຫລັງທົດລອງລູກສອນໄຟຂ້າມທະວີບ (ICBM) 2 ຄັ້ງໃນເດືອນຜ່ານມາ.
