ເຈົ້າໜ້າທີ່ຈັບຜູ້ຄ້າຂາຍຢາເສບຕິດຫລາຍລາຍມາດໍາເນີນຄະດີ

ເມື່ອບໍ່ດົນຜ່ານມານີ້, ເຈົ້າໜ້າທີ່ສາມາດຈັບເປົ້າໝາຍຄ້າຂາຍຢາເສບຕິດຫລາຍລາຍມາດໍາເນີນຄະດີຕາມລະບຽບກົດໝາຍຄື: ປກສ ແຂວງວຽງຈັນໄດ້ນໍາກໍາລັງເຂົ້າກວດຄົ້ນເຮືອນເປົ້າໝາຍຄ້າຂາຍຢາເສບຕິດຫລັງໜຶ່ງຢູ່ບ້ານເມືອງເກົ່າ, ເມືອງວຽງຄໍາ ແລະ ພົບເຫັນຢາບ້າ 792 ເມັດຊຸກເຊື່ອງໄວ້ໃນເຮືອນ ແລະ ໄດ້ຈັບຕົວທ້າວ ບົວລີວັນ (ຕຸ້ຍ) ອາຍຸ 47 ປີເຈົ້າຂອງເຮືອນມາດໍາເນີນຄະດີຕາມລະບຽບກົດໝາຍ ແລະ ຜ່ານການສືບສວນຜູ້ຕ້ອງຫາຮັບສາລະພາບວ່າຢາເສບຕິດດັ່ງກ່າວແມ່ນຕົນເອງໄດ້ຊື້ມາຈາກຂະບວນການຄ້າຢາເສບຕິດຢູ່ບ້ານເກີນເມືອງທຸລະຄົມແຂວງວຽງຈັນ ເພື່ອເອົາມາຂາຍໃຫ້ຊາວໜຸ່ມພາຍໃນບ້ານຂອງຕົນ, ແຕ່ຖືກເຈົ້າໜ້າທີ່ຈັບຕົວກ່ອນ, ພ້ອມນີ້, ເຈົ້າໜ້າທີ່ ປກສ ເມືອງຫາດຊາຍຟອງນະຄອນຫລວງວຽງຈັນ ກໍສາມາດຈັບຕົວທ້າວ ທອງສົນ ອາຍຸ 30 ປີຢູ່ບ້ານທ່ານາແລ້ງເມືອງຫາດຊາຍຟອງ, ພ້ອມຂອງກາງຢາບ້າ 1.218 ເມັດ ແລະ ຢາໄອ 1 ຖົງນ້ອຍ, ຈຶ່ງໄດ້ຍຶດໄວ້ເປັນຫລັກຖານໃນການດໍາເນີນຄະດີ ແລະ ຜ່ານການສືບສວນ-ສອບສວນຂອງເຈົ້າໜ້າທີ່ທ້າວ ທອງສົນ ໄດ້ຮັບສາລະພາບວ່າ: ຕົນເອງໄດ້ພົວພັນຢາເສບຕິດມາແລ້ວຫລາຍປີ ແລະ ເຄີຍຖືກຈໍາຄຸກຄັ້ງໜຶ່ງເປັນເວລາ 5 ປີແຕ່ບໍ່ເຂັດຫລາບ.