ປີນີ້ລັດຈະສູ້ຊົນເກັບລາຍຮັບໃຫ້ໄດ້ສູງກວ່າ 98%

ກະຊວງການເງິນ ໃຫ້ຮູ້ວ່າ: ຄາດຄະເນການຈັດຕັ້ງປະຕິບັດແຜນງົບປະມານແຫ່ງລັດໝົດປີ 2017 ໃນດ້ານລາຍຮັບແມ່ນຈະໄດ້ທັງໝົດປະມານ 23.489 ຕື້ກີບເທົ່າກັບ 98,1% ຂອງແຜນການປີເທົ່ານັ້ນ, ໃນນັ້ນລາຍຮັບຊ່ວຍເຫລືອລ້າກວມປະມານ 103% ແລະ ລາຍຮັບພາຍໃນຈະໄດ້ປະມານ 20.923 ຕື້ກີບເທົ່າກັບ 97,5% ຂອງແຜນການປີ, ໂດຍຂະແໜງສ່ວຍສາອາກອນຈະໄດ້ພຽງ 95%, ພາສີຈະບັນລຸໄດ້ 100%, ສ່ວນພາກລັດວິສາຫະກິດ ແລະ ການປະກັນໄພຈະບັນລຸຫລາຍກວ່າ 103%, ການຄຸ້ມຄອງຊັບສີນຂອງລັດຈະໄດ້ພຽງ 95% ຂອງແຜນການປີ ແລະ ລາຍຮັບອື່ນໆກໍຈະໄດ້ປະມານ 49 ຕື້ກວ່າກີບ. ສ່ວນດ້ານລາຍຈ່າຍທັງໝົດຈະມີປະມານ 31.508 ຕື້ກີບເທົ່າກັບ 97,24% ຂອງແຜນການປີ, ເຊິ່ງເຫັນວ່າການຂາດດຸນຈະມີປະມານ 8.000 ກວ່າຕື້ກີບ.

ກະຊວງດັ່ງກ່າວໃຫ້ຮູ້ວ່າ: ມີລາຍປັດໃຈພາໃຫ້ການເກັບລາຍຮັບໝົດປີບໍ່ໄດ້ຕາມແຜນຄື: ອາກອນກໍາໄລຈາກບໍ່ຄໍາທີ່ຈໍານວນ 200 ຕື້ກີບແມ່ນບໍ່ສາມາດປະຕິບັດໄດ້ຍ້ອນສະພາບການດໍາເນີນທຸລະກິດບໍ່ຄ່ອງ ຈຶ່ງຕົວເຮັດໃຫ້ຫົວໜ່ວຍ ທຸລະກິດສ່ວນໃຫຍ່ມອບພັນທະຫລຸດລົງ, ຂະນະດຽວກັນລາຍຮັບໃນຂະແໜງບໍ່ແຮ່ກໍຄາດວ່າຈະບໍ່ໄດ້ຕາມແຜນຍ້ອນພວມຢູ່ໃນຊ່ວງການສໍາຫລວດ, ຊອກຄົ້ນ, ຂະນະທີ່ຂະແໜງການໄຟຟ້າກໍພວມຢູ່ໃນໄລຍະກໍ່ສ້າງ ແລະ ຍົກເວັ້ນອາກອນຕາມເງື່ອນໄຂຂອງຜູ້ໃຫ້ກູ້ຢືມ, ເຊິ່ງບໍ່ທັນໄດ້ສ້າງລາຍຮັບໃຫ້ແກ່ລັດ, ນອກນີ້ ລາຍຮັບຊັບພະຍາກອນທໍາມະຊາດຂອງບໍລິສັດພູເບ້ຍມາຍນິ້ງ ແມ່ນຍັງມີໜີ້ ຄ້າງມອບຈໍານວນ 20,42 ລ້ານໂດລາສະຫະລັດ ທີ່ຕິດພັນກັບການຫັກເອົາຄ່າຊັບພະຍາກອນກັບອາກອນມູນຄ່າເພີ່ມ ແລະ ບັນດາສາເຫດອື່ນໆ.

ແນວໃດກໍຕາມ, ເພື່ອຮັບປະກັນໃຫ້ການຈັດເກັບລາຍຮັບງົບປະມານຕ້ອງບໍ່ຫລຸດ 98% ຕາມຄາດຄະເນໄວ້ນັ້ນ, ແມ່ນຈະສືບຕໍ່ດໍາເນີນມາດຕະການຕ່າງໆ ໃຫ້ເຂັ້ມງວດຄື: ເພີ່ມທະວີຄວາມເຂັ້ມງວດໃນການຈັດເກັບລາຍຮັບຂະແໜງພາສີ ໂດຍສຸມໃສ່ການເກັບລາຍຮັບຈາກນໍ້າມັນເຊື້ອໄຟ, ຍານພາຫະນະ, ວັດສະດຸກໍ່ສ້າງ, ເຄື່ອງໄຟຟ້າ ແລະ ເຄື່ອງອຸປະໂພກ-ບໍລິໂພກຕ່າງໆ, ສ່ວນດ້ານສ່ວຍສາອາກອນແມ່ນສຸມໃສ່ບັນດາຫົວໜ່ວຍທຸລະກິດຂະໜາດກາງ ແລະ ໃຫຍ່ທີ່ຈະໄດ້ລາຍຮັບເພີ່ມຈາກມາດຕະການລົງກວດກາໄວ, ພ້ອມທັງຈາກບັນດາໂຄງການໄຟຟ້ານໍ້າຕົກ, ສາຍສົ່ງ, ບໍ່ແຮ່ ແລະ ອື່ນໆ, ໄປຄຽງຄູ່ກັບການທວງໜີ້ຄ້າງມອບຕ່າງໆເຂົ້າງົບປະມານໃຫ້ຄົບຖ້ວນຕາມລະບຽບກົດໝາຍ, ເລັ່ງຂະຫຍາຍການນໍາໃຊ້ເຄື່ອງມືທັນສະໄໝເຂົ້າໃນການຄຸ້ມຄອງ ແລະ ຈັດເກັບລາຍຮັບຢູ່ບັນດາເມືອງໃຫຍ່ ເປັນຕົ້ນ: ຫົວໜ່ວຍທຸລະກິດຮ້ານອາຫານ, ໂຮງແຮມ, ຫ້າງຊັບພະສີນຄ້າ ແລະ ການບໍລິການອື່ນໆ, ສືບຕໍ່ຈັດຕັ້ງປະຕິບັດມາດຕະການປະຢັດລາຍຈ່າຍງົບປະມານໃຫ້ເປັນຮູບປະທໍາ ເປັນຕົ້ນ: ກວດກາບາງລາຍຈ່າຍ ຫລື ກິດຈະກໍາ, ບັນດາໂຄງການທີ່ບໍ່ຈໍາເປັນ ແລະ ມີລັກສະນະຊໍ້າຊ້ອນ, ດໍາເນີນມາດຕະການໄລ່ລຽງລາຍຈ່າຍຂອງທ້ອງຖິ່ນໃຫ້ສົມຄູ່ກັບການເກັບລາຍຮັບຕາມລະບຽບກົດໝາຍກໍານົດ ເພື່ອໃຫ້ສາມາດຫລຸດລາຍຈ່າຍຈໍານວນໜຶ່ງ, ພ້ອມທັງສືບຕໍ່ປະສານສົມທົບກັບພາກສ່ວນກ່ຽວຂ້ອງຕ່າງໆເພື່ອກວດກາຈໍານວນພະນັກງານ-ລັດຖະກອນແລ້ວຫັນພະນັກງານບໍລິຫານທັງໝົດໄປສູ່ການເບີກຈ່າຍເງິນເດືອນຜ່ານບັດເອທີເອັມ (ATM) ເພື່ອຄວາມໂປ່ງໃສ.