ການວິໄຈຂອງອາເມລິກາ ເຕືອນຜູ້ຍິງ ໃຊ້ “ນ້ຳຢາຢືດຜົມ” ເປັນປະຈຳ ສ່ຽງເປັນມະເຮັງມົດລູກເພີ່ມ 2 ເທົ່າ
ອາເມລິກາເປີດເຜີຍການວິໄຈ ເຕືອນຜູ້ຍິງໃຊ້ນ້ຳຢາຢືດຜົມເປັນປະຈຳ ສ່ຽງເປັນມະເຮັງມົດລູກເພີ່ມຂຶ້ນ 2 ເທົ່າ ທຽບໃສ່ຜູ້ທີ່ບໍ່ເຄີຍໃຊ້ຜະລິດຕະພັນຢືດຜົມ.
ວາລະສານສະຖາບັນມະເຮັງແຫ່ງຊາດອາເມລິກາ ເຜີຍແຜ່ຜົນການສຶກສາຂອງຄະນະນັກວິໄຈຈາກສະຖາບັນວິທະຍາສາດອະນາໄມສິ່ງແວດລ້ອມແຫ່ງຊາດ (NIEHS) ເຕືອນໄພຜູ້ຍິງທີ່ໃຊ້ຜະລິດຕະພັນຢືດຜົມເປັນປະຈຳ ມີຄວາມສ່ຽງເປັນມະເຮັງມົດລູກຫລາຍກວ່າຜູ້ທີ່ບໍ່ເຄີຍໃຊ້ນ້ຳຢາຢືດຜົມ.
ການວິໄຈດັ່ງກ່າວມາຈາກການເກັບຮວບຮວມຂໍ້ມູນຈາກຜູ້ຍິງຫລາຍເຊື້ອຊາດໃນຊ່ວງອາຍຸ 35-74 ປີ ຫລາຍກວ່າ 33.947 ຄົນ ເປັນໄລຍະເວລາເກືອບ 11 ປີ ໂດຍມີຜູ້ຍິງ 378 ຄົນກວດພົບມະເຮັງປາກມົດລູກ ສ່ວນຫລາຍເປັນມະເຮັງເຍື່ອບຸໂພງມົດລູກ ເຊິ່ງເກີດຈາກມີຮໍໂມນເອສໂຕຣເຈນຫລາຍເກີນໄປ.
ນັກວິໄຈພົບວ່າ: ການເກີດມະເຮັງມົດລູກຂອງຜູ້ຍິງກຸ່ມຕົວຢ່າງມີການເຊື່ອມໂຍງກັບການໃຊ້ຜະລິດຕະພັນຢືດຜົມ ເຊິ່ງມີສ່ວນປະກອບຂອງ ພາຣາເບນ, ພາທາເລດ ແລະ ນ້ຳຫອມ ທີ່ຄາດວ່າມີຜົນຕໍ່ຕ່ອມບໍ່ມີທໍ່.
ທ່ານ ອາເລັກຊານດຣາ ໄວ ຫົວໜ້າທີມວິໄຈຈາກ NIEHS ກ່າວວ່າ: “ພວກເຮົາເຫັນຄວາມສ່ຽງເພີ່ມຂຶ້ນສອງເທົ່າສຳລັບຜູ້ທີ່ໃຊ້ຜະລິດຕະພັນຢືດຜົມເປັນປະຈຳ. ນີ້ເປັນຕົວເລກທີ່ໜ້າຕົກໃຈ ເມື່ອທຽບໃສ່ຜູ້ທີ່ບໍ່ເຄີຍໃຊ້ຜະລິດຕະພັນຢືດຜົມ ເຊິ່ງປົກກະຕິຈະມີຄວາມສ່ຽງຢູ່ແລ້ວປະມານ 1,64% ແຕ່ຖ້າທ່ານໃຊ້ຜະລິດຕະພັນຢືດຜົມເລື້ອຍໆ ຄວາມສ່ຽງຈະເພີ່ມຂຶ້ນເປັນ 4,05%.
ທັງນີ້, ຂໍ້ມູນຂອງສະຖາບັນສຸຂະພາບແຫ່ງຊາດອາເມລິກາ ຊີ້ວ່າ: ມະເຮັງປາກມົດລູກຄິດເປັນອັດຕາ 3% ຂອງຜູ້ປ່ວຍມະເຮັງລາຍໃໝ່ໃນອາເມລິກາ ໂດຍເປັນມະເຮັງຊະນິດທີ່ພົບໄດ້ໃນລະບົບສືບພັນເພດຍິງ ແລະ ຄາດວ່າອາດມີຜູ້ເປັນມະເຮັງປາກມົດລູກລາຍໃໝ່ 65.950 ຄົນ ໃນປີ 2022.
