ດາວິດ ເດ ເກອາ ນັກຮັບ ແມນ ຢູໄນເຕັດ ອາດອົດໄປບານໂລກ 2022 ຫລັງບໍ່ມີຊື່ ຕິດທີມຊາດສະເປນໃນການຄັດໂຕຮອບທຳອິດ

ດາວິດ ເດ ເກອາ ນັກຮັບຈອມເຊັຟຂອງ ແມນເຊັສເຕີ ຢູໄນເຕັດ ສ່ຽງທີ່ຈະພາດຕິດທີມຊາດສະເປນ ໄປແຂ່ງຂັນບານໂລກ 2022 ຄ່ອນຂ້າງສູງ ເມື່ອ ຫລຸຍ ເອນຣິເກ້ ໂຄ໋ດທີມຊາດສະເປນ ເລືອກທີ່ຈະບໍ່ໃສ່ຊື່ 1 ໃນ 5 ຜູ້ຮັກສາປະຕູທີ່ຖືກເລືອກເຂົ້າມາຮອບທຳອິດຈຳນວນ 55 ຄົນ ທີ່ຈະຖືກສົ່ງໃຫ້ຟີຟ່າ ກ່ອນທີ່ຈະຖືກຕັດຕົວ

ອີງຕາມການລາຍງານຂອງ AS ສື່ໃນສະເປນເປີດເຜີຍເລື່ອງໜ້າຕົກໃຈວ່າ ຫລຸຍ ເອນຣິເກ້ ເລືອກໃສ່ຊື່ຜູ້ຮັກສາປະຕູ 5 ທຳອິດຂອງທີມຊາດສະເປນໃຫ້ກັບ ຟີຟ່າ ກ່ອນທີ່ຈະຕັດຊື່ໃຫ້ເຫລືອແຕ່ 3 ຄົນ ເພື່ອໄປລຸຍບານໂລກ 2022. ອູໄນ ຊິມ່ອນ ຂອງ ແອດແລນຕິກ ບີລບາວ, ໂຈເຊ ຣາຍາ ຂອງ ເບຣນຟອດ, ໂຣເບີດ ຊານເຊສ ຂອງ ໄບຣຕັນ ແລະ ເກປ້າ ອາຣິສຊາບາລາກາ ຂອງ ເຊວຊີ ແລະ ເດວິດ ໂຊເລຍ ຈາກ ເຄຕາເຟ່ ໂດຍທີ່ບໍ່ມີເງົາຂອງ ດາວິດ ເດ ເກອາ ຜູ້ຮັກສາປະຕູມື 1 ຈາກບານໂລກ 2018

ເຖິງແມ່ນວ່າ ເດ ເກອາ ຈະລົງສະໜາມຕໍ່ເນື່ອງໃຫ້ກັບ ແມນເຊັສເຕີ ຢູໄນເຕັດ ໃນລະດູການນີ້ ແລະ ຍັງບໍ່ໄດ້ສະແດງໃຫ້ເຫັນຄວາມຜິດພາດໃດໆ. ແຕ່ເຂົາກັບບໍ່ໄດ້ມີຊື່ຕິດຢູ່ໃນທີມຊາດໃນຮອບຄັດເລືອກ, ຈຶ່ງສ້າງຄໍາຖາມຈາກແຟນບານວ່ານີ້ອາດຈະເປັນຜົນພວງຈາກການແຂ່ງຂັນ Euro 2020, ທີ່ ເດ ເກອາ ຖືກເອີ້ນໄປຕິດທີມຊາດເປັນມື 2 ຂອງ ອູໄນ ຊິມ່ອນ ແຖມບໍ່ໄດ້ລົງຫລິ້ນແມ້ແຕ່ນາທີດຽວ ໂດຍເກມສຸດທ້າຍຂອງ ເດ ເກອາ ສໍາລັບທີມຊາດແມ່ນກັບມາໃນເດືອນຕຸລາ 2020, ເມື່ອລາວເຮັດຜິດພາດຈົນເຮັດໃຫ້ ຢູເຄຣນ ເອົາຊະນະ 1-0 ໃນ ນາຊັນລີກ

ແນວໃດກໍ່ຕາມ, ທີມຊາດສະເປນຈະຕ້ອງຕັດໂຕຜູຫລິ້ນລົງອີກ 26 ຄົນສຸດທ້າຍທີ່ຈະໄປຫລິ້ນໃນບານໂລກ 2022, ແລະ ພວກເຂົາຕ້ອງສົ່ງລາຍຊື່ໃຫ້ FIFA ພາຍໃນເດືອນພະຈິກ ກ່ອນເກມນັດເປີດຂອງພວກເຂົາຈະເລີ່ມຂຶ້ນໃນວັນທີ 18 ພະຈິກ ທີ່ປະເທດກາຕ້າ. ນັ້ນຫມາຍຄວາມວ່າ ເດ ເກອາ ຍັງມີໂອກາດທີ່ຈະຢູ່ໃນ 26 ສຸດທ້າຍຂອງຈິງ, ເຖິງແມ່ນວ່າເຂົາບໍ່ໄດ້ຕິດຈາກ 55 ໃນຮອບທໍາອິດກໍ່ຕາມ.