ນະຄອນຫລວງນິວເດລີປິດໂຮງຮຽນປະຖົມຊົ່ວຄາວ ເຫດວິກິດມົນລະພິດທາງອາກາດ
ເທດສະບານເມືອງຫລວງຂອງອິນເດຍສັ່ງປິດໂຮງຮຽນປະຖົມສຶກສາທຸກແຫ່ງໃນພື້ນທີ່ຊົ່ວຄາວ ເນື່ອງຈາກຄ່າມົນລະພິດທາງອາກາດຍັງເກີນກວ່າມາດຕະຖານ.
ວັນທີ 4 ພະຈິກ 2022, ສຳນັກຂ່າວຕ່າງປະເທດລາຍງານວ່າ: ທ່ານ ອາວິນ ເກວໄຣວັລ ເຈົ້າຄອງນະຄອນຫລວງນິວເດລີ ປະກາດປິດໂຮງຮຽນປະຖົມສຶກສາທຸກແຫ່ງໃນເມືອງຫລວງ “ແບບບໍ່ມີກຳນົດ” ນັບແຕ່ວັນທີ 5 ພະຈິກນີ້ ແລະ ກຽມອອກມາດຕະການຄວບຄຸມການສັນຈອນຂອງຍານພາຫະນະຕາມທ້ອງຖະໜົນ.
ທັງນີ້, ດັດຊະນີຄຸນນະພາບອາກາດ (ເອຄິວໄອ) ຂອງນະຄອນຫລວງນິວເດລີ ຢູ່ລະດັບຫລາຍກວ່າ 450 ໃນຫລາຍເຂດ ນັບແຕ່ວັນທີ 3 ພະຈິກຜ່ານມາ ເຊິ່ງເປັນລະດັບ “ຮ້າຍແຮງ” ແລະ “ເປັນອັນຕະລາຍ” ເຖິງວ່າເທດສະບານນະຄອນຫລວງນິວເດລີມີຄຳສັ່ງໃນຕົ້ນອາທິດນີ້ ໂຈະໂຄງການກໍ່ສ້າງ ແລະ ການຮື້ຖອນທຸກປະເພດກໍຕາມ ແລະ ຂໍການຮ່ວມມືການຫລຸດໃຊ້ຍານພາຫະນະສ່ວນບຸກຄົນ ແລະ ການເຮັດວຽກຢູ່ເຮືອນຖ້າເປັນໄປໄດ້.
ເຖິງວ່າປັດຈຸບັນມີການຕິດຕັ້ງ “ຫໍຄອຍພັດລົມຂະໜາດໃຫຍ່” ໃນນະຄອນຫລວງນິວເດລີ ປະກອບມີພັດລົມຂະໜາດໃຫຍ່ 40 ໜ່ວຍ ສາມາດປ່ອຍອາກາດບໍລິສຸດໄດ້ 1.000 ແມັດກ້ອນຕໍ່ວິນາທີ ແຕ່ລັດສະໝີການເຮັດວຽກຂອງພັດລົມໃຫຍ່ຄວບຄຸມພື້ນທີ່ພຽງ 1 ກິໂລແມັດເທົ່ານັ້ນ.
