ປະເທດຢູກັນດາ ອີໂບລາລະບາດຮອບທີ 7 ຄາດວ່າຈະຄວບຄຸມໄດ້ໃນທ້າຍປີນີ້
ລັດຖະບານຢູກັນດາກຳນົດເປົ້າໝາຍ ຄວບຄຸມການແພ່ລະບາດຂອງອີໂບລາຮອບປັດຈຸບັນ ເຊິ່ງເປັນຮອບທີ 7 ແລະ ມີຜູ້ເສຍຊີວິດແລ້ວ 27 ຄົນ ໃຫ້ໄດ້ໃນທ້າຍປີນີ້.
ວັນທີ 23 ຕຸລາ 2022, ສຳນັກຂ່າວຕ່າງປະເທດລາຍງານວ່າ: ກະຊວງສາທາລະນະສຸກຂອງຢູກັນດາລາຍງານສະຖານະການການແພ່ລະບາດຂອງພະຍາດອີໂບລາຮອບຫລ້າສຸດ ເຊິ່ງເປັນຄັ້ງທີ 7 ມີການປະກາດໃນວັນທີ 20 ກັນຍາຜ່ານມາ ວ່າມີຜູ້ຕິດເຊື້ອເສຍຊີວິດສະສົມຢ່າງໜ້ອຍ 65 ຄົນ ແລະ ເສຍຊີວິດແລ້ວ 27 ຄົນ ເປັນວິກິດດ້ານສາທາລະນະສຸກທີ່ສາມາດຄວບຄຸມໄດ້ ແລະ ເຊື່ອວ່າສະຖານະການຈະສາມາດຢຸດຕິໄດ້ໃນທ້າຍປີນີ້.
ທັງນີ້, ປະທານາທິບໍດີ ໂຢເວຣີ ມູເຊເວນີ ຜູ້ນຳຢູກັນດາ ປະກາດໃນວັນທີ 15 ຕຸລາຜ່ານມາ ບັງຄັບໃຊ້ມາດຕະການ “ຈຳກັດການເຄື່ອນຍ້າຍ” ຂອງປະຊາຊົນ ໃນເຂດມູເບນເດ ແລະ ເຂດຄາຊັນດາ ເຊິ່ງລວມທັງເຄີຟິວລະຫວ່າງເວລາ 19:00 ໂມງ ຮອດ 06:00 ໂມງ ຕາມເວລາທ້ອງຖິ່ນ ລວມທັງການປິດສະຖານບັນເທີງ ແລະ ສາສະນະສະຖານ. ມາດຕະການດັ່ງກ່າວມີຜົນບັງຄັບໃຊ້ເປັນເວລາຢ່າງໜ້ອຍ 21 ວັນ ເພື່ອຄວບຄຸມສະຖານະການການແພ່ລະບາດຂອງພະຍາດອີໂບລາ.
ສຳລັບກໍລະນີທີ່ເຊື້ອໄວຣັສອີໂບລາເຊິ່ງກຳລັງແພ່ລະບາດຢູ່ໃນຢູກັນດາຮອບນີ້ ເປັນເຊື້ອສາຍພັນຊູດານ ເຊິ່ງພົບເປັນຄັ້ງທຳອິດໃນຮອບ 1 ທົດສະວັດ ສ້າງຄວາມກັງວົນໃຫ້ອົງການອະນາໄມໂລກ (WHO) ເນື່ອງຈາກຍັງບໍ່ມີວັກຊີນຕ້ານໂດຍກົງ.
ຢູກັນດາຜະເຊີນການແພ່ລະບາດໃຫຍ່ຄັ້ງຫລ້າສຸດຂອງພະຍາດອີໂບລາ ໃນປີ 2019 ມີຜູ້ຕິດເຊື້ອຢືນຢັນ 24 ຄົນ ແລະ ເສຍຊີວິດ 17 ຄົນ ຕິດເປັນອັດຕາການເສຍຊີວິດ 71%.
