ເທນຮາກ ເຜີຍວ່າ ຣາຟາເອລ ວາຣານ ໝົດສິດລົງຊ່ວຍສະໂມສອນ ແຕ່ຈະຟິດທັນຫລິ້ນບານໂລກ
ຫລັງຈາກທີ່ປ່ອຍໃຫ້ແຟນບານລຸ້ນຕາມຕັ້ງແຕ່ທ້າຍອາທິດທີ່ຜ່ານມາ ໃນທີ່ສຸດການບາດເຈັບຂອງ ຣາຟາເອລ ວາຣານ ໄດ້ຮັບຄວາມກະຈ່າງແລ້ວຫລັງຈາກ ເອຣິກ ເທນຮາກ ຜູ້ຈັດການຂອງ ແມນເຊັສເຕີ ຢູໄນເຕັດ ຢືນຢັນວ່ານັກເຕະຈະບໍ່ໄດ້ລົງຫລິ້ນໃຫ້ສະໂມສອນອີກແລ້ວກ່ອນພັກເບກການແຂ່ງຂັນບານໂລກ.
ກອງຫລັງຊາວຝຣັ່ງໄດ້ຮັບບາດເຈັບໃນການແຂ່ງຂັນ 1-1 ກັບ ເຊວຊີ, ເບື້ອງຕົ້ນອາການຂອງລາວບໍ່ສູ້ດີ. ຫລັງຈາກຜູ້ກ່ຽວໄດ້ມີການຮ້ອງໄຫ້ອອກມາໂດຍບໍ່ອາຍໃຜ. ໃນບັນດາຄວາມກັງວົນຂອງທັງສະໂມສອນ ແລະ ທີມຊາດວ່າ ລາວອາດຈະໄດ້ຮັບບາດເຈັບຢ່າງຮຸນແຮງຈົນຕ້ອງພັກຍາວ
ຢ່າງໃດກໍຕາມ, ຫລ້າສຸດ ຜີສາດແດງໄດ້ສົ່ງ ວາຣານ ໄປກວດຢ່າງລະອຽດ ແລະ ເຂົາໝົດສິດລົງສະໜາມໃຫ້ກັບທີມໃນອີກ 6 ນັດຕໍ່ຈາກນີ້, ແຕ່ວ່າເຂົາມີແນວໂນ້ມທີ່ຈະກັບຄືນມາຊ່ວຍທີມຊາດຝຣັ່ງໃນການແຂ່ງຂັນບານໂລກ 2022 ເຊິ່ງມີກຳນົດທີ່ຈະເປີດສາກໃນວັນທີ 20 ພະຈິກນີ້
“ຣາຟາເອລ ວາຣານ ບໍ່ໄດ້ຢູ່ໃນທີມ ລາວຕ້ອງພັກຈົນເຖິງບານໂລກ. ລາວຈະບໍ່ລົງຫລິ້ນໃຫ້ ແມນ ຢູໄນເຕັດ ໃນຊ່ວງໂປຣແກມພັກເບກ ແຕ່ຂ້ອຍຄິດວ່າລາວຈະສາມາດລົງຫລິ້ນໃນບານໂລກໄດ້. ແຕ່ພວກເຮົາຕ້ອງລໍຖ້າເບິ່ງການພັດທະນາ ແລະ ການຟື້ນຕົວຂອງລາວ, “ເທນຮາກ ກ່າວ.
