ບໍ່ເຄີຍມີມາກ່ອນ ກິດຈະກຳແຫ່ນາງອ້ອມພະທາດ ດ້ານໃນກົມມະລຽນ ສັງຄົມພວມສົງໄສ ຢາກຮູ້ເຖິງ ຄວາມເໝາະສົມ ແລະ ທີ່ໄປທີ່ມາ
ບຸນນະມັດສະການພະທາດຫລວງວຽງຈັນ ປີ ພສ 2565 ຄສ 2022 ຄົບຮອບ 462 ປີ (ປີ 1560-2022) ຖືກຈັກຂຶ້ນຢ່າງເະປັນທາງການໃນວັນທີ 4-8 ພະຈິກ 2022 ເຊິ່ງປະຊາຊົນຄົນລາວໄດ້ເດີນທາງມາຮ່ວມຈາກທຸກສາລະທິດ ຢ່າງລົ້ນເຫລືອ ດ້ວຍບັນຍາກາດອັນເບີກບານມ່ວນຊື່ນ ຮັກສາໄດ້ຮີດຄອງປະເພນີອັນດີງາມຂອງລາວ.
ກິດຈະກຳໃນງານບຸນນະມັດສະການພະທາດຫລວງປີ 2022 ນີ້ ຄືຄືດັ່ງທີ່ຜ່ານມາເຊັ່ນ
ວັນທີ 4 ພະຈິກ ເປີດພິທີຢ່າງເປັນທາງການ,
ວັນທີ 6 ພະຈິກ ພິທີສູດປະລິດຕະມຸງຄຸນ,
ວັນທີ 7 ພະຈິກ ແຫ່ຜາສາດເຜິ້ງ,
ວັນທີ 8 ພະຈິກ ຕັກບາດຖວາຍສັງຄະທານ, ຕີຄີ ແລະ ວຽນທຽນ.
ເຊິ່ງກິດຈະກຳທັງໝົດນີ້ ເປັນກິດຈະກຳທີ່ຂາດບໍ່ໄດ້ ແລະ ໄດ້ຮັບການສືບທອດມາເປັນຢ່າງດີ.
ແຕ່ໃນຂະນະດຽວກັນ, ນອກຈາກພິທີກຳ ແລະ ກິດຈະກຳທີ່ກຳນົດຢ່າງເປັນທາງການແລ້ວ ຍັງມີພິທີອື່ນໆທີ່ປະກອບເຊັ່ນ ການສະແດງສິລະປະວັດທະນະທຳຊົນເຜົ່າຕ່າງໆທີ່ບົ່ງບອກເຖິງຄວາມເປັນເອກະລັກ ສິນສັນວັດທະນະທຳຂອງຊາດລາວທີ່ເອກະອ້າງທະນົງໃຈແກ່ຊາວໂລກ.
ເຖິງຢ່າງໃດກໍຕາມ ຫາກມີປາກົດການໃໝ່ໆ ຫລື ກິດຈະກຳທີ່ແປກຕາ ທຸກຢ່າງບໍ່ແມ່ນຈະສັງຄົມຈະເຂົ້າໃຈ ແລະ ເຫັນດີເຫັນພ້ອມທຸກຢ່າງ ວັນທີ 6 ພະຈິກນີ້ ມີ 2 ປາກົດການທີ່ສັງຄົມໃຫ້ຄວາມສົນໃຈ.
ຜູ້ຊາຍຊາວຕ່າຊາດ ນຸ່ງສິ້ນຍ່າງອ້ອມທາດຫລວງ ກາຍເປັນພາບທີ່ແປກໃໝ່ໃນສັງຄົມລາວ ເຊິ່ງຫລາຍຄົນບໍ່ໄດ້ກ່າວໂທດ ເພາະອາດເກີດຈາກຄວາມບໍ່ຮູ້ ແຖມຍັງຮູ້ສຶກວ່າເປັນສີສັນ ແລະ ເອັນດູບຸກຄົນໃນພາບດັ່ງກ່າວ ແຕ່ຖ້າໃຫ້ຖືກແທ້ ພາກສ່ວນກ່ຽວຂ້ອງຄວນແນະນຳໃຫ້ຜູ້ກ່ຽວ ເຖິງຄວາມເປັນເອກະລັກສະເພາະດ້ານການນຸ່ງຖືຂອງຍິງ-ຊາຍ.
ພິທີກຳ ຫລື ກິດຈະກຳ ແຫ່ງນາງ ໃນນຸ່ງຊຸດແບບນາງມະເຫສີ ໂດຍມີຊາຍ 8 ຄົນ ຫາມແຫ່ອ້ອມທາດຫລວງ ດ້ານໃນກົມມະລຽນ ເຊິ່ງເປັນພາບທີ່ຫລາຍຄົນບໍ່ຄ່ອຍຄຸ້ນເຄີຍ ແລະ ບໍ່ມີແບບນີ້ມາກ່ອນ.
ຈາກຂໍ້ມູນທາງປະຫວັດສາດການສະເຫລີມສະຫລອງບຸນນະມັດສະການພະທາດຫລວງວຽງຈັນ ຕະຫລອດ 461 ປີ ຜ່ານມາ ບໍ່ມີການແຫ່ນາງໃດໆໃນຊຸດນາງມະເຫສີອ້ອມພະທາດຫລວງ ມີແຕ່ພິທີແຫ່ຜາສາດເຜິ້ງ.
ພະອາຈານສີສະເກດ ຄະນະ ອພສ ສູນກາງ ໄດ້ເຫັນພາບດັ່ງກ່າວກໍອອກມາສະແດງຄວາມຄິດເຫັນວ່າ: ຜູ້ຂ້າເຮັດວຽກຢູ່ ອພສ ສູນກາງແຕ່ສະໄໝຍາທ່ານຜ່ອງ ສະມາເລີກມາ ກະບໍ່ເຄີຍເຫັນຈະມີຂະບວນຫາມນາງແບບນີ້ເຂົ້າໃນພະທາດຫລວງຈັກເທື່່ອ. ພະທາດພະນົມຂ້າພະເຈົ້າກໍໄປແລ້ວ ແຕ່ກໍບໍເຫັນມີການຫາມນາງແບບນີ້ ເຂົ້າອ້ອມພະທາດພະນົມຊັ້ນໃນຈັກເທື່ອ ອັນນີ້ເກີດອັນໃດຂຶ້ນນໍ?……ຈິ່ງປ່ອຍໃຫ້ຂະບວນແບບນີ້ເຂົ້າໃນພະທາດຫລວງ ແລ້ວຍັງຫາມແຫ່ອ້ອມຮອດສາມຮອບ, ທຳມະດາໃຜຈະແຫ່ຈະຫາມກໍຕາມ ຖ້າເປັນໂຍມຕ້ອງປົງໄວ້ທາງນອກແລ້ວຍ່າງເຂົ້າໃນພະທາດ ເພື່ອສະແດງເຖິງຄວາມເຄົາລົບອັນແຮງກ້າ, ອັນນີ້ພະສົງກະນັ່ງເບິ່ງ….ມົກ….ຢູ່….ໂອຍ….ເນາະ….ຂະໜາດເຂົາຍົກຕີນຂຶ້ນແປະປະຕູຊື່ໆກໍ່ຍັງໄດ້ມາຂໍໂທດ”
ເຊິ່ງຄວາມເຫັນດັ່ງກ່າວ ກໍຊີ້ໃຫ້ເຫັນວ່າຕະຫລອດໄລຍະຜ່ານມາບໍ່ມີປະຫວັດການແຫ່ນາງອ້ອມຮອບທາດຫລວງດ້ານໃນ ເຊິ່ງຖ້າທຽບໃສ່ທາດພະນົມ ມີການແຫ່ ແຕ່ສະເພາະຢູ່ດ້ານນອກເທົ່ານັ້ນ ບໍ່ແມ່ນດ້ານໃນຂອງພະທາດແຕ່ຢ່າງໃດ.
ໃນຄວາມແປກໃໝ່ ທີ່ເປັນປາກົດການໃນສັງຄົມນີ້ ສັງຄົມຕ່າງກໍໄດ້ໂຈດຖາມ ແລະ ຢາກຮູ້ທີ່ໄປທີ່ມາວ່າ ເປັນພິທີກຳກ່ຽວກັບຫຍັງ, ມີປະຫວັດຄວາມເປັນມາແນວໃດ, ພາກສ່ວນໃດເປັນຜູ້ຈັດ ແລະ ໄດ້ຮັບອະນຸຍາດຈາກພາກສ່ວນໃດ?.
ທັງໝົດນີ້ລ້ວນແຕ່ເປັນຄຳຖາມ ທີ່ສັງຄົມພວມຢາກຮູ້ ເຊິ່ງທີມງານຂ່າວໜັງສືພິມລາວພັດທະນາພວມເລັ່ງສອບຖາມຄະນະກຳມະການຈັດງານບຸນ ແລະ ຈັດກິດຈະກຳດັ່ງກ່າວຈະມີການຖະແຫລງຊີ້ແຈງຄືແນວໃດ ຫາກມີລາຍລະອຽດຈະນຳມາສະເໜີໃຫ້ທ່ານໄດ້ຮັບຊາບຕື່ມຄາດວ່າຈະໄດ້ຮັບຄຳຕອບໃນໄວໆນີ້.
