ອັດຕາເງິນເຟີ້ລວມ ເດືອນຕຸລາ 2022 ພຸ່ງ 36,7% ເພີ່ມຈາກ 34,05% ໃນເດືອນກັນຍາ

ອັດຕາເງິນເຟີ້ລວມ ເດືອນຕຸລາ 2022 ທຽບ ປີຕໍ່ປີ ຫຼືທຽບກັບເດືອນດຽວກັນຂອງປີຜ່ານມາ ຍັງມີທ່າອ່ຽງເພີ່ມ ຂຶ້ນຕໍ່ເນື່ອງ ຢູ່ໃນລະດັບ 36,7% (ເດືອນກັນຍາ 2022 ແມ່ນ 34,5). ເນື່ອງຈາກການເພີ່ມສູງຂຶ້ນທຸກໝວດສິນຄ້າ ເປັນຕົ້ນແມ່ນ: ໝວດສະບຽງອາຫານ ແລະເຄື່ອງດື່ມບໍ່ແມ່ນເຫຼົ້າ ເພີ່ມຂຶ້ນ 38,8% ໂດຍມາຈາກການເພີ່ມສູງຂຶ້ນຂອງ ລາຄາເຂົ້າສານ, ຊີ້ນປະເພດຕ່າງໆ ໂດຍສະເພາະແມ່ນຊີ້ນຫມູ, ສັດປີກ, ປາ ແລະອາຫານທະເລ, ໄຂ່, ນ້ໍາມັນພຶດ, ຫມາກໄມ້, ຜັກສົດ ເປັນຕົ້ນ; ໝວດຄົມມະນາຄົມ ແລະຂົນສົ່ງ ເພີ່ມຂຶ້ນ 58,1% ໂດຍສະເພາະລາຄານ້ໍາມັນເຊື້ອໄຟ ເພີ່ມຂຶ້ນເຖີງ 95,0%, ໃນນີ້ ປັບຂຶ້ນ-ລົງ 4 ຄັ້ງ, ແອັດຊັງທໍາມະດາ ປັບຂຶ້ນ 2 ຄັ້ງ, ລົງ 2 ຄັ້ງ, ກາຊວນ ປັບຂຶ້ນ 3 ຄັ້ງ ປັບລົງ 1 ຄັ້ງ, ສະເລ່ຍ ລາຄານ້ໍາມັນແອັດຊັງທໍາມະດາ 20.289 ກີບ/ລີດ, ກາຊວນ 19.983 ກີບ/ລີດ.

ນອກນັ້ນ, ສິນຄ້າອຸປະໂພກ-ບໍລິໂພກອຶ່ນໆ ຍັງມີທ່າອ່ຽງເພີ່ມຂຶ້ນເຊັ່ນດຽວກັນ ເຊັ່ນ: ເຄື່ອງນຸ່ງ ແລະເກີບ, ເຄື່ອງກໍ່ສ້າງ ແລະ ອຸປະກອນສ້ອມແປງເຮືອນ, ເຄື່ອງໃຊ້ໃນເຮືອນ, ອຸປະກອນການແພດ ແລະຢາ.

ປັດໄຈ ແລະສາຍເຫດຂອງອັດຕາເງິນເຟີ້ ເດືອນຕຸລາ 2022 ເພີ່ມສູງຂຶ້ນແມ່ນມາຈາກບາງປັດໄຈດັ່ງນີ້:

+ ປັດໄຈພາຍນອກ: ແມ່ນຍັງສຶບຕໍ່ມາຈາກເດືອນຜ່ານມາ ເຊັ່ນ: ຜົນກະທົບການແຜ່ລະບາດ ຂອງ ໂຄວິດ-19; ສະພາບການຂອງພາກພື້ນ ແລະ ສາກົນ ຍັງສືບຕໍ່ຜັນແປຢ່າງສັບສົນ ເຊິ່ງຈະສົ່ງຜົນກະທົບທາງກົງ ແລະທາງອ້ອມຕໍ່ສະພາບເສດຖະກິດ;

+ ປັດໄຈພາຍໃນ:

– ການອ່ອນຄ່າຂອງເງິນກີບທຽບໃສ່ເງິນຕາຕ່າງປະເທດແມ່ນຍັງອ່ອນຄ່າລົງ ສົ່ງຜົນໃຫ້ລາຄາສິນຄ້າປະເພດນໍາເຂົ້າມີລາຄາສູງຂຶ້ນ;

– ລາຄານ້ໍາມັນເຊື້ອໄຟ ຍັງສືບຕໍ່ມີທ່າອ່ຽງເພີ່ມຂຶ້ນ ສົ່ງຜົນໃຫ້ຕົ້ນທຶນການຜະລິດ ແລະ ການບໍລິການເພີ່ມຂຶ້ນ;

– ປັດໄຈອື່ນໆ ເຊັ່ນ: ການຜະລິດກະສິກໍາ ແມ່ນຢູ່ໃນຊ່ວງລະດູການທີ່ຜົນຜະລິດພົບບັນຫາຈາກໄພທໍາມະຊາດ ແລະ ລາຄາຕົ້ນທຶນຂອງການຜະລິດກໍ່ເພີ່ມຂຶ້ນເຊັ່ນດຽວກັນ ໄດ້ແກ່: ຝຸ່ນວິທະຍາສາດ, ຢາຂ້າສັດຕູພືດ, ແນວພັນ, ຫົວອາຫານສັດ.