ນາຍົກລັດຖະມົນຕີ ສປປ ລາວ ສົ່ງສານສະແດງຄວາມເຫັນໃຈ ເຖິງທ່ານ ນາເຣັນດຣາ ໂມດີ ນາຍົກລັດຖະມົນຕີ ອິນເດຍ
November 3, 2022 - 12:46 PM
ວັນທີ 2 ພະຈິກ 2022 ນີ້, ທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສາທາ ລະນະລັດ ປະຊາທິປະໄຕ ປະຊາຊົນລາວ ໄດ້ສົ່ງສານສະແດງຄວາມເຫັນໃຈ ເຖິງທ່ານ ນາເຣັນດຣາ ໂມດີ ນາຍົກລັດຖະມົນຕີ ແຫ່ງ ສາທາ ລະນະລັດ ອິນເດຍ ຕໍ່ເຫດການອຸບັດເຫດຂົວຫັກ ໃນລັດຄຸສຈາຣາດ ຢູ່ທາງຕາເວັນຕົກຂອງອິນເດຍ ອັນໄດ້ເຮັດໃຫ້ປະຊາຊົນເສຍຊີວິດ ແລະ ບາດເຈັບ ເປັນຈຳນວນຫລາຍ ເຊິ່ງເນື້ອໃນສານລະບຸໄວ້ວ່າ:
ຂ້າພະເຈົ້າ ໄດ້ຮັບຂ່າວດ້ວຍຄວາມເສົ້າສະຫລົດໃຈຕໍ່ເຫດການອຸບັດເຫດຂົວຫັກ ໃນລັດຄຸສຈາຣາດ ຢູ່ທາງຕາເວັນຕົກຂອງອິນເດຍ ໃນວັນທີ 30 ຕຸລາ 2022 ຜ່ານມາ, ອັນໄດ້ເຮັດໃຫ້ປະຊາຊົນເສຍຊີວິດ ແລະ ບາດເຈັບ ເປັນຈຳນວນຫລາຍ. ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເຫັນໃຈ ແລະ ເສົ້າສະຫລົດໃຈຢ່າງສຸດຊຶ້ງ ມາຍັງ ພະນະທ່ານ ແລະ ໂດຍຜ່ານ ພະນະທ່ານ ໄປຍັງລັດຖະບານ ແລະ ປະ ຊາຊົນ ອິນເດຍ ໂດຍສະເພາະ ຕໍ່ຄອບຄົວຂອງຜູ້ທີ່ໄດ້ຮັບເຄາະຮ້າຍຈາກອຸບັດເຫດໃນຄັ້ງນີ້.
ຂ້າພະເຈົ້າ ເຊື່ອໝັ້ນວ່າ ດ້ວຍຄວາມເອົາໃຈໃສ່ຂອງ ລັດຖະບານ, ປະຊາຊົນອິນເດຍ ຈະສາມາດຜ່ານຜ່າຊ່ວງເວລາອັນເສົ້າສະຫລົດໃຈນີ້ໂດຍໄວ.
ໃນໂອກາດດຽວກັນ, ທ່ານສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ກໍໄດ້ສົ່ງສານສະແດງຄວາມເຫັນໃຈ ເຖິງທ່ານ ດຣ. ສຸບຣາມານຽມ ໃຈຊັງເກີລັດຖະ ມົນຕີກະຊວງການຕ່າງປະເທດແຫ່ງ ສາທາລະນະລັດ ອິນເດຍ ເຊັ່ນດຽວກັນ.
