ນາຍົກລັດຖະມົນຕີ ສປປ ລາວ ຕ້ອນຮັບຄະນະຜູ້ແທນຫວຽດນາມເຂົ້າຢ້ຽມຂ່ຳນັບ ເພື່ອຮັດແໜ້ນສາຍພົວພັນຮ່ວມມື ລາວ-ຫວຽດນາມ

ວັນທີ 4 ພະຈິກ 2022 ນີ້, ທ່ານ ພັນຄໍາ ວິພາວັນ ນາຍົກລັດຖະມົນຕີແຫ່ງ ສປປ ລາວ, ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ ພົ.ວ ຮວິ່ງ ດັກເຮືອງ ຫົວໜ້າຄະນະປະສານງານທົ່ວປະເທດ ອະດີດທະຫານອາສາສະໝັກ ຫວຽດນາມ ແລະ ຊ່ຽວຊານທະຫານຫວຽດນາມ ທີ່ມາຊ່ວຍການປະຕິວັດລາວ ພ້ອມດ້ວຍຄະນະ ໂອກາດທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.

ໂອກາດນີ້, ທ່ານ ນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາ ສູງຕໍ່ ທ່ານ ພົ.ວ ຮວິ່ງ ດັກເຮືອງ ພ້ອມຄະນະ ທີ່ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນຄັ້ງນີ້ ຊຶ່ງເປັນການປະກອບສ່ວນສໍາຄັນເຂົ້າໃນການສະເຫລີມມສະຫລອງ ປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ, ທັງເປັນການຮັດແໜ້ນການພົວພັນຮ່ວມມືໃນທຸກຂົງເຂດວຽກງານ ໂດຍສະເພາະ ການຮ່ວມມືໃນຂົງເຂດວຽກງານສະຫະພັນນັກຮົບເກົ່າ ລາວ ແລະ ຫວຽດນາມ ໃຫ້ໄດ້ຮັບການພັດທະນາ ແລະ ສືບຕໍ່ໃຫ້ການຊ່ວຍເຫລືອ ​ຊຶ່ງກັນ ແລະ ກັນຕະຫລອດໄປ. ພ້ອມນັ້ນ ທ່ານນາຍົກ ລັດຖະມົນຕີ ຍັງໄດ້ສະແດງຄວາມຂອບໃຈຕໍ່ລັດຖະບານ ກໍຄື ປະຊາຊົນຫວຽດນາມ ທີ່ຍາມໃດກໍໄດ້ໃຫ້ ການຊ່ວຍ ເຫລືອແກ່ ສປປ ລາວ ມາໂດຍຕະຫລອດ, ທັງສະແດງຄວາມຫວັງວ່າ ການພົວພັນຮ່ວມມືລະຫວ່າງ ສອງປະເທດ ທີ່ມີມາແຕ່ດົນນານແລ້ວນັ້ນ ຈະໄດ້ຮັບການພັດທະນາຂຶ້ນໄປຢ່າງ​ບໍ່​ຢຸດ​ຢັ້ງ.

​

ໂອກາດ​ດຽວ​ກັນ, ທ່ານ ພົ.ວ ຮວິ່ງ ດັກເຮືອງ ກໍໄດ້ສະແດງຄວາມຂອບໃຈມາຍັງ ທ່ານ ​ນາຍົກ ທີ່ໄດ້ໃຫ້ກຽດຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງແຈ້ງ​ໃຫ້​ຊາບ​ເຖິງຈຸດປະສົງ ຂອງການເດີນທາງ ມາຢ້ຽມຢາມ ແລະ ເຮັດວຽກ ​ຢູ່ ສປປ ລາວ ​ໃຫ້ທ່ານນາຍົກໄດ້ຮັບຊາບ.

ໃນວັນດຽວກັນ, ທ່ານ ນາຍົກຍົກລັດຖະມົນຕີ ພັນຄໍາ ວິພາວັນ ກໍໄດ້ຕ້ອນຮັບການເຂົ້າຢ້ຽມຂໍ່າ ນັບຂອງທ່ານ ເຈີ່ນ ສີ ແທ່ງ ກໍາມະການສູນກາງພັກ, ຮອງເລຂາຄະນະພັກ, ປະທານຄະນະກໍາມະການ ປະຊາຊົນນະຄອນ ຫລວງຮ່າໂນ້ຍ ສສ ຫວຽດນາມເຊັ່ນກັນ.