ນາຍົກຈີນເນັ້ນໜັກໃຫ້ລົງເລິກການຮ່ວມມືຈີນ-ເຢຍລະມັນ ແລະ ບັນລຸໃຫ້ຕ່າງຝ່າຍຕ່າງໄດ້ຮັບຜົນປະໂຫຍດໃນຂະບວນການເປີດປະຕູສູ່ພາຍນອກ

ທ່ານ ຫຼີເຄີ້ສຽງ ໄດ້ສະແດງຄວາມຍິນດີຕ້ອນຮັບທ່ານ ໂອລັຟ ໂຊນສ ທີ່ໄດ້ເດີນທາງມາຢ້ຽມຢາມຈີນ, ທ່ານກ່າວວ່າ: ຈີນ ແລະ ເຢຍລະມັນ ລ້ວນແຕ່ແມ່ນກຸ່ມເສດຖະກິດຕົ້ນຕໍຂອງໂລກ, ການໄປມາຫາສູ່ກັນນັບມື້ນັບຫຼາຍກວ່າເກົ່າ, ການຮ່ວມມືຕົວຈິງໄດ້ຂະຫຍາຍຕົວຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ. ຈີນໃຫ້ຄວາມສຳຄັນໃນລະດັບສູງຕໍ່ການພົວພັນລະຫວ່າງຈີນ-ເຢຍລະມັນ, ທ່ານ ສີຈິ້ນຜິງ ປະທານປະເທດຈີນ ໄດ້ແລກປ່ຽນຄວາມຄິດຄວາມເຫັນຢ່າງເລິກເຊິ່ງກັບທ່ານໂອລັຟ ໂຊນສ. ວ່າ: ພວກເຮົາຍິນດີຮ່ວມກັນກັບເຢຍລະມັນ, ບົນພື້ນຖານທີ່ເຄົາລົບນັບຖືເຊິ່ງກັນ ແລະ ກັນ, ຕ່າງຝ່າຍຕ່າງມີຜົນປະໂຫຍດ, ສືບຕໍ່ຊຸກຍູ້ໃຫ້ການພົວພັນລະຫວ່າງ ຈີນ-ເຢຍລະມັນ ໄດ້ຮັບການພັດທະນາໄປໜ້າຢ່າງປອດໃສ ແລະ ໝັ້ນທ່ຽງ, ທຸ່ປະກອບສ່ວນເຂົ້າໃນການເຮັດໃຫ້ການພົວພັນສາກົນມີສະຖຽນລະພາບຫຼາຍກວ່າເກົ່າ, ເພີ່ມພະລັງແຮງຂັບເຄື່ອນຫຼາຍກວ່າເກົ່າເພື່ອຊຸກຍູ້ການພັດທະນາເສດຖະກິດໂລກ, ປົກປັກຮັກສາສັນຕິພາບ ແລະ ສະຖຽນລະພາບຂອງພາກພື້ນກໍຄືຂອງໂລກໃຫ້ດີກວ່າເກົ່າ. ຈີນຈະເດີນຕາມເສັ້ນທາງການພັດທະນາໂດຍສັນຕິ, ຍຶດໝັ້ນນະໂຍບາຍພື້ນຖານແຫ່ງຊາດໃນການປະຕິຮູບ ແລະ ເປີດປະຕູສູ່ພາຍນອກຢ່າງໝັ້ນໜຽວບໍ່ປ່ຽນແປງ, ເດັດດ່ຽວປະຕິບັດຕາມຍຸດທະສາດການເປີດປະຕູສູ່ພາຍນອກທີ່ຕ່າງຝ່າຍຕ່າງມີຜົນປະໂຫຍດ, ປະຕູແຫ່ງການເປີດກວ້າງມີແຕ່ຈະນັບມື້ນັບກວ້າງອອກເທົ່ານັ້ນ.

ທ່ານ ໂອລັຟ ໂຊນສ ກ່າວວ່າ, ໃນຮອບ 50 ປີທີ່ ຈີນ-ເຢຍລະມັນ ໄດ້ສ້າງຕັ້ງສາຍພົວພັນທາງການທູດມານີ້, ການຮ່ວມມືລະຫວ່າງສອງປະເທດໃນດ້ານການເມືອງ, ເສດຖະກິດການຄ້າ ແລະ ຂົງເຂດອື່ນໆໄດ້ຮັບຜົນສຳເລັດຢ່າງອຸດົມສົມບູນ ເຢຍລະມັນບໍ່ເຫັນດີໃນ “ການຕັດສາຍພົວພັນກັນ”, ຫວັງວ່າຈະຊຸກຍູ້ໃຫ້ການພົວພັນລະຫວ່າງເຢຍລະມັນ-ຈີນ ໄດ້ຮັບການຂະຫຍາຍຕົວຕື່ມອີກ.