9 ເສັ້ນທາງໃນການນຳໃຊ້ສັນຈອນ ໄລະຍະງານບຸນພຣະທາດຫລວງວຽງຈັນ ປະຈຳປີ 2022

ອີງຕາມຄວາມສະຫງົບ ລາຍງານວ່າ: ໃນໄລະຍະງານບຸນນະມັດສະການພຣະທາດຫລວງວຽງຈັນ ປະຈຳປີ 2022 ເຈົ້າໜ້າທີ່ຕໍາຫລວດຈະລາຈອນ ໄດ້ຕີລາຄາສະພາບການເສັ້ນທາງຫລາຍສາຍທີ່ມຸງໜ້າມາສູ່ບໍລິເວນພຣະທາດຫລວງ ຈະເຮັດໃຫ້ສະພາບການສັນຈອນຕິດຂັດການທຽວທາງໃນຊ່ວງໄລຍະເວລາດັ່ງກ່າວພົບຄວາມຫຍຸ້ງຍາກ, ສະນັ້ນ, ເຈົ້າໜ້າທີ່ຕໍາຫລວດຈະລາຈອນ ຈຶ່ງໄດ້ກໍານົດເສັ້ນທາງການສັນຈອນລະອຽດດັ່ງນີ້:

1. ລົດບັນທຸກ ທີ່ມາແຕ່ເສັ້ນທາງ 13 ເໜືອ ມີຈຸດປະສົງຈະໄປເສັ້ນທາງ 13 ໃຕ້ ມາຮອດ 3 ແຍກໜອງບຶກໃຫ້ລ້ຽວຊ້າຍໄປຕາມເສັ້ນທາງໜອງບຶກຮອດໄຟອໍານາດດົງໂດກລ້ຽວຊ້າຍໄປຕາມຈຸດປະສົງ.
2. ສະເພາະລົດບັນທຸກທີ່ມາແຕ່ເສັ້ນທາງ 13 ເໜືອ ມີຈຸດປະສົງຈະໄປຂົວມິດຕະພາບໃຫ້ ໃຊ້ເສັ້ນທາງໜອງບຶກດົງໂດກ ຊອດໃສ່ເສັ້ນທາງ 450 ປີ ໄປຫາຂົວມິດຕະພາບ.
3. ລົດບັນທຸກທີ່ມາແຕ່ຂົວມິດຕະພາບ ມີຈຸດປະສົງໄປເສັ້ນ ທາງ 13 ໃຕ້ ໃຫ້ໃຊ້ເສັ້ນທາງ 450 ປີ ມາທາງ 4 ແຍກໄຟອໍານາດດົງໂດກໃຫ້ລ້ຽວຂວາໄປທາງດອນໜູນ ແລ້ວໄປຕາມຈຸດປະສົງ.
4. ລົດບັນທຸກ ທີ່ມາແຕ່ເສັ້ນທາງ 13 ໃຕ້ ມີຈຸດປະສົງໄປຂົວມິດພາບ ໃຫ້ລ້ຽວຊ້າຍຊອດໃສ່ເສັ້ນທາງ 450 ປີ ແລ້ວລ້ຽວຊ້າຍໄປຂົວມິດຕະພາບ.
5. ພາຫະນະທີ່ມາແຕ່ເສັ້ນທາງ 13 ໃຕ້, ເສັ້ນທາງເລກ 10 ຫລື ເສັ້ນທາງດອນໜູນ, ເສັ້ນທາງໄກສອນ, ຖ້າບໍ່ມີຈຸດປະສົງມາທ່ຽວງານບຸນ, ມາຮອດໄຟອໍານາດໜອງໜ່ຽງໃຫ້ລ້ຽວຊ້າຍໄປເສັ້ນທາງບ້ານໜອງໜ່ຽງ ໄປທາງບ້ານວັງຊາຍ ໄປຕາມຈຸດປະສົງ ຫລື ລ້ຽວຂວາອອກໄປເສັ້ນທາງໂຮງໝໍ 150 ຕຽງ ແລ້ວໄປຕາມຈຸດປະສົງ.
6. ກໍລະນີການສັນຈອນມີຄວາມສັບສົນ ເຈົ້າໜ້າທີ່ ຈະໄດ້ແຍກລົດຢູ່ຈຸດໄຟອໍານາດດົງໂດກ ແລະ ຈຸດໄຟອໍານາດໜອງໜ່ຽງ ໃຫ້ລ້ຽວຂວາໄປໃຊ້ເສັ້ນທາງດົງໂດກ, ໜອງບຶກ ອອກໃສ່ປະຕູໂຂງມະຫາວິທະຍາໄລແຫ່ງຊາດ ແລ້ວລ້ຽວຊ້າຍໄປຕາມເສັ້ນທາງດົງໂດກ-ໂພນຕ້ອງ ຫລື ຮອດໄຟອໍານາດຕານມີໄຊ ໃຫ້ລ້ຽວຊ້າຍໄປຕາມເສັ້ນທາງຕານມີອອກໄປທາງວັດດອນແດງ ແລ້ວໄປຕາມຈຸດປະສົງ.
7. ພາຫະນະທີ່ມາແຕ່ເສັ້ນໜອງໄຮ, ໂພນທັນ, ເສັ້ນທາງຂົວມິດຕະພາບ ມີຈຸດປະສົງໃຊ້ເສັ້ນທາງກໍາແພງເມືອງ ໄປທາງໄຟອໍານາດທາດຫລວງ ແລ້ວລ້ຽວຂວາ ຊອດໃສ່ບ້ານໂນນຄໍ້ ແລະ ໄປຕາມຈຸດປະສົງ (ຂໍ້ທີ 7 ແມ່ນໃຊ້ສະເພາະງານບຸນພຣະທາດຫລວງ ແລະ ມື້ໃສ່ບາດ).
8. ລົດເມ, ລົດໂດຍສານ, ລົດ 6 ລໍ້ຂຶ້ນໄປທີ່ມາຈາກເສັ້ນທາງທ່າເດືອ ເມືອງຫາດຊາຍຟອງ ທີ່ມີຈຸດປະສົງມາທ່ຽວງານບຸນແມ່ນອະນຸຍາດໃຫ້ຈອດຕາມທາງຊອຍບ້ານສະພັງໝໍ້ ແລະ ໂພນສີນວນ.
9. ພາຫະນະມາແຕ່ຊໍາເຄ້, ນາຄວາຍ, ດົງຄໍາຊ້າງ ແລະ ຊຽງດາ ໃຫ້ຈອດຢູ່ເຂດຕະຫລາດຫົວຂົວ.