ນາງ ທະນາພອນ ຊວ້ານສວນດາວ ຄວ້າລາງວັນນັກສຶກສາທີ່ສາມາດອອກແບບໄດ້ດີເດັ່ນ ທັງເປັນຕົວເຂົ້າຮ່ວມແຂ່ງຂັນອອກແບບສະຖາປັດລະດັບອາຊີ

ວັນທີ 19 ຕຸລາ 2022 ຜ່ານມາ,  ນາງ ທະນາພອນ ຊວ້ານສວນດາວ ນັກສຶກສາ ຄະນະສະຖາປັດຕະຍະກຳສາດ ມະຫາວິທະຍາໄລແຫ່ງຊາດ ສາມາດຄວ້າລາງວັນນັກສຶກສາທີ່ສາມາດອອກແບບໄດ້ດີເດັ່ນ ພາຍໃຕ້ຫົວຂໍ້ “ການອອກແບບສະຖາປັດຕະຍະກຳພາຍຫຼັງເກີດພະຍາດໂຄວິດ-19” ຂອງຄະນະສະຖາປັດຕະຍະກຳສາດ ຮອບສຸດທ້າຍ ໃນພິທີເປີດການແຂ່ງຂັນການອອກແບບ ຢູ່ຄະນະສະດັ່ງກ່າວ, ພ້ອມທັງກາຍເປັນຕົວແທນນັກສຶກສາລາວ ກຽມເຂົ້າຮ່ວມແຂ່ງຂັນອອກແບບສະຖາປັດລະດັບອາຊີ ຄັ້ງທີ XI ທີ່ມະຫາວິທະຍາໄລລາດກະບັງ ປະເທດໄທ ໃນລະຫວ່າງວັນທີ 19-20 ພະຈິກ 2022 ນີ້.

ໂອກາດນີ້, ທ່ານ ສິນທະວອນ ດາລາວົງ ກ່າວໃຫ້ຮູ້ວ່າ: ການຄັດເລືອກນັກສຶກສາທີ່ມີຜົນງານການອອກແບບດີເດັ່ນເປັນຕົວແທນຂອງ ສປປ ລາວ ເຂົ້າຮ່ວມແຂ່ງຂັນລາຍການໃຫຍ່ ທີ່ປະເທດໄທ, ຍັງເປັນສ້າງໂອກາດໃຫ້ນັກສຶກສາ ແລະ ຄູອາຈານຂອງພວກເຮົາໄດ້ມີໂອກາດແລກປ່ຽນບົດຮຽນ ແລະ ສະແດງຜົນງານທາງດ້ານວິຊາການອອກແບບຂອງຕົນໃນເວທີສາກົນອີກດ້ວຍ. ແນວໃດກໍດີ, ໃນໄລຍະຜ່ານມາ ນັກສຶກສາທີ່ໄດ້ເປັນຕົວແທນຂອງ ສປປ ລາວ ໄດ້ສ້າງຜົນງານໃນລະດັບດີຫຼາຍໃນການແຂ່ງຂັນທີ່ມີບັນດາມະຫາວິທະຍາໄລທົ່ວອາຊີເຂົ້າຮ່ວມ ໂດຍສະເພາະປີ 2018 ສາມາດໄດ້ທີ 3 ແລະ ປີ 2019 ໄດ້ອັນດັບທີ 4. ຜົນງານດັ່ງກ່າວ ເປັນການຍົກສູງບົດບາດຂອງ ຄສປ ກໍຄື ມຊ ໃຫ້ສູງຂຶ້ນ ເຊື່ອມໂຍງໃນເວທີພາກພື້ນ ແລະ ສາກົນ. ພ້ອມກັນນັ້ນ, ກິດຈະກຳທີ່ ຄສປ ຈັດຂຶ້ນ ຍັງຈະຊ່ວຍຊຸກຍູ້ສົ່ງເສີມວຽກງານຮ່ວມມືກັບບັນດາສະຖາບັນ ແລະ ການຈັດຕັ້ງ ທັງພາຍໃນ ແລະ ຕ່າງປະເທດໃຫ້ກວ້າງຂວາງຂຶ້ນຕື່ມອີກ.

ຂໍ້ມູນ: ໜັງສີພິມສຶກສາ-ກິລາລາຍວັນ