ປະຊາຊົນສ່ອງແສງບັນຫາການສັນຈອນ ຈຸດທີ່ມັກເກີດອຸບັດຕິເຫດ
October 21, 2022 - 2:16 PM
ປະຊາຊົນທີ່ໃຊ້ເສັ້ນທາງ ສົມສະຫງ່າ-ຄຳສະຫວາດ ເມືອງໄຊເສດຖາ ນະຄອນຫລວງວຽງວຽງຈັນ ສ່ອງແສງວ່າ ເສັ້ນທາງ ເລນທີ່ມາແຕ່ບ້ານສົມສະຫງ່າ ແດນຕໍ່ບ້ານຄຳສະຫວາດ ກົງກັນຂ້າມຊ້າຍສວຍກັບຈຸດຂາຍກ້ວຍ ຂີ່ມາແລ້ວເລນໜຶ່ງບໍ່ມີ ສ້າງອັນຕະລາຍແກ່ຜູ້ໃຊ້ລົດໃຊ້ຖະໜົນ.
ວັນທີ 21 ຕຸລາ 2022 ນີ້ ທີມຂ່າວໜັງສືພິມລາວພັດທະນາ ໄດ້ລົງໄປເບິ່ງຕົວຈິງພົບວ່າ: ຈຸດດັ່ງກ່າວ ເປັນເສັ້ນທາງສີ່ເລນ ທີ່ປູດ້ວຍເບຕົງ ແຕ່ພໍຂີ່ມາເຖິງຈຸດດັ່ງກ່າວ ເລນຂອບ ຍັງກໍ່ສ້າງບໍ່ທັນສຳເລັດເທື່ອ ລົດທີ່ແລ່ນມາຕ້ອງຄ່ອຍໆລ້ຽວຍ້າຍມາເລນກາງ ເຮັດໃຫ້ການສັນຈອນພົບບັນຫາ.
ປະຊາຊົນທີ່ອາໄສຢູ່ເຂດດັ່ງກ່າວໃຫ້ສຳພາດວ່າ: ເສັ້ນທາງດັ່ງກ່າວໄດ້ຮັບການກໍ່ສ້າງ ແລະ ເປີດນຳໃຊ້ມາໄດ້ຫລາຍປີສົມຄວນ ແຕ່ຍັງພົບວ່າຈຸດດັ່ງກ່າວຖືກປ່ອຍປະລະເລີຍ. ຜ່ານມາມີອຸບັດເຫດເກີດຂຶ້ນຈຳນວນຫລາຍ ໂດຍສະເພາະກາງຄືນ ບວກໃສ່ກັບເສັ້ນທາງມືດຍ້ອນບໍ່ມີໄຟເຍືອງທາງ, ເພື່ອແກ້ໄຂບັນຫາສະເພາະໜ້າ ໄດ້ມີການນຳເອົາແທ່ງແບຣີເອີຢາງ ມາກັ້ນເປັນສັນຍະລັກເຕືອນໄວ້.
ສຳລັບທ່ານໃດຈະເດີນທາງເສັ້ນດັ່ງກ່າວຕ້ອງລະມັດລະວັງເພື່ອປ້ອງກັນອຸບັດເຫດ.
ອີກຢ່າງນຶ່ງ ຝາກເຖິງພາກສ່ວນກ່ຽວຂ້ອງລົງກວດກາເບິ່ງຕົວຈິງ ວ່າບັນຫາດັ່ງກ່າວນີ້ ຖືກປ່ອຍປະລະເລີຍມາເປັນເວລາດົນສົມຄວນໄດ້ແນວໃດ ແລະ ຈະມີທິດທາງແກ້ໄຂຄືແນວໃດ ເພື່ອບໍ່ໃຫ້ເກີດມີການສູນເສຍຊີວິດ ແລະ ຊັບສິນ ແກ່ຜູ້ໃຊ້ລົດໃຊ້ຖະໜົນຜ່ານຈຸດດັ່ງກ່າວນັ້ນ.
