ມາເນ ໂຊກຮ້າຍ ເຈັບໜັກ ຫມົດສິດໄປບານໂລກຊ່ວຍ ເຊເນກັລ

ສື່ຝຣັ່ງລາຍງານວ່າ ຊາດີໂອ ມາເນ ກອງໜ້າ ບາເຢິນ ມິວນິກ ແລະ ທີມຊາດເຊເນກັລ ຈະພາດໄປຫລິ້ນໃນບານເຕະໂລກ 2022 ຫລັງໄດ້ຮັບບາດເຈັບເສັ້ນເອັນຈາກເກມບຸນເດສລີກາເມື່ອວັນທີ 8 ພະຈິກ.

ໂດຍ ມາເນ ໄດ້ຮັບບາດເຈັບໃນໄລຍະຕົ້ນເກມທີ່ ບາເຢິນ ມິວນິກ ເປີດບ້ານຖະຫລ່ົມ ແວເດີ ເບຣເມນ 6-1 ໃນການແຂ່ງຂັນ ບຸນເດສລີກາ ເຢຍລະມັນ ເມື່ອວັນທີ 8 ພະຈິກຜ່ານມາ ກ່ອນຕ້ອງຖືກປ່ຽນຕົວອອກໃນນາທີທີ 20 ແລະ ໃຫ້ ເລີຣອຍ ຊາເນ ລົງສະໜາມມາແທນ.

ຈາການບາດເຈັບທີ່ເກີດຂຶ້ນເຮັດໃຫ້ຫລາຍຝ່າຍກັງວົນວ່າດາວເຕະອາຍຸ 30 ປີລາຍນີ້ຈະບໍ່ສົມບູນຊ່ວຍທີມຊາດເຊເນກັລ ໃນບານໂລກ 2022 ທີ່ພວມຈະເລີ່ມຂຶ້ນວັນທີ 20 ພະຈິກນີ້ໄດ້ຫລືບໍ່ ຂະນະທີ່ ຢູລຽນ ນາເກລມັນ ຜູ້ຈັດການທີມບາເຢິນ ກ່າວຫລັງເກມວ່າເຖິງອາການຂອງ ມາເນ ວ່າຕ້ອງຖ້າຜົນສະແກນອີກເທື່ອຫນຶ່ງ.

ແນວໃດກໍຕາມຫລ້າສຸດ ເລິກິບ ສື່ຊື່ດັງຝຣັ່ງ ລະບຸວ່າ ມາເນ ໄດ້ຮັບບາດເຈັບເສັ້ນເອັນ ແລະ ຕ້ອງພັກປິ່ນປົວອາການຫລາຍອາທິດ ນັ້ນຫມາຍຄວາມວ່າ ລາວຈະບໍ່ບູນທັນໄປຫລິ້ນໃນບານໂລກ ຄັ້ງນີ້.

ທັງນີ້ ມາເນ ຄືກຳລັງສຳຄັນຂອງທີມຊາດເຊເນກັລ ເຊິ່ງຢູ່ໃນກຸ່ມ A ໃນບານໂລກຄັ້ງນີ້ຮ່ວມກັບເຈົ້າພາບກາຕ້າ, ເນເທີແລນ ແລະ ເອກວາດໍ ຫລັງຈາກລາວຍິງໄປແລ້ວ 33 ປະຕູ ຈາກການລົງສະໜາມ 92 ນັດລວມທຸກລາຍການ.