ລາວ-ມຽນມາ ຈັດກອງປະຊຸມຄະນະກຳມະການຊາຍແດນ ຂັ້ນແຂວງ-ເຂດ ຄັ້ງທີ X
ກອງປະຊຸມຄະນະກຳມະການຊາຍແດນ ລະຫວ່າງ ສາທາລະນະລັດ ປະຊາທິປະໄຕ ປະຊາ ຊົນລາວ ແລະ ສາທາລະນະລັດ ສະຫະພາບມຽນມາ ຂັ້ນແຂວງ, ເຂດ ຄັ້ງທີ X ໄດ້ຈັດຂຶ້ນໃນ ລະຫວ່າງວັນທີ 24-26 ຕຸລາ 2022 ນີ້, ຢູ່ທີ່ທ່າຂີ້ເຫຼັກ ລັດສານ ສສ ມຽນມາ ຝ່າຍລາວນຳ ໂດຍ ພັນເອກ ທອງໄຂ ສີຍາລາດ ຫົວໜ້າການທະຫານກອງບັນຊາການທະຫານແຂວງບໍ່ແກ້ວ, ພ້ອມຄະນະ, ຝ່າຍມຽນມານຳໂດຍພັນເອກ ມິນມິນ ທຸນ ຫົວໜ້າຜູ້ບັນຊາການທະຫານທ່າຂີ້ເຫຼັກ ກອງທັບພາກສາມຫຼ່ຽມ ກອງທັບ ແຫ່ງ ສສ ມຽນມາ ພ້ອມ ຄະນະ, ມີຮອງຫົວໜ້າກົມຊາຍແດນ, ກອງບັນຊາການທະຫານ-ຕຳຫຼວດແຂວງ ຫຼວງນ້ຳທາ, ແຂວງບໍ່ແກ້ວ ແລະ ກອງພົນທະຫານຮາບທີ 3 ເຂົ້າຮ່ວມ.
ໃນປີ 2021-2022 ໄດ້ພັກດັນແຮງງານມຽນມ່າກັບຄືນປະເທດໃນຊ່ວງໂຄວິດ 19 ຈຳນວນ 5005 ຄົນ ຍິງ 1814 ຄົນ, ກັກຕົວຄົນສັນຊາດມຽນມ່າລັກລອບເຂົ້າເມືອງແບບຜິດກົດໝາຍຈຳນວນ 96 ຄົນ ຍິງ 4 ຄົນ, ກັກຕົວຜູ້ຕ້ອງຫາໄດ້ 12 ຄົນ, ຍຶດຢາບ້າໄດ້ 12.764.000 ເມັດ, ເຮໂລອິນ 180 ແທງ, ແປ້ງຝຸ່ນ 7,250 ກິໂລກຼາມ, ຍຶດລົດໃຫຍ່ 19 ຄັນ, ເຮືອບັນທຸກສິນຄ້າ 3 ລຳ, ເງິນ ບາດ 15.000 ບາດ, ເງິນກີບ 1.000.000 ກີບ. ມີຄະດີຄາດຕະກຳເກີດຂື້ນ 3 ເລື່ອງ ມີຜູ້ເສຍຊິວິດ 6 ຄົນ ສັນຊາດຈີນ 4 ຄົນ ລາວ1 ຄົນ ແລະ ມຽນມ່າ 1 ຄົນ, ໃນກອງປະຊຸມທັງສອງຝ່າຍຍັງ ໄດ້ພ້ອມກັນປຶກສາຫາລືຄົ້ນຄວ້າ, ເພື່ອຊອກຫາຊ່ອງທາງຕ້ານ ແລະ ສະກັດກັ້ນ, ບັນດາປາກົດການຫຍໍ້ທໍ້ຕ່າງໆທີ່ອາດຈະເກີດຂຶ້ນໃນຕໍ່ໜ້າ, ເພື່ອພ້ອມກັນ ສືບຕໍ່ຈັດຕັ້ງປະຕິບັດໃນຕໍ່ໜ້າ ໃຫ້ມີປະສິດທິພາບສູງ, ໃນນີ້ ທັງສອງຝ່າຍໄດ້ເປັນເອກະພາບ, ສືບຕໍ່ຊຸກຍູ້ໃຫ້ກຳລັງເຈົ້າໜ້າທີ່ ທັງສອງຝ່າຍ, ເພີ່ມທະວີການເຄື່ອນໄຫວກວດກາພື້ນທີ່ຊາຍແດນຂອງໃຜມັນໃຫ້ເປັນປົກກະຕິ, ສືບຕໍ່ແລກປ່ຽນຂໍ້ມູນຂ່າວສານເຊິ່ງກັນ ແລະ ກັນໃຫ້ຕໍ່ເນື່ອງທັນເວລາ, ສືບຕໍ່ແກ້ໄຂແຮງງານເຖື່ອນຂອງສອງຝ່າຍຕ້ອງປະຕິບັດຕາມຫຼັກການກົດໝາຍລະຫວ່າງຊາດ, ສືບຕໍ່ແລກປ່ຽນສະພາບວຽກງານ ກວດກາຄົນເຂົ້າ-ອອກເມືອງ ແລະ ວຽກງານຊາຍແດນລະຫວ່າງດ່ານປະຈຳໄຕມາດ, ເພື່ອແລກປ່ຽນສະພາບນຳກັນ, ເຫັນດີໃຫ້ການຮ່ວມມືໃນການສະກັດກັ້ນການລັກລອບເຂົ້າເມືອງ, ການຂົນສົ່ງສິ່ງຕ້ອງຫ້າມທີ່ບໍ່ຖືກຕ້ອງ ແລະ ອື່ນໆອີກຈຳນວນໜຶ່ງ.ຈາກນັ້ນ, ທັງສອງຝ່າຍກໍໄດ້ເຊັນບົ ບັນທຶກຊ່ວຍຈຳຮ່ວມກັນເພື່ອເປັນບ່ອນອີງໃນການຈັດຕັ້ງປະຕິບັດໃນຕໍ່ໜ້າໃຫ້ມີປະສິດທິພາບ ສູງກວ່າເກົ່າ ແລະ ມອບຂອງທີ່ລະນຶກເຊິ່ງກັນ ແລະ ກັນຕື່ມອີກ.
