ເລັ່ງສົ່ງເສີມການທ່ອງທ່ຽວເພື່ອຄວາມຍືນຍົງຮັ່ງມີຂອງປະເທດ

ໂດຍ: ທິດກໍ່າ

ດັ່ງທີ່ເຫັນນຳກັນມາແລ້ວວ່າ: ພາຍຫລັງພັກ ແລະ ລັດຖະບານເຮົາໄດ້ເປີດປະເທດມາແຕ່ກາງເດືອນພຶດສະພາ 2022 ເປັນຕົ້ນມາ ເຫັນວ່າຂະແໜງການທ່ອງທ່ຽວກໍເລີ່ມມີບັນຍາກາດໃໝ່ ແລະ ຄຶກຄັກ. ບັນດານັກທ່ອງທ່ຽວທີ່ໄດ້ເຂົ້າມາທ່ຽວລາວສ່ວນຫລາຍກໍແມ່ນພີ່ນ້ອງຊາວໄທທີ່ເປັນເພື່ອນບ້ານໃກ້ຄຽງທີ່ມີຊາຍແດນຕິດຈອດກັນແຕ່ເໜືອສຸດໃຕ້.

ນອກຈາກມີນັກທ່ອງທ່ຽວຈາກປະເທດໄທແລ້ວ ກໍມີຫລາຍໆປະເທດຈາກອາຊີ-ເອີຣົບໄດ້ເລີ່ມທະຍອຍເຂົ້າມານັບມື້ຫລາຍຂຶ້ນ. ຄາດວ່ານັບຈາກນີ້ໄປ ຖ້າບໍ່ມີໂຣຄາພະຍາດ, ໂຣກລະບາດ, ໄພທຳມະຊາດ ຕະຫລອດເສິກສົງຄາມບໍ່ມາບຸກລຸກຮາວີ ປະເທດຂາດຂອງພວກເຮົາກໍຈະມີການພັດທະນາຢ່າງວ່ອງໄວກ້າວກະໂດດຂັ້ນ ແລະ ເສດຖະກິດການເງິນກໍຈະຄ່ອຍໆດີຂຶ້ນເປັນລຳດັບ.

ສິ່ງທີ່ປະເສີດເລີດລ້ຳທີ່ຈະອຳນວຍຄວາມສະດວກໃຫ້ແກ່ການສ້າງສາພັດທະນາປະເທດຊາດບ້ານເມືອງເຮົານັ້ນຄືມີທຳມະຊາດອັນຂຽວສົດງົດງາມ ແລະ ອຸດົມສົມບູນໄປດ້ວຍຊັບພະຍາກອນທຳມະຊາດ, ມີຊັບໃນດິນສິນໃນນ້ຳ, ມີພູຜາປ່າໄມ້, ແມ່ນ້ຳລຳເຊ, ມີຮ່ອມຫ້ວຍພູເຂົາ, ມີພື້ນຖານສິລະປະວັດທະນະທຳ, ສິລະປະວັນນະຄະດີຮີດຄອງປະເພນີທີ່ເປັນເອກະລັກສະເພາະ ເຊິ່ງເປັນອະລິຍະທຳທີ່ມີຊື່ສຽງມາແຕ່ຍຸກລ້ານຊ້າງ.

ຈາກວາລະສານຊື່ດັງຂອງໂລກ (National Geographic) ໄດ້ຈັດອັນດັບ Top 25 ຈຸດໝາຍປາຍທາງຂອງການທ່ອງທ່ຽວ ສປປ ລາວ ເປັນພຽງຊາດດຽວໃນອາຊຽນທີ່ຕິດອັນດັບຈຸດໝາຍປາຍທາງຂອງການທ່ອງທ່ຽວທີ່ຄວນໄປສຳຜັດໃນປີ 2023 ເຊິ່ງການຈັດອັນດັບໄດ້ແບ່ງອອກເປັນ 5 ປະເພດ ປະກອບມີ ຊຸມຊົນ, ທຳມະຊາດ, ວັດທະນະທຳ, ຄອບຄົວ ແລະ ການພະຈົນໄພ.
ຈາກສາເຫດດັ່ງກ່າວ ຈຶ່ງເປັນການສ້າງເງື່ອນໄຂໃຫ້ປະເທດຊາດຂອງພວກເຮົາມີຄວາມສາດເລັ່ງລັດພັດທະນາການທ່ອງທ່ຽວໃຫ້ເຕີບໃຫຍ່ເຂັ້ມແຂງ ແລະ ຈະເລີນກ້າວໜ້າໃນປັດຈຸບັນ ແລະ ອະນາຄົດ ເຊິ່ງເປັນໜຶ່ງໃນບັນດາປັດໄຈທີ່ຈະເຮັດໃຫ້ ສປປ ລາວ ພວກເຮົາຈະເລີນກ້າວໜ້າໄປໄກນັ້ນ ກໍຄືອຸດສາຫະກຳການທ່ອງທ່ຽວ ເພາະຂະແໜງການນີ້ຈະນຳເອົາເມັດເງິນຢ່າງມະຫາສານມາຟື້ນຟູເສດຖະກິດຂອງຊາດ.

ໃນສອງສາມປີຜ່ານມາ, ປະເທດຊາດຂອງພວກເຮົາໄດ້ຮັບຜົນກະທົບຈາກໂຄວິດ-19 ຈົນເຮັດໃຫ້ຂະແໜງການທ່ອງທ່ຽວຕ້ອງປະສົບບັນຫາຢ່າງໃຫຍ່ຫລວງ ເປັນຕົ້ນແຫລ່ງທ່ອງທ່ຽວຖືກປິດບໍລິການ, ໂຮງແຮມ, ຮ້ານອາຫານຖືກປິດປະຕູ ແລະ ບັນຫາອື່ນໆກໍມີຜົນກະທົບໄປຕາມໆກັນ. ພາຍຫລັງການແພ່ລະບາດພະຍາດໂຄວິດ-19 ໄດ້ຜ່ອນຄາຍລົງ ສປປ ລາວ ຂອງພວກເຮົາຍັງໄດ້ພົບກັບບັນຫາເງິນເຟີ້, ນ້ຳມັນແພງ, ສິນຄ້າຖີບຕົວຂຶ້ນສູງຈົນມາຮອດໄລຍະປັດຈຸບັນ.

ເຖິງຢ່າງໃດກໍຕາມ, ມາຮອດໄລຍະນີ້ ສະພາບຫລາຍຢ່າງໄດ້ເລີ່ມມີຄວາມສະຫງົບ ແລະ ໄດ້ຮັບການແກ້ໄຂຢ່າງຈິງຈັງຈາກລັດຖະບານເຮົາຢ່າງເຕັມທີ່. ຄາດວ່າຕໍ່ໄປ ຂະແໜງການທ່ອງທ່ຽວຂອງລາວເຮົາຈະຕ້ອງຫວນຄືນມາມີປັດໄຈໃໝ່ ຖ້າພວກເຮົາພ້ອມກັນເລັ່ງລັດພັດທະນາ.