ນໍ້າມັນເຊື້ອໄຟລາວຮ່ວມກັບ ເອກະຊົນ ສ.ເກົາຫລີ ຜະລິດນໍ້າມັນຢູ່ລາວ ສາມາດຜະລິດໄດ້ 10 ລ້ານລິດ/ເດືອນ
ວັນທີ 1 ພະຈິກ 2022 ນີ້ ລັດວິສາຫະກິດນ້ຳມັນເຊື້ອໄຟລາວ (ລນລ) ເຊັນສັນຍາ ກັບ ບໍລິສັດ Gaia Petro ຈາກ ສາທາລະນະລັດເກົາຫຼີ ເພື່ອສ້າງຕັ້ງບໍລິສັດ ຮ່ວມທຶນ (JVC) ໂດຍການເຂົ້າຮ່ວມຂອງ ທ່ານ ບຸນປອນ ວັນນະຈິດ ຮອງລັດຖະມົນຕີ ກະຊວງການເງິນ, ທ່ານ ບຸນເຖິງ ດວງສະຫວັນ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ທ່ານ ສີນາວາ ສຸພານຸວົງ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່, ກ່ຽວຂ້ອງ.
ທ່ານ ສີສັງຄົມ ໂຄດໂຍທາ ໃຫ້ຮູ້ວ່າ: ໂຄງການ ແມ່ນຈະຕັ້ງຢູ່ທີ່ບ້ານດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນ, ສ້າງຕັ້ງເປັນບໍລິສັດຮ່ວມທຶນ (JVC) ດ້ວຍໃຊ້ທຶນທັງໝົດ 20 ລ້ານໂດລາ, ໄລຍະໂຄງການ 12 ປີ; ໃນນັ້ນ ບໍລິສັດ Gaia Petro ຖືຮຸ້ນ 55 %; ລນລ ຖືຮຸ້ນ 22,5% ແລະ ນັກລົງທຶນພາຍໃນ ຖືຮຸ້ນ 22,5% ຄາດວ່າຜົນຜະລິດໃນປີທີ 1 ຈະໄດ້ປະລິມານນ້ຳມັນແອັດຊັງຊີວະພາບ 500.000 ລິດ/ວັນ ຫຼື 10 ລ້ານລິດ/ເດືອນ ແລະ ໃນປີທີ 2 ເປັນຕົ້ນໄປຈະເພີ່ມຂຶ້ນປີລະ 20% ໂດຍຜົນຜະລິດທັງໝົດ ລນລ ຈະເປັນຜູ້ຈຳໜ່າຍ.
