ພະນັກງານລັດເຮັດຈິງ ເສຍສະລະແທ້ ຄວາມທຸກຍາກຂອງປະຊາຊົນຈຶ່ງແກ້ໄຂໄດ້
ເສດຖະກິດ-ສັງຄົມ ໄດ້ຮັບການພັດທະນາໄປຕາມຍຸກສະໄໝ ສະພາບຈຸດພິເສດ ແລະ ເງື່ອນໄຂຕົວຈິງຊຶ່ງເປັນສ່ວນສຳຄັນຕໍ່ການຫລຸດຜ່ອນຄວາມທຸກຍາກ ເປັນຂັ້ນໄດກ້າວຂຶ້ນສູ່ການລຶບລ້າງຄວາມທຸກຍາກຢູ່ປະເທດເຮົາສຳເລັດໂດຍພື້ນຖານ ຊຶ່ງຜ່ານມາ, ພັກ-ລັດ ໄດ້ສຸມທຸກຄວາມພະຍາຍາມແກ້ໄຂໂດຍການເອົາຄວາມທຸກຍາກຂອງປະຊາຊົນສອດຫ້ອຍຢູ່ນຳທຸກວຽກ ແລະ ເຮັດຢ່າງມີການຈັດຕັ້ງເປັນລະບົບຄັກແນ່ສົ່ງຜົນເຮັດໃຫ້ຄວາມທຸກຍາກຂອງປະຊາຊົນນັບມື້ຫລຸດລົງຢ່າງຈະແຈ້ງ.
“ຈົ່ງອາຍ ຈົ່ງຊັງຄວາມທຸກ” ວະລີນີ້ຍັງຄົງຕິດຫູຜູ້ຂຽນມາຈົນເຖິງທຸກມື້ນີ້ ແລະ ກາຍເປັນພະລັງໃຈ ພະ ລັງກາຍໃຫ້ແກ່ປະຊາຊົນທີ່ຫາເຊົ້າກິນຄໍ່າ ຫລື ຜູ້ບໍ່ມີທາງອອກສ້າງເນື້ອສ້າງໂຕໄດ້ເປັນຢ່າງດີທີ່ສຸດ ໝາຍວ່າ ເມື່ອໃດເຮົາອາຍ ແລະ ຊັງຄວາມທຸກຍາກ ເຮົາກໍມີແຮງສູ້ເມື່ອນັ້ນຄື ເປັນເຈົ້າການຊອກຫາວິທີ ແລະ ລົງມືປະຕິບັດຢ່າງເຂັ້ມແຂງ, ບໍ່ຢຸດຄວາມພະຍາຍາມ, ອົດທົນ, ປະຢັດ, ກ້າຮັບ ແລະ ເຮັດຕາມບົດຮຽນທີ່ເປັນວິທະຍາສາດໂດຍສະເພາະການສົມທົບທ່າແຮງພື້ນຖານ, ການປູກການລ້ຽງ ກໍນໍາໃຊ້ເຕັກນິກໃໝ່ວິທະຍາສາດທີ່ກ້າວໜ້າ ລວມທັງອາຊີບອື່ນໆທີ່ຕ້ອງອາໄສຄວາມພາກພຽນພະຍາຍາມ ເຮັດຫລາຍຫລົບຫລາຍຕ່າວ, ຖອດຖອນບົດຮຽນໄປນໍາ, ເລືອກເອົາສິ່ງຍອດຍິ່ງທັງຕ້ອງກໍາແໜ້ນຂໍ້ມູນຂ່າວສານທີ່ຖືກຕ້ອງທັນການກ່ຽວກັບອາຊີບທີ່ພວມເຮັດ.
ຂະນະທີ່ປະຊາຊົນສຸມທຸກຄວາມພະຍາຍາມພັດທະນາ ແລະ ຍົກລະ ດັບຊີວິດການເປັນຢູ່ຂອງຄອບຄົວໃຫ້ດີຂຶ້ນ, ສິ່ງທີ່ຂາດບໍ່ໄດ້ ແລະ ຖືວ່າເປັນປັດໄຈສຳຄັນໃນການແກ້ໄຂຄວາມທຸກຍາກຂອງປະຊາຊົນກໍຄືການກໍ່ສ້າງຮາກຖານການເມືອງທີ່ມີພະນັກງານລັດເຮັດໜ້າທີ່ນີ້ຢູ່.
ຄວາມຈິງ, ການລຶບລ້າງຄວາມທຸກຍາກຂອງປະຊາຊົນໄດ້ເປັນຮູບປະທໍາແລ້ວລະດັບໜຶ່ງ ຊຶ່ງບ່ອນທີ່ພະນັກງານລັດລົງໄປຊຸກຍູ້ປະຊາຊົນນັ້ນຖືວ່າບັນລຸເປົ້າໝາຍ ຊຶ່ງສ່ອງແສງໃຫ້ເຫັນວ່າ: ພະນັກງານທີ່ລົງຊ່ວຍມີຄວາມເຂັ້ມແຂງ ເຮັດຢ່າງຈິງຈັງ, ເຂົ້າເຖິງຕົວຈິງ, ຮູ້ສາເຫດຂອງຄວາມທຸກຍາກ, ຮູ້ປຸກລະດົມຂົນຂວາຍ, ອຸທິດຕົນ, ຮູ້ວິທີພາເຮັດ, ເສຍສະລະ…ທັງເປັນແບບຢ່າງທີ່ດີ ນໍາໜ້າພາທາງເຮັດສອດຄ່ອງກັບສະພາບ ຈຸດພິ ເສດ ຂອງບ່ອນທີ່ຕົນລົງເລິກ.
ມີບາງທັດສະນະ ຊີ້ໃຫ້ເຫັນວ່າ: ຄວາມເປັນເຈົ້າການທັງຂອງປະຊາຊົນເອງ ແລະ ພະນັກງານລັດທີ່ລົງໄປຊ່ວຍແມ່ນພື້ນຖານສຳຄັນສຳລັບການເຮັດໃຫ້ຄວາມທຸກຍາກຂອງປະຊາຊົນໄດ້ຮັບການແກ້ໄຂຢ່າງຂາດ ໂຕ ໝາຍຄວາມວ່າ ພະນັກງານລົງໄປຊ່ວຍຕ້ອງເຮັດຢ່າງແຂງແຮງ, ບໍລິສຸດຈິງໃຈ ແລະ ອອກເຫື່ອເທແຮງ ເສຍສະລະ ອົດທົນ ເຖິງວ່າພະນັກງານບາງທ່ານບໍ່ແມ່ນວິຊາການກະສິກຳ ອຸດສາຫະກຳ ເຕັກນິກ..ຖ້າຊອກຮູ້ ຮໍ່າຮຽນວິຊາການດ້ານນີ້ ການປູກການລ້ຽງຂອງປະຊາຊົນກໍມີປະສິດທິຜົນ. ຂະນະທີ່ປະຊາຊົນກໍຕ້ອງຈິງຈັງຈິງໃຈ ເຮັດແທ້ທໍາຈິງ ທັງຮຽນຮູ້ບົດຮຽນໃໝ່ໆບົດຮຽນທີ່ກ້າວໜ້າເພື່ອເຮັດໃຫ້ການຜະລິດໄດ້ຮັບໝາກຮັບຜົນ.
ສະຫລຸບຄື ຖ້າສອງສ່ວນນີ້ປະສົມປະສານກັນພ້ອມກັນເຮັດຢ່າງແຂງແຮງ, ອົດທົນ, ຈິງໃຈບຸກໜ້າບືນຕົວສະເໝີຕົ້ນສະເໝີປາຍ…ບໍ່ມື້ໃດກໍມື້ໜຶ່ງ, ຈຸດໝາຍປາຍທາງທີ່ຕັ້ງໄວ້ຮ່ວມກັນກໍບັນລຸຜົນ.
