ປກສ ເມືອງ ທ່າພະບາດ ສຶກສາອົບຮົມກຸ່ມມົ້ວສຸມເສບຢາເສບຕິດໃນທົ່ວເມືອງ

ພະແນກຕຳຫລວດ ປກສ ເມືອງ ທ່າພະບາດ ແຂວງ ບໍລິຄໍາໄຊ ໄດ້ສຶກສາອົບຮົມກຸ່ມມົ້ວສຸມເສບຢາເສບຕິດທົ່ວເມືອງ ທ່າພະບາດ ໃນວັນທີ 8 ພະຈິກ 2022 ນີ້, ໂດຍການເຂົ້າຮ່ວມຂອງທ່ານ ພັນໂທ ຄຳຜາຍ ໄຊຊະນະ ຫົວຫນ້າພະແນກຕຳຫລວດ ປກສ ເມືອງ ທ່າພະບາດ, ມີຄະນະພະແນກ, ພະນັກງານວິຊາສະເພາະ ພ້ອມທັງພໍ່ແມ່ຜູ້ປົກຄອງ ແລະ ກຸ່ມມົ້ວສຸມເສບຢາເສບຕິດ 16 ຄົນເຂົ້າຮ່ວມຮັບຟັງ.

ການສຶກສາອົບຮົມຄັ້ງນີ້ໄດ້ນໍາເອົາແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ໂດຍສະເພາະແມ່ນກົດໝາຍວ່າດ້ວຍຢາເສບຕິດ, ມາເຜີຍແຜ່ໃຫ້ແກ່ບັນດາກຸ່ມມົ້ວສຸມເສບຢາເສບຕິດໄດ້ຮັບຮູ້ເຂົ້າໃຈຢ່າງເລິກເຊິ່ງຕໍ່ຜົນຮ້າຍ ແລະ ໄພອັນຕະລາຍຂອງຢາເສບຕິດ, ເໜັ້ນໃຫ້ພໍ່ແມ່, ຜູ້ປົກຄອງ ຈົ່ງເອົາໃຈໃສ່ສຶກອົບຮົມ, ຕັກເຕືອນລູກຫລານຂອງຕົນບໍ່ໃຫ້ໄປພົວພັນຫຍຸ້ງກ່ຽວກັບຢາເສບຕິດທຸກປະເພດ. ນອກນີ້, ກໍຂໍຮຽກຮ້ອງໃຫ້ກຸ່ມມົ້ວສຸມເສບຢາເສບຕິດທຸກຄົນຈົ່ງພ້ອມກັນຢຸດເຊົາບໍ່ໄປມົ້ວສຸມເສບຢາເສບຕິດອີກ, ຈົ່ງພ້ອມກັນປັບປຸງປ່ຽນແປງທັດສະນະແນວຄິດ, ການກະທໍາຂອງຕົນເອງໃຫ້ກັບກາຍມາເປັນລູກທີ່ດີຂອງພໍ່ແມ່, ເປັນຄົນດີຂອງສັງຄົມ, ຕັ້ງໜ້າປະຕິບັດກົດໝາຍຂອງບ້ານເມືອງຢ່າງເຂັ້ມງວດ, ເອົາໃຈໃສ່ພັດທະນາຕົນເອງ, ປະກອບອາຊີບຢ່າງຖືກຕ້ອງເພື່ອສ້າງສາພັດທະນາຊີວິດການເປັນຢູ່ຂອງຕົນເອງ ແລະ ຄອບຄົວໃຫ້ນັບມື້ດີຂຶ້ນເປັນກ້າວໆ.