ແຈ້ງເກີດເຕັມຕົວ “ ການາໂຊ ” ສ້າງສະຖິຕິນັກເຕະນອກຢູໂຣບ ອາຍຸໜ້ອຍສຸດຍິງປະຕູໄດ້ໃນຢູໂຣບ

ອາເລຮານໂດຣ ການາໂຊ ກອງໜ້າດາວຮຸ່ງຂອງ ແມນເຊສເຕີ ຢູໄນເຕັດ ຈາລຶກສະຖິຕິເປັນນັກເຕະນອກ EU ອາຍຸໜ້ອຍທີ່ສຸດ ຍິງປະຕູໄດ້ໃນບານເຕະລາຍການໃຫຍ່ຂອງຢູໂຣບ ຫລັງຍິງໄດ້ໃນເກມທີ່ເອົາຊະນະ ຣຽວ ໂຊເຊຍດັດ.

ອາເລຮານໂດຣ ການາໂຊ ກອງໜ້າດາວຮຸ່ງຂອງ ແມນເຊສເຕີ ຢູໄນເຕັດ ທີມດັງແຫ່ງ ພຣີເມຍລີກ ອັງກິດ ພາຍໃຕ້ການນຳທີມ ຂອງ ເອຣິກ ເທນ ຮາກ ຜູ້ຈັດການທີມຊາວເນເທີແລນ ຈາລຶກສະຖິຕິເປັນນັກເຕະນອກ EU ອາຍຸໜ້ອຍທີ່ສຸດທີ່ຍິງປະຕູໄດ້ໃນ ບານເຕະລາຍການຂອງຢູໂຣບ ດ້ວຍອາຍຸ 18 ປີ 125 ວັນ ຫລັງຍິງໄດ້ໃນເກມທີ່ເອົາຊະນະ ຣຽວ ໂຊເຊຍດັດ 1-0 ໃນການແຂ່ງຂັນ ຢູຟາ ຢູໂຣປາລີກ 2022-23 ຮອບແບ່ງກຸ່ມ ກຸ່ມ E  ເມື່ອເຊົ້າວັນທີ 4 ທີ່ຜ່ານມາ.

ສຳລັບປະຕູຂອງ ການາໂຊ ເກີດຂຶ້ນໃນນາທີ 17 ຂອງເກມ ຈາກຈັງຫວະທີ່ ຄຣິສຕຽນໂນ ໂຣນັລໂດ ນັກເຕະໂຕແບບຂອງລາວຈ່າຍ ບານທະລຸຂຶ້ນມາ ກ່ອນທີ່ນັກເຕະດາວຮຸ່ງລາຍນີ້ຈະພາບານເຂົ້າໄປຍິງເຂົ້າຢ່າງສຽບຄົມ ສຸດປັນຍາທີ່ ອາເລຮັນໂດຣ ເຣມີໂຣ ຜູ້ຮັກສາປະຕູຄູ່ແຂ່ງຈະປ້ອງກັນໄດ້.

ຜົນການທີ່ ແມນເຊສເຕີ ຢູໄນເຕັດ ເກັບໄຊຊະນະ ເຮັດໃຫ້ມີເພີ່ມເປັນ 15 ຄະແນນ ຈາກ 6 ນັດ ໃນຮອບແບ່ງກຸ່ມ ເທົ່າກັບ ຣຽວ ໂຊເຊຍດັດ ແຕ່ຜົນຕ່າງປະຕູໄດ້ເສຍເປັນຮອງຢູ່ 1 ປະຕູ ຈາກສະຖານະການດັ່ງກ່າວເຮັດໃຫ້ຕ້ອງໄປຫລິ້ນໃນຮອບເພລອອຟ ສ່ວນທາງເຈົ້າຖິ່ນ ລອຍລຳຜ່ານເຂົ້າຮອບນ໊ອກເອົາ.