ກອງປະຊຸມລັດຖະບານ ປະຈໍາເດືອນ ຕຸລາ 2022 ໄດ້ພິຈາລະນາຫລາຍບັນຫາ ແລະ ຖອດຖອນບົດຮຽນຈາກການພົວພັນຕ່າງປະເທດ
October 27, 2022 - 3:41 PM
ກອງປະຊຸມລັດຖະບານ ປະຈໍາເດືອນ ຕຸລາ 2022 ໄດ້ໄຂຂຶ້ນ ໃນຕອນເຊົ້າຂອງວັນທີ 26 ຕຸລາ ແລະ ອັດລົງໃນວັນທີ 27 ຕຸລາ 2022 ທີ່ສໍານັກງານນາຍົກລັດຖະມົນຕີ ພາຍໃຕ້ການເປັນປະທານຂອງ ທ່ານ ພັນຄຳ ວິພາວັນ ນາຍົກລັດຖະມົນຕີ, ມີບັນດາທ່ານຮອງນາຍົກລັດຖະມົນຕີ, ສະມາຊິກລັດຖະບານ ແລະ ຜູ້ຕາງໜ້າຈາກບັນດາກະຊວງ ເຂົ້າຮ່ວມ.
ກອງປະຊຸມຄັ້ງນີ້ ໄດ້ປຶກສາຫາລື, ຄົ້ນຄວ້າ, ຕົກລົງ ແລະ ມີທິດຊີ້ນຳ ຕໍ່ຫົວຂໍ້ທີ່ສໍາຄັນຕ່າງໆ ດັ່ງນີ້:
– ພິຈາລະນາ ແລະ ເຫັນດີດ້ານຫລັກການຮັບຮອງ ເອົາບົດສະຫລຸບການຈັດຕັ້ງປະຕິບັດ ວຽກງານພົ້ນເດັ່ນຂອງລັດຖະບານ ໃນເດືອນຕຸລາ ແລະ ທິດທາງແຜນການ ຈັດຕັ້ງປະຕິບັດວຽກງານຈຸດສຸມ ສຳລັບເດືອນ ພະຈິກ 2022 ເຊັ່ນ: ວຽກງານໃນຂົງເຂດເສດຖະກິດ, ປ້ອງກັນຊາດ-ປ້ອງກັນຄວາມສະຫງົບ, ການຕ່າງປະເທດເຊິ່ງບົດສະຫລຸບດັ່ງກ່າວ ຈະກາຍເປັນພື້ນຖານ ໃຫ້ແກ່ການສະຫລຸບຕີລາຄາຜົນການຈັດຕັ້ງປະຕິບັດ ວຽກງານຂອງລັດຖະບານ ໃນໄລຍະ 9 ເດືອນຜ່ານມາ ແລະ ທິດທາງແຜນການໃນຕໍ່ໜ້າ.
– ມອບໃຫ້ຫ້ອງວ່າການສຳນັກງານນາຍົກລັດຖະມົນຕີ ປະສານສົມ ທົບກັບພາກສ່ວນກ່ຽວຂ້ອງ ນຳໄປປັບປຸງຄືນ ຕາມຄຳເຫັນຂອງສະມາຊິກລັດຖະບານ ເພື່ອໃຫ້ມີເນື້ອໃນກະທັດຮັດ, ຈະແຈ້ງ ແລະ ຄົບຖ້ວນ, ໃຫ້ແຕ່ລະຂະແໜງການ ຖືມາດຕະການ ໃນການແກ້ໄຂຂໍ້ຄົງຄ້າງເປັນວຽກບູລິມະສິດເຄັ່ງຮ້ອນ, ພ້ອມນັ້ນ ກໍຕ້ອງເພີ່ມທະວີຄວາມຮັບຜິດຊອບ, ຄວາມ ເປັນເຈົ້າການຂອງສະມາຊິກລັດຖະບານ ໃນການປະຕິບັດໜ້າທີ່ ຕາມຂອບເຂດສິດ, ພາລະບົດບາດ ຂອງຂະແໜງການຕົນ ໃຫ້ສູງເດັ່ນຂຶ້ນກວ່າເກົ່າ.
– ພິຈາລະນາ ແລະ ເຫັນດີດ້ານຫລັກການຮັບຮອງ ເອົາບົດລາຍງານຫຍໍ້ຜົນການຢ້ຽມຢາມຂອງຄະນະທ່ານນາຍົກລັດຖະມົນຕີ ຢູ່ ສ ສິງກະໂປ ຢ່າງເປັນທາງການ ໃນວັນທີ 27-28 ກັນຍາ 2022; ຜົນການຕ້ອນຮັບທ່ານນາຍົກ ລັດຖະມົນຕີ ແຫ່ງ ສ ກູບາ ແລະ ທິດຜັນຂະຫຍາຍ.
– ເຫັນດີໃຫ້ຈັດຕັ້ງຜັນຂະຫຍາຍຜົນການຢ້ຽມຢາມ ສ ສິງກະໂປຂອງທ່ານນາຍົກລັດຖະມົນຕີ ແລະ ຜົນການມາຢ້ຽມຢາມ ສປປ ລາວ ຂອງທ່ານນາຍົກລັດຖະມົນຕີ ກູບາ ຕາມການສະເໜີ ຂອງກະຊວງການຕ່າງປະເທດ; ມອບໃຫ້ກະຊວງກ່ຽວຂ້ອງຜັນຂະຫຍາຍແຕ່ລະໜ້າວຽກ ແລະ ເອົາໃຈໃສ່ຍົກສູງຄວາມຮັບຜິດຊອບໃນການ ຈັດຕັ້ງປະຕິບັດ ແລ້ວລາຍງານຄວາມຄືບໜ້າໃຫ້ລັດຖະບານຊາບ ເປັນແຕ່ລະໄລຍະ.
– ພິຈາລະນາ ແລະ ເຫັນດີດ້ານຫລັກການຮັບຮອງ ເອົາບົດລາຍງານຂອງລັດຖະບານ ທີ່ຈະສະເໜີລາຍງານ ຕໍ່ກອງປະຊຸມສະພາແຫ່ງຊາດສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX.
– ຊີ້ນໍາໃຫ້ຫ້ອງວ່າການສໍານັກງານນາຍົກລັດຖະມົນຕີ ເປັນໃຈກາງປະສານສົມ ທົບກັບກະຊວງແຜນການ ແລະ ການລົງທຶນ, ກະຊວງການເງິນ, ທະນາຄານແຫ່ງ ສປປ ລາວ ແລະ ກະຊວງພາຍໃນ ຮີບຮ້ອນປັບປຸງບົດລາຍງານ ຮ່ວມກັບບັນດາກຳມາທິການກ່ຽວ ຂ້ອງຂອງສະພາແຫ່ງຊາດ ໃຫ້ມີຄວາມເປັນເອກະພາບທາງດ້ານເນື້ອໃນ ແລະ ບັນດາຕົວເລກຄາດໝາຍຕ່າງໆ ໃຫ້ສຳເລັດ ເພື່ອສົ່ງໃຫ້ສະພາແຫ່ງຊາດຕາມກຳນົດເວລາ; ພິຈາລະນາ ແລະ ເຫັນດີດ້ານຫລັກການຮັບຮອງ ເອົາຮ່າງດໍາລັດ ວ່າດ້ວຍທຶນການສຶກສາຕ່າງປະເທດ ແລະ ຜູ້ຮຽນ.
– ຊີ້ນໍາໃຫ້ກະຊວງ ສຶກສາທິການ ແລະ ກິລາ ເປັນໃຈກາງສົມທົບກັບກະຊວງພາຍໃນ ແລະ ກະຊວງຍຸຕິທຳ ປັບປຸງຮ່າງດຳລັດດັ່ງກ່າວ ໃຫ້ມີເນື້ອໃນຄົບຖ້ວນສົມບູນ, ສິ່ງສໍາຄັນ ແມ່ນໃຫ້ເອົາໃຈໃສ່ ການຊຸກຍູ້ສົ່ງເສີມການຍົກລະດັບຄວາມຮູ້, ຄວາມສາມາດ, ການຄຸ້ມຄອງທຶນທີ່ລັດຖະບານ ໄດ້ອະນຸ ມັດໃຫ້ ແລະ ການຄຸ້ມຄອງຜູ້ທີ່ໄປຕໍ່ດ້ວຍທຶນຕົນເອງ;
– ພິຈາລະນາ ແລະ ເຫັນດີດ້ານຫລັກການຮັບຮອງ ເອົາຮ່າງແຜນຜັງແຫ່ງຊາດ ກ່ຽວກັບຄື້ນຄວາມຖີ່ວິທະຍຸສື່ສານ (ສະບັບປັບປຸງ).
– ຊີ້ນໍາໃຫ້ກະຊວງ ເຕັກໂນໂລຊີ ແລະ ການສື່ສານສົມທົບກັບພາກສ່ວນທີ່ກ່ຽວຂ້ອງ ນຳໄປປັບປຸງ ແລະ ຮຽບຮຽງ ຮ່າງແຜນຜັງດັ່ງກ່າວດ້ານຄໍາສັບ ແລະ ເນື້ອໃນໃຫ້ຄົບຖ້ວນ ແລະ ສອດຄ່ອງກັບກົດໝາຍກ່ຽວຂ້ອງຕາມການປະກອບຄຳເຫັນ ຂອງສະມາຊິກລັດຖະບານ ແລະ ໃຫ້ສຳເລັດໂດຍໄວ ແລ້ວນຳສະເໜີທ່ານນາຍົກລັດຖະມົນຕີ ພິຈາລະນາລົງລາຍເຊັນປະກາດໃຊ້.
– ພິຈາລະນາ ແລະ ເຫັນດີດ້ານຫລັກການຮັບຮອງ ເອົາຮ່າງຍຸດທະສາດແຫ່ງຊາດ ເພື່ອການພັດທະນາວຽກງານຊົນເຜົ່າ ປີ 2021-2030 ແລະ ວິໄສທັດຮອດ 2035.
ຊີ້ນໍາໃຫ້ສືບຕໍ່ຄົ້ນຄວ້າຮ່າງຍຸດທະສາດດັ່ງກ່າວ ສຳຄັນດ້ານເນື້ອໃນ ຕ້ອງຮັບປະກັນໃຫ້ສອດຄ່ອງ ກັບບັນດາແນວທາງຂອງພັກ, ລັດຖະທຳມະນູນ ແລະ ກົດໝາຍ
– ມອບໃຫ້ກະຊວງພາຍໃນປະສານສົມ ທົບແນວລາວສ້າງຊາດ, ກຳມາທິການ ທີ່ກ່ຽວຂ້ອງຂອງສະພາແຫ່ງຊາດ ປຶກສາຫາລື ແລະ ຈັດສຳມະນາ ເປັນເອກະພາບດ້ານໂຄງສ້າງ, ເນື້ອໃນແລ້ວ ຈຶ່ງສະເໜີລັດຖະບານພິຈາລະນາ ໃນຂັ້ນຕໍ່ໄປ.
