3 ນິໄສປະຈຳວັນທີ່ທ່ານຄວນໃຫ້ຄວາມສຳຄັນ ເພື່ອສ້າງຄວາມສຳເລັດ
ຈອນ ແອດດິສັນ ນັກຂຽນຊື່ດັງດ້ານຄວາມເປັນຜູ້ນຳ ແລະ ປະສົບຄວາມສຳເລັດທາງທຸລະກິດ ເຊື່ອວ່າຊີວິດຄົນເຮົາມີຢູ່ 2 ຢ່າງ ຄື : ການບັນລຸຈຸດໝາຍ ແລະ ການຫາຂໍ້ອ້າງເມື່ອລົ້ມເຫລວ. ສັງຄົມເຮົາກາຍເປັນສັງຄົມມັກສ້າງຂໍ້ອ້າງ ແລະ ຍອມຮັບມັນຢ່າງງ່າຍດາຍ ເຖິງຈະເປັນແນວນັ້ນ ຈອນ ແອດດິສັນ ກໍບໍ່ໄດ້ຢາກປະນາມສັງຄົມ ເພາະທຸກມື້ນີ້ຊີວິດເຮົາກໍເຕັມໄປດ້ວຍເລື່ອງທີ່ຕ້ອງເຮັດໄປໝົດຈົນເກືອບບໍ່ມີເວລາຫາຍໃຈແລ້ວ, ລາວເລົ່າວ່າເຄີຍເຮັດວຽກກັບຄົນຫລວງຫລາຍທີ່ມີຄວາມສາມາດ ແລະ ຫ້າວຫັນ, ແຕ່ຊຳ້ພັດເຮັດວຽກອອກມາໄດ້ບໍ່ດີເທົ່າທີ່ຄວນ ບໍ່ແມ່ນວ່າພວກເຂົາບໍ່ພະຍາຍາມດອກ ແຕ່ພວກເຂົາຂາດນິໄສທີ່ດີຕ່າງຫາກ.
ລັກສະນະນິໄສສາມາດກຳນົດເສັ້ນທາງຊີວິດທ່ານໄດ້ ດັ່ງນັ້ນ ຈຶ່ງບໍ່ຕ້ອງແປກໃຈເມື່ອພົບວ່າບຸກຄົນທີ່ປະສົບຄວາມສຳເລັດລ້ວນມີນິໄສເອື້ອອຳນວຍຕໍ່ຄວາມສຳເລັດໄປນຳ. ແອດດິສັນ ໄດ້ຝຶກນິໄສຢູ່ 3 ຂໍ້ຈາກການເຮັດທຸລະກິດຫລາຍກ່ວາ 30 ປີ ເປັນ 3 ຂໍ້ທີ່ມີບົດບາດສູງຫລາຍຕໍ່ຄວາມສຳເລັດໃນຊີວິດຂອງລາວ ແລະ ມັນອາດເປັນປະໂຫຍດກັບທ່ານເຊັ່ນກັນ.
- ຜູ້ຊະນະແມ່ນຜູ້ຕື່ນເຊົ້າ : ຕາຕະລາງການເຮັດວຽກທີ່ມີການໂຍະຍານຖືເປັນກະແສຂອງໂລກທຸລະກິດໃນຕອນນີ້ກໍແມ່ນ, ແຕ່ໃນຂະນະທີ່ທ່ານນອນຫລັບຢູ່ນັ້ນ ຄົນອື່ນໆກຳລັງເຮັດວຽກຢູ່ ແລະ ຜູ້ບໍລິຫານລະດັບສູງສ່ວນຫລາຍຄົງບໍ່ຕື່ນຕອນທ່ຽງ ແລະ ເຂົ້າໄປໃນຫ້ອງການຕອນບ່າຍໆແນ່ນອນ, ແຕ່ພວກເຂົາຈະຕື່ນເຊົ້າເຂົ້າສູ່ມື້ໃໝ່ຢ່າງຫ້າວຫັນ ຈົນຫລາຍບົດສຳພາດພົບວ່າພວກເຂົາຕື່ນຕັ້ງແຕ່ປະມານ 5:00 ໂມງເຊົ້າ ຫລື 6:00 ໂມງເຊົ້າ ແລະ ໃຊ້ເວລາ 2 – 3 ຊົ່ວໂມງກ່ອນໄປເຮັດວຽກໃນການກຽມຄວາມພ້ອມ ເຊັ່ນ : ອອກກຳລັງກາຍ, ເຮັດສະມາທິ, ຕິດຕາມຂ່າວສານໃນແວດວົງທຸລະກິດ ແລະອື່ນໆ ເຊິ່ງເມື່ອຮອດບ່ອນເຮັດວຽກ ພວກເຂົາກໍເຮັດໄດ້ຢ່າງມີປະສິດທິພາບ ແລະ ບັນລຸຜົນຫລາຍກ່ວາຄົນສ່ວນຫລາຍ.
ສຳນວນ “The early bird gets the worm” ຫລື ຄົນຕື່ນເຊົ້າມັກປະສົບຄວາມສຳເລັດ ມີທີ່ມາຈາກບ່ອນນີ້ເອງ ຄົນທີ່ເລີ່ມຕົ້ນໄວແມ່ນຄົນທີ່ຈະໄດ້ຮັບໂອກາດກ່ອນໝູ່ ດັ່ງນັ້ນ ທ່ານຄວນຈະຕື່ນເຊົ້າ ແລະ ໃຊ້ເວລາທີ່ໄດ້ຮັບເພື່ອມາໄລ່ນຳເປົ້າໝາຍຂອງທ່ານ ຄວາມສຳເລັດບໍ່ເຄີຍລໍຖ້າໃຜ.
- ຕັ້ງເປົ້າໝາຍ ແລະ ບັນລຸໃຫ້ໄດ້ໃນທຸກໆມື້ : ການມີເປົ້າໝາຍ ຫລື ຝັນໄກ ບໍ່ແມ່ນສິ່ງທີ່ຜິດ, ແຕ່ຢ່າລືມວ່າສິ່ງທີ່ທ່ານເຮັດໃນມື້ນີ້ສົ່ງຜົນຢ່າງຫລາຍຕໍ່ອະນາຄົດ ມັນອາດຕັດສິນໄດ້ເລີຍວ່າທ່ານຈະບັນລຸເປົ້າໝາຍຫລືບໍ່ ທ່ານຈຶ່ງຕ້ອງຕັ້ງໃຈເຮັດໃຫ້ແຕ່ລະມື້ຂອງທ່ານເກີດຄວາມສຳເລັດ ແລະ ມີຜົນທີ່ໜ້າເພິງພໍໃຈໃຫ້ຫລາຍທີ່ສຸດ ນີ້ບໍ່ໄດ້ໝາຍຄວາມວ່າທ່ານຕ້ອງເຮັດໂຕຄາວຽກຢູ່ໝົດມື້ຢ່າງໄຮ້ຈຸດໝາຍ, ແຕ່ທ່ານຄວນຮູ້ວ່າມີຫຍັງແດ່ທີ່ສຳຄັນຕໍ່ອະນາຄົດທີ່ທ່ານວາດຫວັງໄວ້ ແລະ ຈົດຈໍ່ຕໍ່ສິ່ງເຫລົ່ານັ້ນ. ໃນທຸກໆຄືນ ຫລື ເວລາວ່າງຕອນເຊົ້າຫລັງຕື່ນນອນ ແລະ ກຳລັງກຽມພ້ອມສຳລັບມື້ໃໝ່ໃຫ້ຕັ້ງເປົ້າໝາຍສຳລັບມື້ນັ້ນໄດ້ເລີຍ ຢ່າເມົາແຕ່ຕັ້ງເປົ້າໝາຍເຜື່ອໄວ້ເປັນອາທິດ ພຽງແຕ່ສຳລັບມື້ຕໍ່ໄປກໍພໍ ໃຫ້ຖາມໂຕເອງວ່າຕ້ອງເຮັດຫຍັງແດ່ເພື່ອໃຫ້ບັນລຸຜົນຫລາຍທີ່ສຸດ ແລະ ຕັ້ງໃຈເຮັດແຕ່ສິ່ງເຫລົ່ານັ້ນໃຫ້ເປັນນິໄສ.
- ຈົດຈໍ່ໄປໃສ່ສິ່ງທີ່ສຳຄັນທີ່ສຸດ : ຫາກທ່ານບໍ່ໃຫ້ຄວາມສຳຄັນກັບເປົ້າໝາຍຂອງທ່ານຢ່າງເຕັມທີ່ ຄວາມສຳເລັດກໍບໍ່ອາດເກີດໄດ້. ຄົນທີ່ປະສົບຄວາມສຳເລັດຈະຮູ້ຢູ່ສະເໝີວ່າອັນໃດແມ່ນສິ່ງທີ່ສຳຄັນໃນເວລານັ້ນ ແລະ ຈະປະຕິບັດສິ່ງນັ້ນຢ່າງຕັ້ງໃຈ ໂດຍບໍ່ເສຍສະມາທິກັບຢ່າງອື່ນ, ພວກເຂົາສາມາດຈົດຈໍ່ໃນວຽກໂຕເອງໃນຂະນະທີ່ຄົນອ້ອມຂ້າງວຸ້ນວາຍໄດ້ ເຊິ່ງບໍ່ງ່າຍເລີຍ ຍິ່ງຖ້າທ່ານໄດ້ເລື່ອນຕຳແໜ່ງ ຄົນອື່ນກໍເລີ່ມຢາກຮຽກຮ້ອງຄວາມສົນໃຈຈາກທ່ານຫລາຍຂຶ້ນ.
ຫາກຢາກປະສົບຄວາມສຳເລັດ ທ່ານກໍຕ້ອງສ້າງວິໄນບໍ່ໃຫ້ເສຍສະມາທິຈາກສິ່ງທີ່ເຮັດໃຫ້ເກີດຜົນຕາມທີ່ຫວັງ ເຖິງວ່າການສ້າງວິໄນຕ້ອງອາໄສໄລຍະເວລາອ່າວດົນ ແຕ່ຜົນຕອບແທນທີ່ທ່ານຈະໄດ້ຮັບຍ່ອມກຸ້ມຄ່າກັບຄວາມພະຍາຍາມທີ່ທຸ້ມເທໄປແນ່ນອນ. ບາງເທື່ອໄຊຊະນະ ແລະ ຄວາມສຳເລັດເປັນສິ່ງໜ້າເບື່ອ ເພາະມັນແມ່ນການເຮັດສິ່ງເກົ່າໆທີ່ຕ້ອງເຮັດຊຳ້ໆ ຊຳ້ແລ້ວຊຳ້ອີກ, ແຕ່ສິ່ງເຫລົ່ານີ້ຈະຄ່ອຍໆສະສົມຈົນເກີດເປັນນິໄສ ເຮັດໃຫ້ທ່ານເຮັດວຽກໄດ້ຢ່າງມີປະສິດທິພາບ ແລະ ນຳໄປສູ່ສິ່ງສຳຄັນຄືຜົນຕອບແທນໃນທ້າຍທີ່ສຸດ.
