ໄລຍະ 15 ປີ ຜ່ານມາ ສປປ ລາວ ໃຊ້ງົບປະມານຫລາຍກວ່າ 300 ລ້ານໂດລາ ໃນການວາງແຜນຜັງເມືອງເພື່ອຫັນເປັນຕົວເມືອງ ມີຄວາມຄົງທົນ ແລະ ມີສ່ວນຮ່ວມ
November 1, 2022 - 1:40 PM
ວັນທີ 31 ຕຸລາ 2022 ນີ້ ກະຊວງໂຍທາທິການ ແລະ ຂົນສົ່ງ (ຍທຂ) ຮ່ວມກັບ ອົງການສະຫະປະຊາຊາດ ປະຈໍາລາວ (UN- Habitat) ໄດ້ຈັດກອງປະຊຸມເວທີຕົວເມືອງແຫ່ງຊາດ ພາຍໃຕ້ຫົວຂໍ້ “ການຫັນເປັນຕົວເມືອງທີ່ມີຄວາມຄົງທົນ ແລະ ມີສ່ວນຮ່ວມ” ເປັນເວ ທີໃນການປຶກສາຫາລື ແລກປ່ຽນຄໍາຄິດຄໍາເຫັນກ່ຽວກັບສິ່ງທ້າທາຍ ແລະ ກາລະໂອກາດຂອງການພັດທະນາເສດຖະກິດ-ສັງຄົມຂອງ ຕົວເມືອງທີ່ກໍາລັງຂະຫຍາຍຕົວໄວ ເພື່ອຮັບຟັງຄວາມຄິດຄວາມເຫັນຂອງຜູ້ຕາງໜ້າຈາກພາກສ່ວນຕ່າງໆ ແລະ ມີສ່ວນຮ່ວມໃນການພັດທະນາແກ້ໄຂບັນຫາຂອງ ຕົວເມືອງໃຫ້ມີຄວາມຍືນຍົງ ໜ້າຢູ່ ແລະ ທັນສະໄໝໃນອະນາຄົດ.
ທ່ານ ວຽງສະຫວັດ ສີພັນດອນ ລັດຖະມົນຕີກະຊວງໂຍທາທິການ ແລະ ຂົນສົ່ງ ໄດ້ກ່າວວ່າ: ການພັດທະນາຕົວເມືອງແມ່ນເປັນບັນຫາທີ່ທົ່ວໂລກໃຫ້ຄວາມສໍາຄັນ ເນື່ອງຈາກຕົວເມືອງເປັນຈຸດໃຈກາງໃນການພັດທະນາເສດຖະກິດ-ສັງຄົມ ແລະ ສິ່ງແວດລ້ອມຂອງປະເທດ.
ວຽກງານພັດທະນາຕົວເມືອງເປັນວຽກງານທີ່ກ່ຽວຂ້ອງຕິດພັນ ແລະ ເປັນຄວາມຮັບຜິດຊອບຂອງຫລາຍພາກສ່ວນໃນສັງຄົມ; ພ້ອມກັນນັ້ນລັດຖະບານ ສປປ ລາວ ກໍໄດ້ຖືສໍາຄັນວຽກງານພັດທະນາຕົວເມືອງເຊັ່ນດຽວກັນ ໂດຍໄດ້ສໍາເລັດການວາງແຜນຜັງລວມຕົວເມືອງ 148 ເມືອງທົ່ວປະເທດ ແລະ ໄດ້ມີການປັບປຸງແຜນຜັງບັນດາເມືອງດັ່ງກ່າວເປັນໄລຍະ ຕາມການເຕີບໂຕທາງດ້ານເສດຖະກິດ-ສັງຄົມ ແລະ ໄດ້ສຸມງົບປະມານທັງພາຍໃນ ແລະ ຂົນຂວາຍທຶນຮອນການຊ່ວຍເຫລືອ ຈາກບັນດາປະເທດເພື່ອນມິດ, ສະຖາບັນການເງິນສາກົນເປັນຈໍານວນເງິນຫລາຍກວ່າ 300 ລ້ານໂດລາ ໃນໄລຍະ 15 ປີ ຜ່ານມາ.
ເຖິງແມ່ນວ່າ ສປປ ລາວ ຈັດຢູ່ໃນບັນດາປະເທດລາຍໄດ້ຕໍ່າ ຫາປານກາງ ແຕ່ປະເທດລາວ ກໍເປັນໜຶ່ງໃນບັນດາປະເທດທີ່ບໍ່ທັນມີປະຊາຊົນຂາດທີ່ຢູ່ອາໄສຈໍານວນຫລາຍ ແລະ ບໍ່ມີຊຸມຊົນແອອັດ ດັ່ງທີ່ພົບເຫັນໃນບັນດາປະເທດກໍາລັງພັດທະນາອື່ນໆ.
ເຖິງຢ່າງໃດກໍຕາມ ເນື່ອງຈາກການຂະຫຍາຍຂອງຕົວເມືອງທີ່ວ່ອງໄວ ແລະ ການພັດທະນາທີ່ຢູ່ອາໄສແບບບໍ່ຍືນຍົງຜ່ານມາ ຈຶ່ງເຮັດໃຫ້ປະຊາຊົນທີ່ດໍາລົງຊີວິດຢູ່ໃນຕົວເມືອງ ກໍາລັງປະເຊີນກັບບັນຫາລາຄາທີ່ຢູ່ອາໄສທີ່ນັບມື້ນັບແພງຂຶ້ນ ແລະ ມີຂະໜາດທີ່ນັບມື້ຄັບແຄບລົງເລື້ອຍໆ; ພ້ອມກັນນັ້ນ ການຂະຫຍາຍຕົວຂອງຕົວເມືອງ ທີ່ແຜ່ລາມໂດຍບໍ່ມີການຄວບຄຸມຢ່າງເປັນລະບົບຢູ່ໃນບັນດາຕົວເມືອງໃຫຍ່ໃນປັດຈຸບັນ ເນື່ອງຈາກການນໍາໃຊ້ທີ່ດິນ ແລະ ການພັດທະນາທີ່ຢູ່ອາໄສຍັງບໍ່ສອດຄ່ອງກັບຂໍ້ກໍານົດ ແລະ ກົດລະບຽບຂອງແຜນຜັງຕົວເມືອງທີ່ກໍານົດໄວ້ ທັງກໍ່ໃຫ້ເກີດບັນຫາການຈະລາຈອນແອອັດໃນເວລາເລັ່ງດ່ວນ ບັນຫາລະບາຍນໍ້າບໍ່ທ່ວງທັນ ແລະ ມີນໍ້າຖ້ວມຂັງໃນຕົວເມືອງ ແລະ ການພັດທະນາໂຄງລ່າງພື້ນຖານເຊັ່ນ: ຖະໜົນຫົນທາງ, ໄຟຟ້າ, ນໍ້າປະປາ, ອິນເຕີເນັດ, ການບໍາບັດນໍ້າເປື້ອນ, ການບໍລິການເກັບຂີ້ເຫຍື້ອຕ່າງໆ.
ນອກຈາກນັ້ນ ວຽກງານພັດທະນາຕົວເມືອງເປັນວຽກທີ່ກວ້າງຂວາງ ຕິດພັນກັບຄວາມຮັບຜິດຊອບ ແລະ ການມີສ່ວນຮ່ວມຂອງທຸກພາກສ່ວນໃນສັງ ຄົມລວມທັງພາກລັດ ແລະ ພາກເອກະຊົນ.
