ຄົນເປັນພະຍາດເບົາຫວານກິນຮັງນົກໄດ້ຫລືບໍ່ ?

ເປັນບັນຫາໜັກໃຈທີ່ສຳຄັນຫລາຍໃນຄົນເປັນພະຍາດເບົາຫວານ ສຳລັບເລື່ອງການກິນອາຫານ ເພາະຢາກກິນອັນນັ້ນກໍຖືກ ຫ້າມ ຈະກິນອັນນີ້ກໍຖືກຫ້າມ ຫລາຍຄົນເຖິງຂັ້ນຕ້ອງລັກກິນອາຫານທີ່ຖືກຫ້າມມາແລ້ວກໍມີ. ທຸກມື້ນີ້ຄົນເປັນພະຍາດເບົາຫວານ ໂດຍທົ່ວໄປແລ້ວ ເກືອບ 100% ມັກຈະບໍ່ເອົາໃຈໃສ່ເລື່ອງຂອງການຄວບຄຸມອາຫານ ແລະ ການອອກກຳລັງກາຍ ໂດຍຄິດວ່າເມື່ອກິນຢາແລ້ວກໍຄົງຈະເຊົາ ຄືກັບການປິ່ນປົວພະຍາດທົ່ວໄປ ເຊິ່ງເປັນຄວາມເຂົ້າໃຈຜິດ ເພາະພະຍາດເບົາຫວານເປັນພະຍາດຊຳ້ເຮື້ອທີ່ບໍ່ເຊົາຂາດການໃຊ້ຢາພຽງຢ່າງດຽວບໍ່ສາມາດຄວບຄຸມເບົາຫວານໄດ້ ຕ້ອງຮູ້ຈັກກິນອາຫານໃຫ້ຖືກອັດຕາສ່ວນກັບຄວາມຕ້ອງການຂອງຮ່າງກາຍນຳ ທັງນີ້ສ່ວນຫລາຍທ່ານໝໍຈະແນະນຳໃຫ້ກິນອາຫານທີ່ມີນຳ້ຕານໜ້ອຍ, ໄຂມັນໜ້ອຍ ລວມທັງຜັກ – ໝາກໄມ້ທີ່ອາດໃຊ້ເປັນຢາ ເຊັ່ນ : ໝາກອຶ, ໝາກໄສ່, ໝາກແຕງ ເປັນຕົ້ນ.

ສ່ວນອາຫານທີ່ຄວນຫລີກເວັ້ນກໍແມ່ນອາຫານຫວານ ແລະ ອາຫານມັນທັງຫລາຍ, ໝາກໄມ້ທີ່ມີລົດຊາດຫວານໆ ເຊັ່ນ : ໝາກຖົ່ວລຽນ, ກວນໝາກນັດ, ໝາກເງາະ ເປັນຕົ້ນ. ແນວໃດກໍຕາມ, ຍັງມີຫລາຍຄົນມີຂໍ້ສົງໄສວ່າເປັນພະຍາດເບົາຫວານແລ້ວຈະສາມາດກິນຮັງນົກໄດ້ຫລືບໍ່ ?

ຮັງນົກ ແມ່ນນຳ້ລາຍ ແລະ ສິ່ງທີ່ນົກແອ່ນຄາຍອອກມາເຮັດຮັງເພື່ອວາງໄຂ່, ປະກອບໄປດ້ວຍໂປຣຕິນ, ທາດເຫລັກ ແລະ ສານອາຫານອື່ນໆ, ຖືເປັນສະໝຸນໄພທີ່ມີລາຄາແພງ ເຊິ່ງຄົນຈີນນິຍົມໃຊ້ສາມາດເອົາຮັງນົກມາປຸງແຕ່ງເປັນອາຫານທັງຄາວ ແລະ ຫວານ ໂດຍປົກກະຕິຮັງນົກສຳເລັດຮູບທີ່ຂາຍກັນຕາມທ້ອງຕະຫລາດມັກຈະໃສ່ນຳ້ຕານ ຫາກຄົນເປັນພະຍາດເບົາຫວານກິນ ຄວນປ່ຽນແປງວິທີການປຸງແຕ່ງໂດຍຫລີກເວັ້ນການໃສ່ນຳ້ຕານ.

ແນວໃດກໍຕາມ, ເມື່ອປຽບທຽບລາຄາ ແລະ ຄຸນຄ່າທາງໂພຊະນາການແລ້ວ ອາຫານປະຈຳວັນອື່ນໆ ເຊັ່ນ : ຕົ້ມໄກ່ ຍັງມີລາ ຄາຖືກກ່ວາກັນຫລາຍ. ໃນກໍລະນີທີ່ເຈັບປ່ວຍແລ້ວກິນອາຫານບໍ່ລົງ ຄົນເປັນພະຍາດເບົາຫວານກໍສາມາດກິນຮັງນົກໄດ້ ເພື່ອໃຫ້ພະລັງງານແກ່ຮ່າງກາຍໃນເວລາສຸກເສີນ, ແຕ່ໃນຄົນທີ່ມີບັນຫາດ້ານການເງິນບໍ່ຈຳເປັນຕ້ອງຂົນຂວາຍຫາຮັງນົກມາກິນ ເຊິ່ງອາຫານແຫລວທຳມະດາ ເຊັ່ນ : ແກງ, ນົມ, ນຳ້ໝາກໄມ້ທຳມະຊາດ, ເຂົ້າປຽກ ກໍສາມາດໃຫ້ພະລັງງານສຸກເສີນແກ່ຮ່າງກາຍໄດ້ຄືກັນ. ສະນັ້ນ, ທ່ານບໍ່ຄວນອົດອາຫານປະເພດນີ້.