ຫວຽດນາມເພີ່ມການກັ່ນນ້ຳມັນດິບ ເພື່ອຫລຸດການນຳເຂົ້າ
ໂຮງກັ່ນນ້ຳມັນດິບຂະໜາດໃຫຍ່ຂອງຫວຽດນາມເພີ່ມເພດານການຜະລິດອີກ ເພື່ອໃຫ້ສາມາດຮອງຮັບຄວາມຕ້ອງການພາຍໃນປະເທດ ແລະ ຫລຸດການນຳເຂົ້າ.
ວັນທີ 20 ຕຸລາ 2022, ສຳນັກຂ່າວຕ່າງປະເທດລາຍງານວ່າ: ກະຊວງພະລັງງານຂອງຫວຽດນາມອອກຖະແຫລງການວ່າ: ບໍລິສັດໂຮງກັ່ນ ແລະ ປິໂຕຣເຄມີບິ່ງເຊິນ ຕັ້ງຢູ່ແຂວງກວາງງາຍ ທາງຕອນກາງຂອງປະເທດ ປັດຈຸບັນມີກຳລັງການຜະລິດວັນລະ 130.000 ບາເຣລ ກຽມເພີ່ມອຸປະທານອີກເປັນ 110% ເພື່ອໃຫ້ສອດຄ່ອງກັບອຸປະສົງ ແລະ ເພື່ອຮັກສາສະຖຽນລະພາບໃຫ້ແກ່ຕະຫລາດ.
ການເຄື່ອນໄຫວດັ່ງກ່າວເກີດຂຶ້ນ ຫລັງກະຊວງອຸດສາຫະກຳຂໍໃຫ້ທະນາຄານກາງເພີ່ມການອຳນວຍຄວາມສະດວກໃຫ້ຜູ້ປະກອບການເຊື້ອໄຟລະດັບທ້ອງຖິ່ນ ໃນການເຂົ້າເຖິງເງິນຕາຕ່າງປະເທດເພື່ອໃຊ້ໃນການນຳເຂົ້າເຊື້ອໄຟ ທ່າມກາງວິກິດເຄັ່ງຕຶງດ້ານພະລັງງານພາຍໃນຫວຽດນາມ ໂດຍສະເພາະໃນພາກໃຕ້ຂອງປະເທດ ເຊິ່ງຕ້ອງຈຳກັດການຂາຍນ້ຳມັນ ຫລື ປ້ຳນ້ຳມັນບາງແຫ່ງຕ້ອງຢຸດໃຫ້ບໍລິການຊົ່ວຄາວ.
ທັງນີ້, ສະຖິຕິຈາກສຳນັກງານພາກອນອາການແຫ່ງຊາດຂອງຫວຽດນາມ ເປີດເຜີຍສະຖິຕິການນຳເຂົ້າເຊື້ອໄຟກັ່ນໃນໄລຍະ 9 ເດືອນທຳອິດຂອງປີນີ້ ບັນລຸ 6,52 ລ້ານໂຕນ ເພີ່ມຂຶ້ນ 22,7% ເມື່ອທຽບໃສ່ສະຖິຕິແບບປີຕໍ່ປີ. ເຖິງຢ່າງໃດກໍຕາມ, ຖ້າຄິດໄລ່ໃນຮູບແບບຂອງມູນຄ່າການນຳເຂົ້າ ຈະມີ 6.800 ລ້ານໂດລາສະຫະລັດ ເພີ່ມຂຶ້ນ 131% ເມື່ອທຽບໃສ່ແບບປີຕໍ່ປີ.
