ປາກົດການຫຍໍ້ທໍ້ ແລະ ບັນຫາທ້າທາຍ ປັດຈຸບັນຄືບັນຫາຢາເສບຕິດ ແລະ ຂີ້ລັກງັດແງະ

ໂດຍ: ທິດກໍ່າ

ບັນຫາການປະຕິບັດວາລະແຫ່ງຊາດກ່ຽວກັບຢາເສບຕິດເປັນສະໜາມຮົບທີ່ເດັດດ່ຽວຂ້ຽວຂາດລະອຽດອ່ອນ ແລະ ທັງເດັດຂາດ. ຍ້ອນວ່າຢາເສບຕິດເປັນທີ່ມາຂອງການປຸ້ນຈີ້, ຂີ້ລັກ, ງັດແງະ, ຂ້າເຈົ້າເອົາຂອງ ຫລື ເວົ້າອີກຢ່າງໜຶ່ງກໍແມ່ນເປັນຕົ້ນເຫດຂອງຄວາມບໍ່ສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມລາວເຮົາ. ຖືໄດ້ວ່ານັບແຕ່ມີການເລີ່ມຕົ້ນປະຕິບັດວາລະແຫ່ງຊາດກ່ຽວກັບຢາເສບຕິດ ເຫັນວ່າເຈົ້າໜ້າທີ່ເຮົາສາມາດຢຶດ, ທຳລາຍກຸ່ມເປົ້າໝາຍໄດ້ຢ່າງລຽນຕິດ ແລະ ຫລວງຫລາຍ ເຊິ່ງໜຶ່ງໃນຜົນງານຊິ້ນໃຫຍ່ໆໃນໄລຍະຜ່ານມາ ກໍຄືໃນວັນທີ 18 ສິງຫາ 2022 ປກສ ແຂວງຫລວງພະບາງສາມາດຢຶດຢາເສບຕິດໄດ້ 67 ເປົາ ມີນ້ຳໜັກເຖິງ 2.175 ກິໂລກຣາມ, ຈັບຕົວຜູ້ຖືກຫາໄດ້ 2 ຄົນ ແລະ ຍັງມີຈຸດອື່ນໆຢູ່ເຂດແຂວງອື່ນໆກໍສາມາດມ້າງກຸ່ມແກ້ງໄດ້ເປັນຈຳນວນບໍ່ໜ້ອຍ.

ແນວໃດກໍດີ, ສິ່ງທີ່ເຫັນປະຈັກຕາໃນສັງຄົມບ້ານເມືອງເຮົາໃນປັດຈຸບັນພວມຢູ່ໃນວາລະການປະຕິບັດວາລະແຫ່ງຊາດກ່ຽວກັບຢາເສບຕິດ ພັດເກີດມີຂີ້ລັກ, ປຸ້ນຈີ້, ຂ້າເຈົ້າເອົາຂອງໄດ້ປາກົດຕົວໃຫ້ເຫັນຢ່າງຕໍ່ເນື່ອງ. ຕົວຢ່າງໃນວັນທີ 12 ກັນຍາ 2022 ຜ່ານມາ ເວລາ 3:00 ໂມງເຊົ້າ ເຈົ້າໜ້າທີ່ ປກສ ເມືອງໄຊທານີ ນະຄອນຫລວງວຽງຈັນ ໄດ້ຈັບຕົວພວກກໍ່ເຫດ ຊື່ທ້າວ ພອນສະຫວັນ ອາຍຸ 18 ປີ ຢູ່ບ້ານໜອງບົວທອງເໜືອ ເມືອງສີໂຄດຕະບອງ ແລະ ທ້າວ ພິມມະສອນ ຫລື ແຫລ້ ອາຍຸ 17 ປີ ຢູ່ບ້ານດ່ານຊ້າງ ເມືອງໄຊທານີ ໃນຂໍ້ຫາໃຊ້ປືນສັ້ນຈີ້ປຸ້ນເອົາລົດຂອງທ້າວ ບຸນລອດ ພ້ອມທັງຍິງນາບຂູ່ ແລ້ວກໍເອົາຕົວຫລົບໜີ ແຕ່ເຈົ້າໜ້າທີ່ຕຳຫລວດເມືອງໄຊທານີກໍສາມາດຕາມລ່ານຳຈັບຕົວມາລົງໂທດຕາມກົດໝາຍ. ຕໍ່ມາໃນວັນທີ 16 ຕຸລາຜ່ານມາ ມີພົນລະເມືອງດີຫລາຍຄົນໄດ້ພົບເຫັນ ແລະ ຫຸ້ມຈັບຄົນລັກລົດຈັກ ຢູ່ບ້ານໂພນສະຫວ່າງ ເມືອງຈັນທະບູລີ ນະຄອນຫລວງວຽງຈັນ. ນອກຈາກຕົວຢ່າງທີ່ໄດ້ກ່າວມາຂ້າງເທິງນີ້ແລ້ວ ຍັງມີຫລາຍບ່ອນຫລາຍທີ່ໃນເຂດແຂວງອື່ນ ທາງເຈົ້າໜ້າທີ່ກ່ຽວຂ້ອງໄດ້ປະຕິບັດມາດຕະການອັນສຽບຂາດ ສາມາດຈັບຕົວກຸ່ມແກ້ງກໍ່ເຫດລັກຊັບ, ປຸ້ນຈີ້ເອົາຊັບສິນຂອງພົນລະເມືອງຈຳນວນຫລາຍສົມຄວນ.

ຫາກຕັ້ງໂຈດກັນວ່າ, ເພື່ອແກ້ໄຂບັນຫາປາກົດການຫຍໍ້ທໍ້ດັ່ງກ່າວ ພວກເຮົາຕ້ອງພ້ອມກັນເຮັດແນວໃດ ? ຄຳຕອບກໍຄື ມັນກໍມີຫລາຍປັດໄຈ ເປັນຕົ້ນອັນທີໜຶ່ງ ທຸກຄົນຕ້ອງເປັນເຈົ້າການຮັກສາຄວາມສະຫງົບ ແລະ ປອດໄພຮ່ວມກັນ ເພາະວຽກປ້ອງກັນຊາດປ້ອງກັນຄວາມສະຫງົບເປັນຂອງປວງຊົນ. ອັນສອງມາສະຖາບັນຄອບຄົວຕ້ອງເປັນເຈົ້າການໃນການປົກປັກຮັກສາຄວາມສະຫງົບ, ຄວາມປອດໄພໃນເຮືອນຊານຂອງຕົນເອງໃຫ້ດີ, ໝັ່ນຕິດຕາມ, ສຶກສາອົບຮົມສະມາຊິກໃນຄອບຄົວຂອງຕົນໃຫ້ດີ, ມີສິນທຳ ທັງເປັນຫູເປັນຕາ ແລະ ຮ່ວມມືກັບເຈົ້າໜ້າທີ່ໃນການຮັກສາຄວາມສະຫງົບຮຽບຮ້ອຍຂອງສັງຄົມ, ສ້າງບ້ານ, ສ້າງຄອບຄົວແບບຢ່າງທາງດ້ານປ້ອງກັນຊາດ, ປ້ອງກັນຄວາມສະຫງົບ. ສ່ວນບັນຫາສຸດທ້າຍນັ້ນ ອຳນາດການປົກຄອງທ້ອງຖິ່ນຕ້ອງເປັນເສນາທິການຢ່າງແທ້ຈິງໃຫ້ຂັ້ນເທິງ ເພາະຖ້າເມື່ອໃດພື້ນຖານບໍ່ເຂັ້ມແຂງ ສັງຄົມບ້ານເມືອງກໍຈະບໍ່ມີຄວາມສະຫງົບສຸກ ເກີດຄວາມວຸ້ນວາຍຢ່າງບໍ່ມີມື້ຊິ້ນສຸດ.