ສປປ ລາວ ຖືກຈັດເປັນ 1 ໃນ 25 ປະເທດ ທີ່ມີແຫລ່ງທ່ອງທ່ຽວໜ້າທ່ຽວຊົມ ປີ 2023
ວາລະສານ NATIONAL GEOGRAPHIC ໜຶ່ງໃນວາລະສານກ່ຽວກັບ ວິທະຍາສາດ ແລະ ການສຶກສາທີ່ມີຄົນອ່ານຫລາຍທີ່ສຸດໃນໂລກ ໄດ້ຍົກໃຫ້ ສປປ ລາວ ເປັນ 1 ໃນ 25 ປະເທດທີ່ມີແຫລ່ງທ່ອງທ່ຽວໜ້າທ່ຽວຊົມ ແລະ ບໍ່ຄວນພາດທີ່ຈະເດີນທາງມາທ່ອງທ່ຽວ ໃນປີ 2023 ເຊິ່ງເປັນປະເທດດຽວ ໃນອາຊຽນ ທີ່ຖືກຈັດອັນດັບໃນຄັ້ງນີ້.
ການສ້າງທາງລົດໄຟຄວາມໄວສູງລາວ-ຈີນ ສຳເລັດ ແລະ ເປີດການນຳໃຊ້ຢ່າງເປັນທາງການເມື່ອຕົ້ນປີ 2022 ເປັນອີກໜຶ່ງປັດໄຈຫລັກໆ ທີ່ເຮັດໃຫ້ຕິດອັນດັບ ເພາະມີຄົນຮູ້ຈັກ ສປປ ລາວ ເພີ່ມຫລາຍຂຶ້ນ ແລະ ເຮັດໃຫ້ການເຂົ້າເຖິງແຫລ່ງທ່ອງທ່ຽວໄປໃນເຂດຕ່າງໆໄດ້ສະດວກຂຶ້ນ.
ທາງວາລະສານ NATIONAL GEOGRAPHIC ໄດ້ບັນຍາຍເຖິງ ປະເທດລາວ ວ່າ: “ປະເທດລາວເປັນປະເທດ ທີ່ບໍ່ມີທາງອອກສູ່ທະເລຂອງອາຊີຕາເວັນອອກສຽງໃຕ້, ແຕ່ຊີວິດໝູນວຽນໄປຕາມແມ່ນ້ຳ ທີ່ແລ່ນຕາມລວງຍາວຂອງປະເທດທີ່ມີພູມສັນຖານເປັນພູດອຍ. ພ້ອມມີແມ່ນໍ້າຂອງເປັນແມ່ນໍ້າສຳຄັນ ທີ່ໄຫລຜ່ານທົ່ງນາ ສ້າງທີ່ຢູ່ອາໄສຂອງປາ ແລະ ເຮັດໜ້າທີ່ເປັນເສັ້ນທາງຫລວງ ແລະ ແຫລ່ງນ້ໍາທີ່ສໍາຄັນຂອງປະເທດ”.
“ບ້ານທີ່ຮ່ວມຕົວກັນຢູ່ຕາມແຄມແມ່ນໍ້າ ມັກສາມາດດຶງດູດນັກທ່ອງເຂົ້າມາໄດ້ ພ້ອມຍັງຫວນກັບຄືນໄປເບິ່ງສະຖາປັດຕະຍະກຳອານານິຄົມຝຣັ່ງທີ່ງົດງາມ ທີ່ຍັງຫລົງເຫລືອຢູ່ໃນປະເທດ, ພະລາດຊະວັງເກົ່າ, ວັດວາອາຮາມທີ່ງົດງາມ ແລະ ພູມສັນຖານຄວາມເປັນທຳມະຊາດທີ່ເຮັດໃຫ້ປະເທດລາວມີສະເໜ່ແຕກຕ່າງຈາກເສັ້ນທາງທ່ອງທ່ຽວທົ່ວໄປ”.
ໃນການຈັດອັນດັບຂອງ NATIONAL GEOGRAPHIC ໄດ້ແບ່ງອອກເປັນ 5 ໝວດໝູ່ຄື: ຊຸມຊົນ, ທໍາມະຊາດ, ວັດທະນະທໍາ, ຄອບຄົວ ແລະ ຜະຈົນໄພ ເຊິ່ງ ສປປ ລາວ ເຮົາຖືກຈັດເຂົ້າພາຍໃຕ້ຫົວຂໍ້ ຊຸມຊົນ: ບ່ອນທີ່ມີການອະນຸລັກແຕ່ເປັນປະໂຫຍດຕໍ່ທຸກໆຄົນ ( Community: Where conservation benefits everyone).
ອ່ານເນື້ອໃນເພີ່ມທີ່ລີ້ງ: https://on.natgeo.com/3h6Emvp
