ຜູ້ຈັດກິດຈະກຳອອກມາຊີ້ແຈງ ມີເຈຕະນາສືບທອດວັດທະນະທຳ ບໍ່ໄດ້ລົບຫລູ່ ພ້ອມຍອມຮັບຄວາມຜິດພາດ ແລະ ຈະຂໍຂະມາ
November 7, 2022 - 9:56 AM
ພາຍຫລັງ ພາບປາກົດການແປກໃໝ່ ໂດຍມີພິທີແຫ່ນາງ (ອັບປະສອນ) ອອກເຜີຍແຜ່ສູ່ສາຍຕາສັງຄົມ ວັນທີ 6 ພະຈິກ 2022 ຜ່ານມາຕ່າງກໍວິພາກວິຈານເຖິງຄວາມບໍ່ເໝາະສົມ ແລະ ຢາກຮູ້ທີ່ໄປທີ່ມາກ່ຽວກັບພທີກຳດັ່ງກ່າວ.
ຫລ້າສຸດ ວັນທີ 7 ພິຈິກ 2022 ນີ້ ຜູ້ຮັບຈັດກິດຈະກຳດັ່ງກ່າວອອກມາຊີ້ແຈງຜ່ານເຟສບຸກ Korviset Phaxaisombath ວ່າ: ຂໍອະນຸຍາດຊີ້ແຈງ ແລະ ຂໍສົມມາລາໂທດຈາກກິດຈະກຳແຫ່ຜາສາດເຜິ້ງຂອງມື້ວານນີ້ ເຊິ່ງພວກຂ້ານ້ອຍບໍ່ມີເຈຕະນາຈະລົບຫລູ່ດູໝິ່ນສະຖານທີ່ແຕ່ຢ່າງໃດ, ເຮັດຂຶ້ນເພື່ອຫວັງຢາກຊ່ອຍສົ່ງເສີມວຽກງານສິລະປະ ແຕ່ກໍຖືວ່າອາດເປັນສິ່ງທີ່ບໍ່ເໝາະສົມໃນສາຍຕາຂອງສັງຄົມ ເລີຍຢາກຂໍກະຈ່າງແຈ້ງຊີ້ແຈງຕື່ມ ເຊິ່ງກິດຈະກຳນີ້ແມ່ນເປັນກິດຈະກຳຂອງໄວໜຸ່ມທີ່ມັກຮັກໃນງານສິລະປະວັດທະນະທຳລາວ ທີ່ລວມກັນສ້າງຂຶ້ນຈາກການລະດົມແນວຄວາມຄິດໂດຍອ້າງອີງຈາກປະຫວັດສາດ ແລະ ວັນນະຄະດີລາວໃນອະດີດມາເປັນຂໍ້ມູນ ເພາະເຫັນວ່າບາງອັນກໍໄດ້ຊຸດໂຊມຫາຍໄປ.
ເຊິ່ງການໃຊ້ສະລ່ຽງແມ່ນອ້າງອີງຈາກຂະບວນແຫ່ໃນອະດີດ ແລະ ການແຕ່ງກາຍແມ່ນອ້າງອີງຂໍ້ມູນຮູບປັ້ນຂອງນາງອັບສອນ ເຊິ່ງເປັນຮ່ອງຮອຍເສດເຫລືອຈາກວັດຍອດແກ້ວ (ໂຮງຮຽນແພດສາດດຽວນີ້) ເຊິ່ງຖືວ່າເປັນວັດເກົ່າແກ່ທີ່ຖືກສ້າງຂຶ້ນໃນຍຸກລະຫວ່າງພຣະເຈົ້າໄຊເຊດຖາເຖິງຍຸກເຈົ້າສຸລິຍະວົງສາ ແລະ ປັດຈຸບັນນີ້ຮ່ອງຮອຍເຫລົ່ານັ້ນຖືກເກັບໄວ້ທີ່ຫໍພະແກ້ວ ເພື່ອເປັນການຮື້ຟື້ນງານສິລະປະດັ່ງກ່າວຢາກໃຫ້ຄົນຮຸ່ນໃໝ່ໄດ້ເຫັນເລີຍລົມກັນຈັດກິດຈະກຳຂຶ້ນ ສຳລັບກິດຈະກຳວານນີ້ພວກຂ້ານ້ອຍພ້ອມດ້ວຍທີມງານຂໍນ້ອມຮັບດ້ວຍຄວາມຈິງໃຈເຖິງຄວາມຜິດພາດ ເຊິ່ງຈະບໍ່ເໝາະສົມກັບສະຖານທີ່ ແລະ ເວລາ ຈາກການແຫ່ຂອງວານນີ້ ໃນເວລາແຫ່ບໍ່ຮູ້ວ່າເພິ່ນເຮັດພິທີທາງສາສະໜາຢູ່ຂ້າງໃນ ເພາະວ່າຕອນແຫ່ມາທາງເຈົ້າໜ້າທີ່ກໍປ່ອຍໃຫ້ເຂົ້າໄປ ຄິດວ່າເພິ່ນແຫ່ປົກກະຕິ ພາຍຫຼັງທີ່ແຫ່ໄປໄລຍະໜຶ່ງກໍເຫັນເພິ່ນກຳລັງເຮັດພິທີອີກຟາກໜຶ່ງກໍເລີຍໃຫ້ນາງງາມໄດ້ລົງຈາກສະລ່ຽງ ແລະ ໃຫ້ຍ່າງແຫ່ ຫຼັງຈາກນັ້ນກໍພາກັນອອກມາ ເຊິ່ງພາບທີ່ເຫັນກໍເປັນພຽງບາງສ່ວນທີ່ບາງທ່ານໄດ້ບັນທຶກໄວ້ ເຊິ່ງມັນອາດບໍ່ເໝາະສົມ ອັນນີ້ຂໍນ້ອມຮັບຜິດດ້ວຍຄວາມຈິງໃຈ ນ້ອມຮັບທຸກຄຳຕຳໜິສົ່ງຂ່າວ ຈະຂໍນໍາໄປແກ້ໄຂໃນຈຸດທີ່ບົກພ່ອງ ແລະ ເປັນບົດຮຽນອັນໃຫຍ່ຫລວງໃນການເຮັດວຽກງານທາງດ້ານສິລະປະວັດທະນະທຳລາວ
ຂ້ານ້ອຍ ແລະ ທີມງານ ກາບຂໍຄະມາ ແລະ ຂໍອະໄພມານະທີ່ນີ້ດ້ວຍ
