ສຳເລັດ ກອງປະຊຸມ ຜູ້ບັນຊາການທະຫານອາກາດ ອາຊຽນ ຄັ້ງທີ 19 ທີ່ ສປປ ລາວ ເປັນເຈົ້າພາບ
November 5, 2022 - 2:40 PM
ວັນທີ 4 ພະຈິກ 2022 ຜ່ານມາ, ກອງປະຊຸມ ຜູ້ບັນຊາການທະຫານອາກາດ ອາຊຽນ ຄັ້ງທີ 19 ທີ່ ສປປ ລາວ ເປັນເຈົ້າພາບ ໄດ້ປິດລົງດ້ວຍຜົນສຳເລັດ ກອງປະຊຸມຄັ້ງນີ້ຈັດຂຶ້ນທີ່ແຂວງຫລວງພະບາງພາຍໃຕ້ການເປັນປະທານ ຂອງ ທ່ານ ພົນຈັດຕະວາ ຄໍາເຫຼັກ ແສງພະຈັນ ຜູ້ບັນຊາການ ທະຫານອາກາດ ກອງທັບປະຊາຊົນລາວ ໃນນາມປະທານກອງປະຊຸມ ຜູ້ບັນຊາການທະຫານອາກາດອາຊຽນ ຄັ້ງທີ 19 ມີ ບັນດາ ຜູ້ບັນຊາການທະຫານອາກາດ 10 ປະເທດ ອາຊຽນ, ຄະນະທີ່ປຶກສາທູດທະຫານປະເທດອາຊຽນ, ຄະນະນາຍທະຫານອາກາດ ທີ່ມາຈາກປະເທດ ອາຊຽນ ເຂົ້າຮ່ວມ.
ກອງປະຊຸມຜູ້ບັນຊາການທະຫານອາກາດ ຄັ້ງທີ 19 ດຳເນີນພາຍໃຕ້ຫົວຂໍ້ “ອາຊຽນ ຮ່ວມກັນເພື່ອສັນຕິພາບ ແລະ ສະຖຽນລະພາບ” (ASEAN Together for Peace and Stability)ຈຸດປະສົງຫຼັກຂອງກອງປະຊຸມ ແມ່ນເປັນການສ້າງສາຍ ພົວພັນ, ເສີມຂະຫຍາຍຄວາມເຂົ້າອົກເຂົ້າໃຈເຊິ່ງກັນ ແລະ ກັນ, ເສີມສ້າງສິດຜົນປະໂຫຍດຮ່ວມກັນ ລົງເລິກໃນການຮ່ວມມື ທາງດ້ານຄວາມໝັ້ນຄົງ, ຄວາມສະຫງົບ ແລະ ຄວາມປອດໄພໃນພາກ ພື້ນ, ກອງປະຊຸມຄັ້ງນີ້ ບັນດາຜູ້ບັນຊາການທະຫານອາກາດອາຊຽນ ໄດ້ແລກປ່ຽນທັດສະນະ, ບົດ ຮຽນ ແລະ ປະສົບການ ໃນຫົວຂໍ້ “ຮ່ວມມືກັນເພື່ອສັນຕິພາບ ແລະ ຄວາມໝັ້ນຄົງຂອງ ອາຊຽນ”. ແລະ ໄດ້ປິດລົງດ້ວຍໝາກຜົນສໍາເລັດຢ່າງຈົບງາມ ມັນສະແດງອອກ ເຊັ່ນ: ຄະນະຜູ້ແທນເຂົ້າຮ່ວມກອງປະຊຸມ ທັງໝົດແມ່ນມາຈາກ 10 ປະເທດອາຊ່ຽນ ໂດຍມີຜູ້ ບັນຊາການທະຫານອາກາດ 10 ທ່ານ ພ້ອມພັນລະຍາ, ຄະນະນາຍທະຫານອາກາດ ມາຈາກປະເທດ ອາຊຽນ 40 ທ່ານ, ຄະນະທີ່ປຶກສາທູດທະຫານປະເທດອາຊຽນ, ແລະ ມາຈາກສະຖານທູດ ປະເທດອາຊຽນ ປະຈຳ ສປປ ລາວ . ກອງປະຊຸມໄດ້ດໍາເນີນເປັນເວລາໜຶ່ງວັນ, ມີບັນຍາກາດ ແລະ ມີ ເນື້ອໃນອຸດົມສົມບູນຄົບຖ້ວນ ກົງໄປກົງມາ ແລະ ສ້າງສັນ ມີຄວາມເຂົ້າອົກເຂົ້າໃຈເຊິ່ງກັນ ແລະ ກັນ ເປັນຢ່າງດີ. ນອກຈາກນີ້, ກອງປະຊຸມຍັງໄດ້ແລກປ່ຽນຄໍາຄິດເຫັນກ່ຽວກັບບັນຫາຄວາມໝັ້ນ ຄົງຂອງພາກພື້ນ, ລວມທັງບົດຮຽນ ແລະ ປະສົບການ ຂອງທະຫານອາກາດບັນດາປະເທດ ສະມາຊິກອາຊຽນ ໃນການຮັບມືກັບບັນດາສິ່ງທ້າທາຍ ເພື່ອສົ່ງເສີມສັນຕິພາບ ແລະ ຄວາມໝັ້ນຄົງ ຂອງພາກພື້ນ.
ທ່ານ ພົນຈັດຕະວາ ຄໍາເຫຼັກ ແສງພະຈັນ ຜູ້ບັນຊາການ ທະຫານອາກາດ ກອງທັບປະຊາຊົນລາວ ໄດ້ຖະແຫລງວ່າ: ກອງປະຊຸມ ຜູ້ບັນຊາການທະຫານອາກາດ ອາຊຽນ ໄດ້ຈັດຕັ້ງຂຶ້ນຄັ້ງທໍາອິດ ໃນປີ2004 ໂດຍການເປັນປະທານຂອງ ກອງທັບອາກາດ ຣາຊາ ອານາຈັກໄທ, ເປັນກອງປະຊຸມທີ່ໄດ້ຈັດຕັ້ງ ພັດປ່ຽນກັນເປັນເຈົ້າພາບ ໃນແຕ່ລະປີດ້ວຍຄວາມສະໝັກໃຈ, ກອງປະຊຸມຜູ້ບັນຊາການທະຫານອາກາດຄັ້ງນີ້ ເປັນຄັ້ງທີ 19 ແລະ ກໍເປັນຄັ້ງທີສອງ ທີ່ ທະຫານອາກາດ ກອງທັບປະຊາຊົນລາວ ເປັນເຈົ້າພາບ.ສຳລັບ ປີນີ້ລັດຖະບານແມ່ນເຫັນໄດ້ ຄວາມສໍາຄັນ ໃນການພົວພັນສາກົນ ໂດຍສະເພາະແມ່ນ ການຮັດແໜ້ນການພົວພັນຮ່ວມມື, ແລກ ປ່ຽນບົດຮຽນ, ຄວາມຮູ້ຄວາມສາມາດລະຫວ່າງບັນດາປະເທດສະມາຊິກອາຊຽນດ້ວຍກັນ ພ້ອມທັງເປັນການສົ່ງເສີມພັດທະນາ ການທ່ອງທ່ຽວວັດທະນາທໍາລາວ ຈຶ່ງໄດ້ຈັດ ກອງປະຊຸມ ຢູ່ທີ່ນະຄອນຫຼວງພະບາງ.
ຕາງໜ້າໃຫ້ແກ່ ນາຍ ແລະ ພົນທະຫານ ອາກາດ ກອງທັບປະຊາຊົນລາວ ແລະ ຜູ້ແທນກອງປະຊຸມຜູ້ບັນຊາການທະຫານອາກາດ ອາຊຽນຄັ້ງທີ 19 ຂໍສະແດງຄວາມຂອບໃຈ ມາຍັງອົງການຈັດຕັ້ງທຸກຂັ້ນ ທີ່ໄດ້ໃຫ້ຄວາມສໍາຄັນ, ຊີ້ນໍາ ໃກ້ຊິດຕິດແທດ ແລະ ອໍານວຍຄວາມ ສະດວກ ສະໜັບສະໜູນໃຫ້ແກ່ການກະກຽມ ແລະ ດໍາເນີນກອງປະຊຸມສໍາເລັດດ້ວຍຫມາກຜົນ ອັນຈົບງາມ, ຂໍສະແດງຄວາມຂອບໃຈ ມາຍັງອໍານາດການປົກຄອງທ້ອງຖິ່ນ, ບໍລິສັດຫ້າງ ຮ້ານ ແລະ ພໍ່ແມ່ປະຊາຊົນ ໂດຍສະເພາະແມ່ນບຸກຄະລະກອນຮັບໃຊ້ກອງປະຊຸມທຸກພາກສ່ວນທີ່ ໄດ້ປະກອບສ່ວນເຮັດໃຫ້ ກອງປະຊຸມຄັ້ງນີ້ສໍາເລັດໄປດ້ວຍດີ.
