ປະທານາທິບໍດີ ສ.ເກົາຫລີ ຂໍໂທດປະຊາຊົນ ຫລັງເກີດໂສກນາດຕະກຳອິແທວອນ ເນັ້ນປະຕິຮູບຕຳຫລວດ ນຳເອົາຄົນຜິດມາດຳເນີນຄະດີ

ວັນທີ 7 ພະຈິກ 2022, ປະທານາທິບໍດີ ຢຸນຊອກຢໍ ຂອງ ສ.ເກົາຫລີ ກ່າວຂໍໂທດປະຊາຊົນ ຫລັງເກີດເຫດໂສກນາດຕະກຳອິແທວອນ ເມື່ອໄລຍະເທດສະການຮາໂລວີນຜ່ານມາ ເປັນເຫດໃຫ້ມີຜູ້ເສຍຊີວິດຢ່າງໜ້ອຍ 156 ຄົນ ເນັ້ນເດີນໜ້າປະຕິຮູບຕຳຫລວດ ແລະ ນຳເອົາຄົນຜິດມາດຳເນີນຄະດີຕາມກົດໝາຍ.

ທ່ານ ຢນຊອກຢໍ ລະບຸວ່າ: “ຂ້າພະເຈົ້າບໍ່ກ້າຈະປຽບທຽບຕົນເອງກັບບັນດາພໍ່ແມ່ຜູ້ປົກຄອງທີ່ສູນເສຍລູກຊາຍ ແລະ ລູກສາວໄປຈາກເຫດການຄັ້ງນີ້, ແຕ່ໃນຖານະປະທານາທິບໍດີທີ່ຄວນຈະປົກປ້ອງຄຸ້ມຄອງຊີວິດຂອງປະຊາຊົນໄດ້ນັ້ນ ຂ້າພະເຈົ້າໃຈສະຫລາຍ.

“ຂ້າພະເຈົ້າຢາກຈະຂໍໂທດ ຂໍໂທດທຸກຄອບຄົວຂອງຜູ້ສູນເສຍທີ່ກຳລັງທຸກທໍລະມານໃຈຢ່າງແສນສາຫັດ ລວມທັງທຸກຄົນທີ່ຕ່າງກຳລັງຜະເຊີນກັບຄວາມເຈັບປວດ ແລະ ຄວາມເສົ້າເສຍໃຈຈາກໂສກນາດຕະກຳຄັ້ງນີ້”.

ພາຍຫລັງເກີດໂສກນາດຕະກຳຄັ້ງນີ້ຂຶ້ນ ຕຳຫລວດເປັນອົງກອນທີ່ໄດ້ຮັບສຽງວິພາກວິຈານຢ່າງໜັກໃນແງ່ຂອງການປະຕິບັດໜ້າທີ່ ໂດຍໃນໄລຍະເວລາເກີດເຫດ ມີເຈົ້າໜ້າທີ່ຕຳຫລວດພຽງ 137 ຄົນ ໃນບໍລິເວນງານທີ່ມີຄົນມາລວມຕົວກັນເປັນຈຳນວນຫລາຍ ເຊິ່ງອາດເຖິງຫລັກໝື່ນຫລັກແສນຄົນ. ອີກທັງຍັງພົບລາຍງານວ່າ: ກ່ອນໜ້າຈະເກີດເຫດເສົ້າສະຫລົດນີ້ຂຶ້ນປະມານ 3-4 ຊົ່ວໂມງ ມີການໂທລະສັບແຈ້ງເຫດສຸກເສີນຕໍ່ເຈົ້າໜ້າທີ່ຕຳຫລວດແລ້ວ, ແຕ່ພັດບໍ່ມີການດຳເນີນມາດຕະການໃດໆ ຈົນສະຖານະການລຸກລາມກາຍເປັນໂສກນາດຕະກຳໃນທ້າຍທີ່ສຸດ.

ທ່ານ ຢຸນຊອກຢໍ ໃຫ້ຄຳໝັ້ນຈະເດີນໜ້າປະຕິຮູບຕຳຫລວດ, ສືບສວນສອບສວນ ແລະ ນຳເອົາຜູ້ບົກພ່ອງຕໍ່ການປະຕິບັດໜ້າທີ່ມາດຳເນີນຄະດີຕາມກົດໝາຍ ໂດຍປະທານາທິບໍດີ ສ.ເກົາຫລີ ລະບຸວ່າ: “ວຽກຕຳຫລວດຈຳເປັນຕ້ອງໄດ້ຮັບການປະຕິຮູບຢ່າງໜັກ ເພາະເປັນວຽກທີ່ມີຄວາມສຳຄັນໃນການກຽມພ້ອມຮັບມືຕໍ່ສະຖານະການສຸກເສີນ ຫລື ອຸບັດຕິເຫດຕ່າງໆ ເພື່ອປົກປ້ອງຄວາມປອດໄພຂອງປະຊາຊົນ”.

ຖືເປັນໂສກນາດຕະກຳຄັ້ງໃຫຍ່ທີ່ເກີດຂຶ້ນໃນຮອບເກືອບທົດສະວັດຂອງ ສ.ເກົາຫລີ ຫລັງຈາກເກີດເຫດເຮືອເຊວໍຂວ້ຳລະຫວ່າງເດີນທາງອອກຈາກອິນຊອນສູ່ເກາະເຊຈູ ເມື່ອປີ 2014 ເປັນເຫດໃຫ້ມີຜູ້ເສຍຊີວິດ 300 ກວ່າຄົນໃນເຫດການຄັ້ງນັ້ນ.

ອ້າງອີງ:

https://www.aljazeera.com/…/s-koreas-yoon-suk-yeol…

https://asia.nikkei.com/…/Itaewon-tragedy-is-code-red…

https://www.reuters.com/…/south-koreas-yoon-apologises…/