ການຕີຄີ ກິລາພື້ນເມືອງທີ່ຂາດບໍ່ໄດ້ໃນບຸນພະທາດຫລວງວຽງຈັນ
ການຕີຄີ ແມ່ນກິລາພື້ນເມືອງ ເປັນກິດຈະກຳໜຶ່ງທີ່ຈັດຂຶ້ນໃນຕອນບ່າຍມື້ສຸດທ້າຍຂອງບຸນນະມັດສະການ ພະທາດຫລວງ ເພື່ອເຕົ້າໂຮມຄວາມສາມັກຄີລະຫວ່າງບ້ານຕໍ່ບ້ານ ແລະ ສ້າງຄວາມສາມັກຄີຮັກແພງລະ ຫວ່າງພະນັກງານ ກັບປະຊາຊົນທັງຍັງເປັນກິດຈະກຳທີ່ສາມາດດຶງດູດຄວາມສົນໃຈຂອງມວນຊົນທັງລາວ ແລະ ຕ່າງປະເທດ.
ພາຍຫລັງສຳເລັດພິທີຕັກບາດຖວາຍສັງຄະທານຕອນເຊົ້າມື້ຂຶ້ນ 15 ຄ່ຳເດືອນ 12 ລາວໂດຍໃນຕອນ ບ່າຍມື້ດຽວກັນກໍໄດ້ມີການແຂ່ງຂັນຕາມປະເພນີ. ກ່ອນການແຂ່ງຂັນ ໄດ້ມີພິທີນຳເອົາລູກຄີ ແຫ່ອ້ອມລານພະທາດຫລວງ 3 ຮອບ ກວານຈ້ຳປະຈຳບ້ານທາດຫລວງ ໄດ້ພາຄະນະຝ່າຍລັດຖະບານ ແລະ ຝ່າຍປະ ຊາຊົນຂຶ້ນໄປຄາລະວະຂາບໄຫວ້ບອກກ່າວ. ຈາກນັ້ນກໍແຫ່ໄປທີ່ລານເດີ່ນພະທາດຫລວງ. ໃນການແຂ່ງ ຂັນໃຊ້ເວລາ 50 ນາທີຄື ເວລາທຳອິດ 25 ນາທີ ແລະ ເວລາຫລັງ 25 ນາທີ ໂດຍແຕ່ລະຄະນະມີນັກຕີຄີແຕ່ 20-25 ຄົນ..
ການແຂ່ງຂັນຕີຄື ໄດ້ບົ່ງບອກເຖິງຄວາມສັກສິດ ຊຶ່ງຕາມການເຊື່ອຖືມາແຕ່ບູຮານນະການ ວ່າ: ຖ້າປີໃດ ຝ່າຍປະຊາຊົນ ຊະນະ, ບ້ານເມືອງ ຈະຢູ່ເຢັນເປັນສຸກ ປະຊາຊົນເຂັ້ມແຂງ. ຂະນະດຽວກັນກໍເປັນການບົ່ງບອກເຖິງການສ່ຽງທວາຍຂອງຄົນບູຮານ ບ້ານເມືອງຈະຢູ່ເຢັນເປັນສຸກ ບໍ່ອຶດເຂົ້າ ບໍ່ອຶດປາ ມີເຂົ້າເຕັມນາ ປາເຕັມໜອງ ບ້ານເມືອງມີຄວາມຮົ່ມເຢັນສະຫງົບປອດໄພ ການທຳມາຫາກິນມີທ່ວງທ່າດີຂຶ້ນດັ່ງນີ້ແລ.ຫລັງສຳເລັດການແຂ່ງຂັນກໍໄດ້ແຫ່ລູກຄີກັບຄືນ ແລະ ອັນເຊີນລູກຄີໄປໄວ້ບ່ອນເກົ່າ. ລູກຄີເຮັດດ້ວຍເຫງົ້າໄມ້ໄຜ່ຕັນທາສີຄຳ ແລະ ໄມ້ຄີເຮັດດ້ວຍໄມ້ໄຜ່ທີ່ມີເຫງົ້າ ຫລື ໂຄນຕົ້ນເດ່ອອກມາເປັນຮູບຊົງໂຄ້ງໂດຍທາ ສີຄຳ ແລະ ສີເງິນ. ການແຂ່ງຂັນກິລາພື້ນເມືອງນີ້ຈາກເມື່ອກ່ອນຕ້ອງຕີໃຫ້ໄດ້ໄລຍະໄກທີ່ສຸດ ຈຶ່ງຈະເປັນ ຜູ້ຊະນະ ໄດ້ພັດທະນາມາເປັນການແຂ່ງຂັນແບບໝູ່ຄະນະ. ຂະນະທີ່ກະຕິກາການແຂ່ງຂັນ ກໍປ່ຽນໄປເປັນການຕີລູກຄີໃຫ້ເຂົ້າປະຕູຂອງອີກຝ່າຍໜຶ່ງ
