ຈຳນວນຜູ້ເສຍຊີວິດຈາກນ້ຳຖ້ວມໜັກ ຢູ່ອາຊີໃຕ້ເພີ່ມເກີນກວ່າ 1.000 ຄົນແລ້ວ
ເຈົ້າໜ້າທີ່ເປີດເຜີຍວ່າ: ຈຳນວນຜູ້ເສຍຊີວິດຈາກເຫດນ້ຳຖ້ວມໜັກຢູ່ຫລາຍພື້ນທີ່ຂອງອາຊີໃຕ້ເພີ່ມຂຶ້ນເກີນກວ່າ 1.000 ຄົນແລ້ວ, ຂະນະທີ່ທີມກູ້ໄພພະຍາຍາມເຂົ້າໃຫ້ການຊ່ວຍເຫລືອປະຊາຊົນທີ່ຄ້າງຢູ່ພື້ນທີ່ປະສົບໄພພິບັດອີກຫລາຍລ້ານຄົນ.
+ ຍອດຜູ້ເສຍຊີວິດເຄິ່ງຮ້ອຍ ຈາກນ້ຳຖ້ວມໜັກຢູ່ເນປານ
+ ຈຳນວນຜູ້ເສຍຊີວິດຈາກນ້ຳຖ້ວມ ຢູ່ຫວຽດນາມເພີ່ມເປັນ 26 ຄົນ ເສຍຫາຍ 41 ລ້ານໂດລາ
ທະຫານ ແລະ ເຈົ້າໜ້າທີ່ກູ້ໄພຫລາຍພັນຄົນຖືກສົ່ງລົງໄປພື້ນທີ່ຕ່າງໆທົ່ວອິນເດຍ, ບັງກະລາເທດ ແລະ ເນປານ ທີ່ປະສົບເຫດອຸທົກກະໄພຮ້າຍແຮງຈາກຝົນຕົກໜັກໃນລະດູມໍລະສຸມນັບແຕ່ວັນທີ 10 ສິງຫາ. ຫລ້າສຸດເຈົ້າໜ້າທີ່ສາມາດກູ້ຮ່າງຜູ້ເສຍຊີວິດຈາກໄພພິບັດຮ້າຍແຮງຄັ້ງນີ້ໄດ້ແລ້ວທັງໝົດ 1.009 ຄົນ ໂດຍພົບຮ່າງຜູ້ເສຍຊີວິດເພີ່ມ 26 ຄົນຢູ່ລັດພິຫານທາງຕາເວັນອອກຂອງອິນເດຍໃນວັນທີ 24 ສິງຫານີ້. ລັດພິຫານເປັນໜຶ່ງໃນພື້ນທີ່ທີ່ໄດ້ຮັບຜົນກະທົບຢ່າງໜັກ ສົ່ງຜົນໃຫ້ມີຜູ້ເສຍຊີວິດແລ້ວ 367 ຄົນ ແລະ ປະຊາຊົນເກືອບ 11 ລ້ານຄົນໃນ 19 ເມືອງໄດ້ຮັບຜົນກະທົບ.
ໃນລັດອຸຕໍປະເທດທີ່ມີປະຊາກອນອາໄສຢູ່ຢ່າງໜາແໜ້ນ 220 ລ້ານຄົນ ພື້ນທີ່ເຄິ່ງໜຶ່ງຕ້ອງຈົມຢູ່ໃຕ້ນ້ຳ, ມີຜູ້ເສຍຊີວິດແລ້ວ 82 ຄົນ ແລະ ອີກຫລາຍກວ່າ 2 ລ້ານຄົນໄດ້ຮັບຜົນກະທົບ, ສ່ວນຢູ່ເນປານທີ່ມີອານາເຂດເຊື່ອມຕໍ່ກັນ ມີລາຍງານຜູ້ເສຍຊີວິດແລ້ວ 146 ຄົນ, ເຮືອນປະມານ 80.000 ຫລັງໄດ້ຮັບຄວາມເສຍຫາຍ. ອົງການສະຫະປະຊາຊາດ ຫລື UN ລະບຸວ່າ: ເປັນເຫດນ້ຳຖ້ວມຄັ້ງຮ້າຍແຮງທີ່ສຸດໃນຮອບ 15 ປີ.
ເຫດດິນເຈື່ອນຢູ່ບໍລິເວນພູເຂົາຫິມະໄລທາງຕາເວັນຕົກສຽງເໜືອຂອງອິນເດຍຂ້າຊີວິດປະຊາຊົນ 54 ຄົນ. ຂະນະທີ່ສະຖານະການນ້ຳຖ້ວມຢູ່ລັດເບງກໍຕາເວັນຕົກ ແລະ ລັດອຳສຳເລີ່ມຫລຸດຜ່ອນແລ້ວ, ແຕ່ປັດຈຸບັນນີ້ມີລາຍງານຈຳນວນຜູ້ເສຍຊີວິດລວມກັນ 223 ຄົນ.
ຢູ່ບັງກະລາເທດ ມີລາຍງານຈຳນວນຜູ້ເສຍຊີວິດ 138 ຄົນ ແລະ ອີກຫລາຍກວ່າ 7,5 ລ້ານຄົນໄດ້ຮັບຜົນກະທົບຈາກນ້ຳຖ້ວມ. ເຖິງຢ່າງໃດກໍດີ, ລະດັບນ້ຳຢູ່ແມ່ນ້ຳສາຍສຳຄັນ ຄືແມ່ນ້ຳພໍຫົມບຸດ ແລະ ແມ່ນ້ຳຄົງຄາກຳລັງຄ່ອຍໆກັບເຂົ້າສູ່ລະດັບປົກກະຕິ.
