ຈີນ ລົງວິໄນເຈົ້າໜ້າທີ່ລັດເຮັດຜີດລະບຽບຫລາຍກວ່າ 761.000 ຄະດີ

ໃນໄລຍະ 10 ປີຜ່ານມາ, ຄະນະກຳມາທິການເພື່ອກວດກາລະບຽບວິໄນສູນກາງພັກກອມມູນິດຈີນ ສາມາດແກ້ໄຂຄະດີເຈົ້າໜ້າທີ່ຂອງລັດເຮັດຜິດລະບຽບ ໂດຍສະເພາະກົດເຫລັກ 8 ຂໍ້ທີ່ກຳນົດໄວ້ ທັງໝົດ 761.000 ກວ່າຄະດີ.

ທ່ານ ສຽວ ເປີຍ, ຮອງຫົວໜ້າຄະນະກຳມາທິການ ເພື່ອກວດກາລະບຽບວິໄນສູນກາງຂອງພັກກອມມູນິດຈີນ, ເຊິ່ງເປັນໜ່ວຍງານຕໍ່ຕ້ານການສໍ້ລາດບັງຫລວງຂັ້ນສູງສຸດຂອງ ສປ ຈີນ ໃຫ້ຮູ້ໃນໂອກາດຖະແຫລງຂ່າວຕໍ່ສື່ມວນຊົນທັງພາຍໃນ ແລະ ຕ່າງປະເທດຢູ່ສູນຂ່າວກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 20 ຂອງພັກກອມມູນິດຈີນ ໃນວັນທີ 17 ຕຸລານີ້ ທີ່ນະຄອນຫລວງປັກກິ່ງວ່າ: ໃນ10 ປີຜ່ານມານີ້ ເຈົ້າໜ້າທີ່ຂັ້ນສູງຂອງຈີນ ຈຳນວນ 265 ຄົນທີ່ຢູ່ໃນການຄຸ້ມຄອງຂອງກົມຈັດຕັ້ງຄະນະກຳມະການສູນ ກາງພັກກອມມູນິດຈີນ ຖືກສືບສວນ-ສອບສວນຖານລະ ເມີດກົດເຫລັກ 8 ຂໍ້.

ທ່ານກ່າວຕື່ມວ່າ: ນັບແຕ່ກອງປະຊຸມໃຫຍ່ພັກກອມມູ ນິດຈີນ ຄັ້ງທີ 18 ຈັດຂຶ້ນໃນປີ 2012 ເປັນຕົ້ນມາ ພັກກອມມູນິດຈີນ ໄດ້ເດັດດ່ຽວຈັດຕັ້ງປະຕິບັດກົດເຫລັກທີ່ວາງອອກ ເພື່ອເຮັດໃຫ້ເຈົ້າໜ້າທີ່ລັດປະຢັດມັດທະຍັດຢ່າງເຂັ້ມງວດ ແລະ ລົບລ້າງຮູບແບບການເຮັດວຽກທີ່ບໍ່ເໝາະ ສົມ, ສືບຕໍ່ຕໍ່ສູ້ຢ່າງແຂງແຮງກັບພວກທີ່ໃຊ້ເງິນລັດ ເພື່ອຊື້ຂອງຂວັນ, ຈັດງານລ້ຽງ ຫລື ນຳ ໄປໃຊ້ໃນການທ່ອງທ່ຽວ ແລະ ອື່ນໆ. ໃນນີ້, ກໍລະນີທີ່ເຈົ້າໜ້າທີ່ລະເມີດລະບຽບວິ ໄນ ແລະ ບາງກໍລະນີຮ້າຍແຮງໄດ້ເປີດເຜີຍຊື່ຜູ້ກະທຳຜິດໃຫ້ສັງຄົມຮັບຮູ້.

ນັບຕັ້ງແຕ່ກອງປະຊຸຸມໃຫຍ່ຜູູ້ແທນທົ່ວປະເທດຄັ້ງທີ 19 ຂອງພັກກອມມູນິດຈີນ ທີ່ຈັດຂຶ້ນໃນປີ 2017 ເປັນຕົ້ນມາ, ໜ່ວຍງານລະບຽບວິໄນ ແລະ ຕິດຕາມກວດກາທົ່ວປະເທດຈີນ ໄດ້ແກ້ໄຂຫລາຍກວ່າ 282.000 ຄະດີ ທີ່ເຈົ້າໜ້າທີ່ລັດຂາດລະບຽບວິໄນ. ນອກຈາກນີ້ ໃນໄລຍະດຽວກັນ ຄະນະກຳມາທິການກວດກາລະບຽບວິໄນສູນ ກາງໄດ້ເພີ່ມທະວີການຕິດຕາມກວດກາພາກລັດ ໂດຍໄດ້ທຳການສືບສວນສອບສວນ 347.000 ກວ່າຄະດີ ທີ່ເຈົ້າ ໜ້າທີ່ບໍລິການປະຊາຊົນໃນທາງແບບບໍ່ເໝາະສົມ, ໃນນັ້ນ ລວມທັງເຈົ້າໜ້າທີ່ທີ່ມີທັດສະນະໃນການເຮັດວຽກບໍ່ເໝາະສົມ, ບໍ່ຫ້າວຫັນ ຫລື ຜູ້ທີ່ໃຊ້ອໍານາດຊອກຫາແຕ່ຜົນປະໂຫຍດສ່ວນຕົວ.