ອົດສະຕຣາລີ ມອບເຄື່ອງຊ່ວຍເຫລືອບັນເທົາທຸຸກເພື່ອຕອບໂຕ້ໄພພິບັດສຸກເສີນ ໃຫ້ ສປປ ລາວ ສຳລັບ 560 ຄອບຄົວລວມມູນຄ່າປະມານ 3,2 ຕື້
ວັນທີ 26 ຕຸລານີ້ 2022 ນີ້ ທີ່ສະໝາມບິນສາກົນວັດໄຕ ນະຄອນຫລວງວຽງຈັນ, ໄດ້ມີພິທີມອບ-ຮັບເຄື່ອງຊ່ວຍເຫລືອຕອບໂຕ້ໄພພິບັດສຸກເສີນປະເພດເຄື່ອງໃຊ້ຄົວເຮືອນ ແລະ ອຸປະກອນໄຟຟ້າແສງຕາເວັນ ສຳລັບ 560 ຄອບຄົວ ຫລື ປະມານ 2.800 ຄົນ ຈາກລັດຖະບານອົດສະຕຣາລີໃຫ້ແກ່ລັດຖະບານແຫ່ງ ສປປ ລາວ ລວມມູນຄ່າ 300.000 ໂດລາອົດສະຕຣາລີ ຫລື ປະມານ 3,2 ຕື້ກັບ; ໂດຍການມອບຮັບຂອງທ່ານ ໂພລ ແຄລີ ເອກອັກຄະລັດຖະທູດອົດສະຕຣາລີ ປະຈຳລາວ ແລະ ທ່ານ ປະເດີມພອນ ສົນທະນີ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ.
ການຈັດສົ່ງເຄື່ອງບັນເທົາທຸກດ້ານວຽກງານມະນຸດສະທໍາໂດຍກອງທັບອົດສະຕຮາລີແມ່ນໜຶ່ງໃນກິດຈະກຳຮ່ວມມືລາວອົດສະຕຣາລີ ເຊິ່ງແມ່ນການຮ່ວມມືປະຈຳປີຂອງທຸກຂະແໜງການຂອງລັດຖະບານອົດສະຕຣາລີ. ໂຄງການນີ້ແມ່ນຖືກຈັດຕັ້ງນຳພາໂດຍກອງທັບອົດສະຕຣາລີ ເພື່ອສະໜັບສະໜູນການຮ່ວມມືຫວ່າງກະຊວງປ້ອງກັນປະເທດຂອງລາວ ແລະ ອົດສະຕຣາລີກັບບັນດາປະເທດໃນພາກພື້ນ ເຊິ່ງລວມມີ ສປປ ລາວ. ເພື່ອກຽມຄວາມພ້ອມໃນການຮັບມືກັບໄພພິບັດທາງທຳມະຊາດທີ່ອາດຈະເກີດຂຶ້ນ ແລະ ສາມາດຊ່ວຍປະຊາຊົນ ຈະຖືກກະທົບໄດ້ຢ່າງມີປະສິດຕິພາບເພື່ອຊ່ວຍໃຫ້ເຂົາເຈົ້າຟື້ນຟູຈາກຜົນກະທົບຂອງໄພພິບັດ.
ທ່ານ ທູດອົດສະຕຣາລີ ປະຈຳລາວ ກ່າວວ່າ: ເຄື່ອງຊ່ວຍເຫລືອເຫລົ່ານີ້ແມ່ນເຄື່ອງໃຊ້ອັນຈຳເປັນທີ່ສຸດສຳລັບປະຊາຊົນທີ່ໄດ້ຮັບຜົນກະທົບຈາກໄພພິບັດ ແລະ ລັດຖະບານອົດສະຕຣາລີມີຄວາມມຸ່ງໝັ້ນທີ່ຈະສະໜັບສະໜູນລັດຖະບານລາວ ໃນວຽກງານດ້ານມະນຸດສະທຳ ແລະ ຕອບໂຕ້ໄພພິບັດ ແລະ ການຟື້ນຟູໂດຍຜ່ານການຮ່ວມມືດ້ານການພັດທະນາຂອງອົດສະຕຣາລີ.
ໂອກາດນີ້, ທ່ານ ປະເດີມພອນ ສົນທະນີ ໄດ້ກ່າວວ່າ: ລັດຖະບານລາວຕີລາຄາສູງຕໍ່ກັບການສະໜອງເຄື່ອງຊ່ວຍເຫລືອດ້ານມະນຸດສະທຳຈາກລັດຖະບານອົດສະຕຣາລີ. ການຊ່ວຍເຫລືອດັ່ງກ່າວຈະຊ່ວຍສ້າງການກຽມຄວາມພ້ອມແລະຄວາມອາດສາມາດໃນການຮັບມືກັບໄພພິບັດ, ໂດຍສະເພາະແມ່ນໄພນໍ້າຖ້ວມທີ່ເກີດຂຶ້ນຢູ່ເລື້ອຍໆ ແລະ ມີຄວາມຮຸນແຮງ.
