ສີລັງກາໄຟຂຽວກົດໝາຍຄຸມອຳນາດປະທານາທິບໍດີ ຫວັງຫລຸດຄວາມບໍ່ພໍໃຈຂອງປະຊາຊົນ

ລັດຖະບານສີລັງກາໄດ້ລົງມະຕິສະໜັບສະໜູນຮ່າງກົດໝາຍທີ່ຈະຄວບຄຸມອຳນາດຂອງປະທານາທິບໍດີ ເຊິ່ງເປັນຄວາມພະຍາຍາມທີ່ຈະຫລຸດຄວາມບໍ່ພໍໃຈຂອງປະຊາຊົນ ຫລັງ Kothaphaya Ratchapaksa ອະດີດປະທານາທິບໍດີສີລັງກາໄດ້ນຳພາປະເທດເຂົ້າສູ່ວິກິດເສດຖະກິດຄັ້ງຮ້າຍແຮງທີ່ສຸດນັບແຕ່ປະກາດເອກະລາດ.     ສຳນັກຂ່າວບລູມເບິກລາຍງານວ່າ: ຫລັງການອະພິປາຍເປັນເວລາ 2 ວັນ ສະມາຊິກລັດຖະສະພາ 174 ຄົນຈາກທັງໝົດ 225 ຄົນສະໜັບສະໜູນຮ່າງກົດໝາຍດັ່ງກ່າວ ເຊິ່ງຖືເປັນຄວາມຄືບໜ້າໃນຄວາມພະຍາຍາມທີ່ຈະປະຕິຮູບການເມືອງ ເພື່ອຄວບຄຸມອຳນາດຂອງປະທານາທິບໍດີ ແລະ ເຮັດໃຫ້ຕຳແໜ່ງປະທານາທິບໍດີຕ້ອງມີຄວາມຮັບຜິດຊອບຕໍ່ສະພານິຕິບັນຍັດເພີ່ມຂຶ້ນ.    ກົດໝາຍດັ່ງກ່າວຖືເປັນຫົວໃຈສຳຄັນສຳລັບແຜນການຂອງ Ranil Wickremesinghe ປະທານາທິບໍດີຄົນປັດຈຸບັນ ເຊິ່ງຕ້ອງອາໄສການສະໜັບສະໜູນຈາກສະມາຊິກສະພານິຕິບັນຍັດຂອງພັກສີລັງກາ Poduchana Peramuna ຂອງຕະກູນ Ratchapaksa ທີ່ຍັງຢູ່ໃນອຳນາດ ແລະ ກຳລັງຊຸກຍູ້ໃຫ້ມີການອະນຸມັດຂັ້ນສຸດທ້າຍສຳລັບໂຄງການຂອງກອງທຶນການເງິນສາກົນ (IMF) ມູນຄ່າ 2,9 ພັນລ້ານໂດລາ ເພື່ອຊ່ວຍໃຫ້ສີລັງກາຫລຸດພົ້ນຈາກວິກິດເສດຖະກິດ.