ພຣະສົງ-ສາມະເນນວັດທອງທິບ ເມືອງ ຕົ້ນເຜິ້ງ ແລະ ອອກຕົນຍາດໂຍມຜູ້ທີ່ມີໃຈສັດທາ ລົງມອບເຄື່ອງຊ່ວຍເຫລືອປະຊາຊົນບ້ານ ນໍ້າຟ້າ ລວມມູນຄ່າ 15 ລ້ານກວ່າກີບ
November 1, 2022 - 10:29 AM
ວັນທີ 30 ຕຸລາ 2022 ນີ້, ພຣະອາຈານ ທະນະຊົນ ພົງສະຫວັດ ຮັກສາການເຈົ້າອະທິກາຍວັດທອງທິບ ບ້ານໃຫຍ່ ຕົ້ນເຜິ້ງ ເມືອງ ຕົ້ນເຜິ້ງ ແຂວງບໍ່ແກ້ວ ພ້ອມດ້ວຍພຣະສົງ – ສາມະເນນພາຍໃນວັດ ແລະ ອອກຕົນຍາດໂຍມຜູ້ທີ່ມີຈິດໃຈເຫລື້ອມໃສສັດທາ ໄດ້ນໍາເອົາເຄື່ອງອຸປະໂພກ-ບໍລິໂພກ ເຊິ່ງປະກອບມີີ: ຜ້າຫົ່ມ, ເຄື່ອງນຸ່ງຮົມ, ໝີ່ສຳເລັດຮູບ, ເຂົ້າສານ, ອຸປະກອນການຮຽນ ແລະ ເຄື່ອງໃຊ້ສອຍອື່ນໆ ລວມມູນຄ່າ 15 ລ້ານກວ່າກີບ ໄປມອບໃຫ້ແກ່ພໍ່ແມ່ປະຊາຊົນ ຄອບຄົວທຸກຍາກບ້ານນໍ້າຟ້າ ຈໍານວນ 14 ຄອບຄົວ ເພື່ອເປັນການແບ່ງປັນນໍ້າໃຈ ແລະ ບັນເທົາທຸກ ໃຫ້ແກ່ປະຊາຊົນບ້ານນໍ້າຟ້າ ເຊິ່ງສ່ວນໃຫຍ່ຍັງມີຄວາມຂາດເຂີນ ໂດຍສະເພາະແມ່ນຜ້າຫົ່ມ ແລະ ເຄື່ອງນຸ່ງຮົ່ມກັນໜາວໃນຊ່ວງລະດູໜາວ. ເຄື່ອງທີ່ນໍາມາມອບຈຳນວນດັ່ງກ່າວ ແມ່ນໄດ້ຈາກການລະດົມສັດທາຂອງອອກຕົນຍາດໂຍມພາຍໃນເມືອງ ແລະ ຈາກພຣະສົງ ສາມະເນນພາຍໃນວັດທອງທິບອີກຈໍານວນໜຶ່ງ.
ໂອກາດນີ້ ຄະນະພັກຮາກຖານກູ່ມບ້ານນາຄຳ ແລະ ນາຍບ້ານໆ ນໍ້າຟ້າກໍ່ໄດ້ສະແດງຄວາມຂອບໃຈມາຍັງ ພຣະອາຈານ ທະນະຊົນ ພົງສະຫວັດ ພ້ອມດ້ວຍທີມງານ ກໍຄືຜູ້ທີ່ໄດ້ປະກອບສ່ວນເຄື່ອງອຸປະໂພກ-ບໍລິໂພກ ເຄື່ອງໃຊ້ສອຍໃນຄັ້ງນີ້ ທີ່ເຫັນໄດ້ຄວາມຂາດເຂີນຂອງພໍ່ແມ່ປະຊາຊົນບ້ານນໍ້າຟ້າ ໂດຍສະເພາະແມ່ນຄອບຄົວທຸກຍາກຈໍານວນ 14 ຄອບຄົວ ແລະ ໄດ້ມີນໍ້າໃຈນໍາເອົາເຄື່ອງຈໍານວນດັ່ງກ່າວມາຊ່ວຍເຫລືອໃນຄັ້ງນີ້ ແລະ ຫວັງຢ່າງຍິ່ງວ່າໂອກາດໜ້າຍັງຈະໄດ້ຮັບການຊ່ວຍເຫລືອອີກໃນຄັ້ງຕໍ່ໄປ.
