ທ່ານໃດ ຢາກຮຽນການລົດໄຟກຽມຕົວໄວ້ເລີຍ ໂຄງການກໍ່ສ້າງ ຄືບໜ້າກວ່າ 70% ແລ້ວ ຄາດວ່າຈະເປີດທ້າຍປີ 2023
ຂ່າວ ໜັງສືພິມສຶກສາ-ກິລາລາຍວັນ ລາຍງານໃຫ້ຮູ້ວ່າ: ວັນທີ 31 ຕຸລາ 2022 ຜ່ານມາ ທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ ຫຼື ສສກ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມພາກສະໜາມ ເພື່ອຕິດຕາມຄວາມຄືບໜ້າໃນການຈັດຕັ້ງປະຕິບັດການກໍ່ສ້າງໂຄງການວິທະຍາໄລ (ວລ) ເຕັກນິກ-ວິຊາຊີບ ການລົດໄຟລາວ ທີ່ໄດ້ຮັບຊ່ວຍເຫຼືອລ້າຈາກລັດຖະບານແຫ່ງ ສປ ຈີນ.
ໂຄງການກໍ່ສ້າງວິທະຍາໄລເຕັກນິກ-ວິຊາຊີບ ການລົດໄຟລາວ ຕັ້ງທີ່ເຂດສະໜາມກິລາແຫ່ງຊາດ (ຫຼັກ 16) ບ້ານໂພຄໍາ ເມືອງໄຊທານີ ນະຄອນຫຼວງວຽງຈັນ, ເປັນໂຄງການໜຶ່ງທີ່ໄດ້ຮັບຊ່ວຍເຫຼືອລ້າຈາກລັດຖະບານແຫ່ງສາທາລະນະລັດ ປະຊາຊົນ ຈີນ ຫຼື ສປ ຈີນ ພາຍໃຕ້ສົນທິສັນຍາຮ່ວມມືດ້ານເສດຖະກິດເຕັກນິກ ເພື່ອສ້າງວິທະຍາໄລເຕັກນິກ-ວິຊາຊີບ ການລົດໄຟລາວ ເປັນສະຖານທີ່ຈັດຕັ້ງການຮຽນການສອນ, ຈັດຝຶກອົບຮົມໄລຍະສັ້ນ-ໄລຍະຍາວ, ກໍ່ສ້າງນັກວິຊາການ, ນາຍຊ່າງເຕັກນິກດ້ານການລົດໄຟ ເພື່ອຕອບສະໜອງແຮງງານໃຫ້ແກ່ການພັດທະນາເສດຖະກິດສັງຄົມ ກໍຄື ລະບົບການຂົນສົ່ງທາງລາງຢູ່ ສປປ ລາວ ໃຫ້ເຕີບໃຫຍ່ຂະຫຍາຍຕົວຢ່າງແຂງແຮງ.
ໂຄງການກໍ່ສ້າງວິທະຍາໄລເຕັກນິກ-ວິຊາຊີບ ການລົດໄຟລາວ ໄດ້ເລີ່ມຈັດຕັ້ງປະຕິບັດກໍ່ສ້າງມາແຕ່ເດືອນກັນຍາ 2021 ເປັນຕົ້ນມາ, ປັດຈຸບັນ ສະພາບການກໍ່ສ້າງທາງດ້ານໂຄງລ່າງພື້ນຖານ ແມ່ນມີຄວາມຄືບໜ້າ ແລະ ສໍາເລັດແລ້ວ 70%, ຄາດໝາຍຈະໃຫ້ສໍາເລັດ ແລະ ມອບໃຫ້ກະຊວງສຶກສາທິການ ແລະ ກິລາ ນໍາໃຊ້ໃນທ້າຍປີ 2023 ທີ່ຈະມາເຖິງນີ້.
