IMF ຫລຸດທ່າອ່ຽງການເຕີບໃຫຍ່ເສດຖະກິດອາຊີ
ເສດຖະກິດອາຊີມີທ່າອ່ຽງຂະຫຍາຍຕົວຫລຸດລົງໃນປີນີ້ ແລະ ປີໜ້າ ຕາມການວິເຄາະຂອງ IMF ເຊິ່ງລະບຸຊັດເຈນວ່າ: ສະຖານະການໃນຈີນ ຖືເປັນຕົວແປທີ່ສົ່ງຜົນກະທົບເປັນວົງກວ້າງ.
ວັນທີ 28 ຕຸລາ 2022, ສຳນັກຂ່າວຕ່າງປະເທດລາຍງານວ່າ: ກອງທຶນການເງິນສາກົນ (IMF) ເຜີຍແພ່ລາຍງານ ຄາດຄະເນການເຕີບໃຫຍ່ທາງເສດຖະກິດຂອງອາຊີ ຢູ່ລະດັບ 4,0% ໃນປີນີ້ ແລະ 4,3% ໃນປີໜ້າ ຫລຸດລົງ 0,9% ແລະ 0,8% ຕາມລຳດັບ ຈາກການຄາດຄະເນໃນເດືອນເມສາຜ່ານມາ ແລະ ສວນທາງສະຖານະການໃນພາບລວມປີຜ່ານມາ ເຊິ່ງເສດຖະກິດຂອງອາຊີຂະຫຍາຍຕົວ 6,5% ຕາມການປະເມີນໂດຍ IMF.
IMF ເບິ່ງວ່າ: ເຖິງວ່າການແພ່ລະບາດຂອງພະຍາດໂຄວິດ-19 ມີທ່າອ່ຽງຫລຸດຜ່ອນລົງ. ເຖິງຢ່າງໃດກໍຕາມ ທັງພາກພື້ນກຳລັງຜະເຊີນແຮງກົດດັນຄັ້ງໃຫຍ່ ຈາກນະໂຍບາຍການເງິນໂດຍທະນາຄານກາງຫລາຍປະເທດ ເພື່ອຫວັງຄວບຄຸມອັດຕາເງິນເຟີ້ທີ່ຍັງເພີ່ມສູງ ແລະ ອຸປະສົງທີ່ຊ້າລົງ “ແບບເໜືອຄວາມຄາດໝາຍ” ໂດຍສະເພາະສະພາບການຂະຫຍາຍຕົວຊ້າຂອງເສດຖະກິດຈີນ ແລະ ກໍລະນີລັດຖະບານປັກກິ່ງຍັງໃຊ້ມາດຕະການຄວບຄຸມພະຍາດໂຄວິດ-19 “ເຂັ້ມງວດໃນລະດັບສູງສຸດ”.
ທັງນີ້, IMF ຄາດຄະເນ ເສດຖະກິດຂອງຈີນເຊິ່ງມີຂະໜາດໃຫຍ່ເປັນອັນດັບ 2 ຂອງໂລກ ແລະ ອັນດັບໜຶ່ງຂອງທະວີບອາຊີ ຈະຂະຫຍາຍຕົວ 3,2% ໃນປີນີ້ ຫລຸດລົງ 1,2% ເມື່ອທຽບໃສ່ການຄາດຄະເນໃນເດືອນເມສາຜ່ານມາ ແລະ ຖືວ່າຫລຸດລົງຫລາຍເມື່ອທຽບໃສ່ສະຖິຕິການຂະຫຍາຍຕົວທາງເສດຖະກິດຂອງຈີນ ສູງເຖິງ 8,1% ໃນປີຜ່ານມາ, ສ່ວນທິດທາງການເຕີບໃຫຍ່ຂອງເສດຖະກິດຈີນໃນປີໜ້າ ແລະ ປີ 2024 ຕາມການວິເຄາະຂອງ IMF ຈະຢູ່ລະດັບ 4,4% ແລະ 4,5% ຕາມລຳດັບ.
