ຈີນລັອກດາວ ຊຽງໄຮ້ ດິສນີແລນ ກະທັນຫັນ ສົ່ງຜົນນັກທ່ອງທ່ຽວຫລາຍຄົນຖືກຂັງອອກບໍ່ໄດ້ ຈົນກວ່າຈະໂຊຜົນກວດເຊື້ອເປັນລົບ

ສວນເຄື່ອງຫລິ້ນຊຽງໄຮ້ ດິສນີແລນ ກາຍເປັນໜຶ່ງໃນສະຖານທີ່ທ່ອງທ່ຽວຫລ້າສຸດຂອງເມືອງ ທີ່ບັງຄັບໃຊ້ມາດຕະການລັອກດາວ ແລະ ປິດສວນເຄື່ອງຫລິ້ນແບບກະທັນຫັນໃນວັນທີ 31 ຕຸລາ ຫລັງທາງການທ້ອງຖິ່ນປະກາດຫ້າມປະຊາຊົນເຂົ້າ ແລະ ອອກຈາກສວນເຄື່ອງຫລິ້ນ ສົ່ງຜົນໃຫ້ມີປະຊາຊົນຫລາຍຄົນຕົກຄ້າງຢູ່ພາຍໃນ ແລະ ຕ້ອງໄດ້ຮັບການກວດເຊື້ອໂຄວິດເປັນລົບກ່ອນຈຶ່ງຈະອອກມາທາງນອກໄດ້.

ມາດຕະການລັອກດາວກະທັນຫັນດັ່ງກ່າວມີຂຶ້ນໄລຍະເວລາປະມານ 11:39 ໂມງ ຕາມເວລາທ້ອງຖິ່ນ ໂດຍເປັນໄປຕາມນະໂຍບາຍຄວບຄຸມໂຄວິດເປັນສູນ ຫລື zero-COVID ຂອງລັດຖະບານຈີນ ເຊິ່ງກ່ອນໜ້ານີ້ ສວນເຄື່ອງຫລິ້ນໄດ້ຫລຸດຈຳນວນຜູ້ເຂົ້າໃຊ້ບໍລິການແລ້ວເພື່ອໃຫ້ເປັນໄປຕາມມາດຕະການປ້ອງກັນໂຄວິດຂອງທາງການ.

ໃນລະຫວ່າງການລັອກດາວ ນັກທ່ອງທ່ຽວທີ່ຕົກຄ້າງຢູ່ພາຍໃນຍັງສາມາດໃຊ້ບໍລິການເຄື່ອງຫລິ້ນໄດ້. ຂະນະທີ່ໂຄສົກຊຽງໄຮ້ ດິສນີ ລີສອດ ປະກາດວ່າຍັງໃຫ້ບໍລິການແບບຈຳກັດ ແລະ ໄດ້ປະຕິບັດຕາມມາດຕະການທີ່ໜ່ວຍງານສາທາລະນະສຸກຈີນກຳນົດ.

ການລັອກດາວດັ່ງກ່າວມີຂຶ້ນຫລັງຈາກມີລາຍງານພົບຜູ້ຕິດເຊື້ອ 10 ຄົນໃນນະຄອນຊຽງໄຮ້ວັນທີ 29 ຕຸລາຜ່ານມາ. ຂະນະທີ່ມີການເຜີຍແພ່ວິດີໂອຫລັງມີການປະກາດປິດສວນເຄື່ອງຫລິ້ນ ເຮັດໃຫ້ປະຊາຊົນຈຳນວນໜຶ່ງພາກັນແລ່ນໜີອອກມາຈາກຮ້ານຄ້າຕ່າງໆດ້ວຍຄວາມວຸ້ນວາຍ ແລະ ແລ່ນໄປປະຕູທາງອອກ ແຕ່ປາກົດວ່າປະຕູນັ້ນຖືກລັອກຮຽບຮ້ອຍແລ້ວ.

ທັງນີ້, ທາງການຊຽງໄຮ້ຍັງປະກາດໃຫ້ປະຊາຊົນທຸກຄົນທີ່ໄປທ່ຽວສວນເຄື່ອງຫລິ້ນນັບແຕ່ວັນທີ 27 ຕຸລາຜ່ານມາ ຕ້ອງສະແດງຜົນການກວດເຊື້ອເປັນລົບຕໍ່ເນື່ອງເປັນເວລາ 3 ວັນ.

ອ້າງອີງ:

https://www.bbc.com/news/world-asia-63456107

https://www.reuters.com/…/disney-closes-shanghai…/