ປັກກິ່ງສ່ຽງຖືກລັອກດາວອີກຮອບ ຫລັງພົບຜູ້ຕິດເຊື້ອເກືອບ 200 ຄົນໃນ 10 ວັນ
ໃນຂະນະທີ່ນະໂຍບາຍໂຄວິດເປັນສູນຂອງຈີນກຳລັງຖືກວິພາກວິຈານວ່າເປັນສາເຫດເຮັດໃຫ້ເສດຖະກິດຫລຸດຖອຍ, ນະຄອນຫລວງປັກກິ່ງ ເມືອງຫລວງຂອງປະເທດ ຕ້ອງຜະເຊີນຄວາມສ່ຽງຕໍ່ການລັອກດາວອີກຮອບ ຫລັງພົບຜູ້ຕິດເຊື້ອໂຄວິດ-19 ເພີ່ມຂຶ້ນເກືອບ 200 ຄົນ ໃນເວລາ 10 ວັນ.
ໜ່ວຍງານດ້ານສຸຂະພາບຂອງນະຄອນຫລວງປັກກິ່ງ ກຳລັງເພີ່ມຄວາມພະຍາຍາມໃນການຢຸດຢັ້ງການລະບາດຂອງພະຍາດໂຄວິດ-19 ໃນເມືອງເຊິ່ງມີປະຊາກອນອາໄສຢູ່ 21 ລ້ານຄົນ ຫລັງຈາກມີລາຍງານພົບຜູ້ຕິດເຊື້ອເພີ່ມຂຶ້ນ 18 ຄົນໃນວັນທີ 20 ຕຸລາ ເຮັດໃຫ້ຈຳນວນລວມຜູ້ຕິດເຊື້ອໃນໄລຍະ 10 ວັນຜ່ານມາເພີ່ມເປັນ 197 ຄົນ ເພີ່ມຂຶ້ນເຖິງ 4 ເທົ່າຈາກໄລຍະເວລາ 10 ວັນກ່ອນໜ້າທີ່ມີຜູ້ຕິດເຊື້ອໃໝ່ພຽງ 49 ຄົນ.
ຈຳນວນຜູ້ຕິດເຊື້ອທີ່ເພີ່ມຂຶ້ນ ເຮັດໃຫ້ນະຄອນຫລວງປັກກິ່ງປະກາດຍົກລະດັບການກວດທົດລອງເຊື້ອໃນພື້ນທີ່ທີ່ມີຄົນໜາແໜ້ນເຊັ່ນ: ຊຸບເປີມາເກັດ ແລະ ສູນອອກກຳລັງກາຍ, ສັ່ງລັອກດາວບໍລິເວນທີ່ພົບຜູ້ຕິດເຊື້ອເປັນເວລາ 3 ວັນ ໂດຍອາດມີການຂະຫຍາຍເວລາ ແລະ ພື້ນທີ່ອື່ນໆຕໍ່ໄປຖ້າພົບຈຳນວນຜູ້ຕິດເຊື້ອເພີ່ມສູງຂຶ້ນ.
ຜ່ານມາ, ເຖິງວ່າຈຳນວນຜູ້ຕິດເຊື້ອ ແລະ ເສຍຊີວິດຈາກໂຄວິດ-19 ຂອງຈີນຈະຢູ່ໃນລະດັບຕໍ່າເມື່ອທຽບໃສ່ປະເທດອື່ນໆ, ແຕ່ລັດຖະບານຈີນຍັງຢຶດໝັ້ນໃຊ້ນະໂຍບາຍໂຄວິດເປັນສູນ ເພື່ອຕັດໄຟແຕ່ຕົ້ນລົມ, ຄວບຄຸມການລະບາດໃຫ້ຢູ່ໃນວົງຈຳກັດໜ້ອຍທີ່ສຸດ.
