ຄອນເຕ້ ຂໍຮ້ອງສະໂມສອນເສີມທີມດ່ວນ ຫລັງ ສະເປີ ເສຍໃຫ້ ນິວຄາສເຊິລ 1 – 2
ອັນໂຕນີໂອ ຄອນເຕ ຜູ້ຈັດການທີມ ຮັອດແນມ ຮັອດສະເປີ ໃຫ້ເຫດຜົນຫລັງຈາກທີມ ເສຍໃຫ້ ນິວຄາສເຊິລ ຢູໄນເຕັດ ຄາຖິ່ນ 2-1 ໃນເກມ ພຣີເມຍລີກ ເມື່ອວັນອາທິດທີ 23 ຕຸລາ ວ່າເກີດຈາກບັນຫານັກເຕະບາດເຈັບ ເຊິ່ງສະໂມສອນຈຳເປັນ ຕ້ອງເສີມທີມອີກ ໃນເດືອນມັງກອນ.
ຄອນເຕ ຜູ້ຈັດການສະເີ ຢືນຢັນວ່າການຂາດເນັກເຕະເຊ່ິງຕ້ອງລົງສະໜາມຢ່າງຕໍ່ເນື່ອງ ຈົນບາດເຈັບສົ່ງຜົນກະທົບເຮັດໃຫ້ສະເປີ ບໍ່ອາດຢືນໄລຍະສ້າງຜົນງານທີ່ດີໄດ້ ພ້ອມຕັ້ງຄວາມຫວັງວ່າສະໂມສອນຈະຈ່າຍຕະຫລາດອີກຮອບໄລຍະປີໃຫມ່ ເນື່ອງຈາກມີ ຄວາມຈຳເປັນຕໍ່ການລົງຫລິ້ນ ພຣີເມຍລີ ເຊັ່ນດຽວກັນ.
“ ກ່ອນປະຕູທຳອິດຂອງເກມ ເຮົາສ້າງໂອກາດທີ່ຈະໄດ້ປະຕູຫລາຍຄັ້ງ ບາງເທື່ອຫາກເຮົາຍິງປະຕູໄດ້ດີ ເຮົາກໍໜ້າຈະໄດ້ປະຕູ ຈາກນັ້ນ ສະຖານະການກໍເກີດຂຶ້ນ ຂ້ອຍບໍ່ຕ້ອງການວິຈານຜູ້ຕັດສິນ ຂ້ອຍບໍ່ຢາກໃຫ້ຄວາມຄິດເຫັນ ” ຄອນເຕ້ ກ່າວເຖິງ ການເສຍປະຕູທຳອິດໃນເກມ.
“ ມັນບໍ່ດີເລີຍ ເຮົາເສຍປະຕູຈາກບານໂຍນຍາວ ເຮົາພວມມີໄລຍະເວລາທີ່ດີ ແລ້ວສຸດທ້າຍນິວຄາສເຊິລ ກໍໄດ້ປະຕູທຳອິດ ປະຕູທີສອງກໍຕາມມາ ຈັງຫວະໂຕ້ກັບ ແລະ ຈາກນັ້ນມັນຢາກທີ່ເຮົາຈະກັບມາໄດ້ ”.
“ ໃນເດືອນມັງກອນນີ້ ເຮົາຈະຖ້າເບິ່ງວ່າເຮົາເປັນແບບໃດ ສະໂມສອນຮູ້ດີ ມັນຈະແຈ້ງຕັ້ງແຕ່ໄລຍະຕົ້ນລະດູການ ຫາກເຮົາ ຕ້ອງການຫລິ້ນໃນພຣີເມຍລີກ ແລະ ແຊ໊ມປຽນລີກ ເຈົ້າກໍຈຳເປັນຕ້ອງປັບປຸງຂຸມກຳລັງ ເມື່ອເຈົ້າຫລິ້ນ ຫລິ້ນ ຫລິ້ນ ອາການບາດເຈັບສາມາດເກີດຂຶ້ນໄດ້ ເມື່ອນັກເຕະສາມສີ່ຄົນຫາຍໄປ ມັນກໍເປັນບັນຫາສຳຫລັບທີມຢ່າງ ສະເປີ ”.
