ສະພາກະແດງ ແຫ່ງ ສສ ຫວຽດນາມ ມອບເຄື່ອງຊ່ວຍເຫລືອໃຫ້ແກ່ຄອບຄົວທຸກຍາກ ແຂວງອັດຕະປື ສປປ ລາວ

ວັນທີ 29 ຕຸລາ 2022 ຜ່ານມາ, ທ່ານ ນາງ ບຸຍທີຮົວ ປະທານສະພາກາແດງ ແຫ່ງ ສສ ຫວຽດນາມ ພ້ອມດ້ວຍຄະນະ ໄດ້ມາເຄື່ອນໄຫວຢ້ຽມຢາມ ແຂວງ ອັດຕະປື ສປປ ລາວ, ໂດຍການຕ້ອນຮັບຂອງ ທ່ານ ດຣ ບໍລິສຸດ ພົມມະໂຄດ ຫົວໜ້າຫ້ອງການ ອົງການກາແດງ ແຂວງ ອັດຕະປື ພ້ອມດ້ວຍພະນັກງານຫລັກແຫລ່ງ ຂອງ ອົງການກາແດງແຂວງ.

ໃນໂອກາດຢ້ຽມຢາມນີ້, ທ່ານ ນາງ ບຸຍທີຮົວ ພ້ອມດ້ວຍຄະນະ ໄດ້ນໍາເອົາເຄື່ອງຊ່ວຍເຫລືອຈໍານວນໜຶ່ງ ໄປມອບໃຫ້ຄອບຄົວທຸກຍາກ ຢູ່ທີ່ບ້ານ ຫາດຊັນ ເມືອງ ໄຊເສດຖາ ແຂວງ ອັດຕະປື  60 ຄອບຄົວ ເຊິ່ງມີຈໍານວນ ສະມາຊິກຄອບຄົວ ທັງໝົດ 320 ຄົນ, ຍິງ 145 ຄົນ, ລວມມູນຄ່າທັງໝົດ ຂອງເຄື່ອງຊ່ວຍເຫລືອທີ່ນໍາມາມອບໃນຄັ້ງນີ້ ຈໍານວນ 30.000.000  ເຊິ່ງເປັນເຄື່ອງບໍລິໂພກ ປະກອບມີ: ເຂົ້າສານ, ນໍ້າມັນພືດ, ນໍ້າປາ, ໄຂ່, ແປ້ງນົວ ແລະ ເກືອ ເປັນຕົ້ນ.