ອີຣານເດີນໜ້າຂາຍລູກສອນໄຟ ແລະ ໂດຣນໃຫ້ຣັດເຊຍເພີ່ມ ຢືນຢັນບໍ່ລະເມີດມະຕິ UNSC
ເຈົ້າໜ້າທີ່ດ້ານຄວາມໝັ້ນຄົງຂອງອາເມລິກາ ແລະ ອີຣານຢືນຢັນກົງກັນວ່າ: ອີຣານຕົກລົງຈະຈັດຫາລູກສອນໄຟໄລຍະກາງ ແລະ ໂດຣນຈຳນວນຫລາຍໃຫ້ຣັດເຊຍ ເພື່ອໃຊ້ໃນປະຕິບັດການທາງທະຫານພິເສດໃນອູແກຣນ.
ໂດຍອີຣານຈະຈັດຫາລູກສອນໄຟແບບພື້ນສູ່ພື້ນໃຫ້ຣັດເຊຍ ເພື່ອເພີ່ມສາງອາວຸດຂອງຣັດເຊຍທີ່ກຳລັງຫລຸດລົງເລື້ອຍໆ ຫລັງຈາກໄລຍະຜ່ານມາ ຣັດເຊຍໄດ້ຖະຫລົ່ມຍິງລູກສອນໄຟຈຳນວນຫລາຍ ເພື່ອໂຈມຕີໂຄງສ້າງພື້ນຖານດ້ານໄຟຟ້າຂອງອູແກຣນກ່ອນເຂົ້າສູ່ລະດູໜາວ.
ທ່ານ ເບນ ວອລເລຊ ລັດຖະມົນຕີກະຊວງປ້ອງກັນປະເທດຂອງອັງກິດ ໄດ້ເດີນທາງໄປນະຄອນຫລວງວໍຊິງຕັນຂອງອາເມລິກາ ເພື່ອຫາລືກ່ຽວກັບສົງຄາມທີ່ເກີດຂຶ້ນ ເຊິ່ງກຳລັງເຂົ້າສູ່ໄລຍະອັນຕະລາຍຮອບໃໝ່ ແລະ ໄດ້ແລກປ່ຽນຂ່າວກ່ຽວກັບການມີສ່ວນຮ່ວມຂອງອີຣານ ແລະ ຫາລືກ່ຽວກັບການສົ່ງອຸປະກອນປ້ອງກັນໄພທາງອາກາດໃຫ້ອູແກຣນ ເພື່ອຊ່ວຍໃນການສະກັດກັ້ນການໂຈມຕີ.
ສຳນັກຂ່າວ Reuters ລາຍງານວ່າ: ຂໍ້ຕົກລົງດັ່ງກ່າວເກີດຂຶ້ນໃນວັນທີ 6 ຕຸລາຜ່ານມາ ຫລັງທ່ານ ໂມຮຳໝັດ ມອກເບີ ຮອງປະທານາທິບໍດີອີຣານ ພ້ອມເຈົ້າໜ້າທີ່ອາວຸໂສ 2 ຄົນຈາກກອງກຳລັງພິທັກປະຕິວັດຂອງອີຣານ ແລະ ເຈົ້າໜ້າທີ່ຈາກສະພາຄວາມໝັ້ນຄົງແຫ່ງຊາດ ເດີນທາງໄປຢ້ຽມຢາມມົດສະກູ ເພື່ອເຈລະຈາກັບຣັດເຊຍກ່ຽວກັບການສົ່ງມອບອາວຸດ ໂດຍນັກການທູດອີຣານທ່ານໜຶ່ງເປີດເຜີຍວ່າ: ຣັດເຊຍຕ້ອງການໂດຣນ ແລະ ລູກສອນໄຟ ໂດຍສະເພາະລູກສອນໄຟໃນຕະກູນ Fateh ແລະ Zolfaghar.
ໜຶ່ງໃນໂດຣນທີ່ອີຣານຕົກລົງຈະຈັດຫາໃຫ້ຣັດເຊຍນັ້ນຄື Shahed-13 ເຊິ່ງເປັນໂດຣນກາມິກາເຊທີ່ໂຈມຕີຈາກອາກາດສູ່ພື້ນ, ສ່ວນ Fateh-110 ແລະ Zolfaghar ເປັນລູກສອນໄຟໄລຍະໃກ້ແບບພື້ນສູ່ພື້ນຂອງອີຣານ ສາມາດໂຈມຕີເປົ້າໝາຍໄດ້ໃນໄລຍະທາງລະຫວ່າງ 300-700 ກິໂລແມັດ.
ທັງນີ້, ນັກການທູດຂອງອີຣານກ່າວວ່າ: ການຈັດຫາອາວຸດໃນຄັ້ງນີ້ບໍ່ໄດ້ເປັນການລະເມີດມະຕິຂອງສະພາຄວາມໝັ້ນຄົງແຫ່ງສະຫະປະຊາຊາດ (UNSC) ໃນປີ 2015 ໂດຍກ່າວວ່າ: “ອາວຸດເຫລົ່ານັ້ນຈະຖືກນຳໄປໃຊ້ຢູ່ບ່ອນໃດບໍ່ແມ່ນບັນຫາຂອງຜູ້ຂາຍ ພວກເຮົາບໍ່ໄດ້ເລືອກຂ້າງໃນວິກິດອູແກຣນຄືປະເທດຕາເວັນຕົກ, ພວກເຮົາຕ້ອງການໃຫ້ວິກິດຄັ້ງນີ້ຢຸດຕິໂດຍໃຊ້ແນວທາງທາງການທູດ”.
ເຖິງຢ່າງໃດກໍຕາມ, ສະຖານະການທີ່ເກີດຂຶ້ນຈະເຮັດໃຫ້ຄວາມເຄັ່ງຕຶງລະຫວ່າງອີຣານ, ອາເມລິກາ ແລະ ປະເທດມະຫາອຳນາດຕາເວັນຕົກອື່ນໆ ອ່ອນແອລົງໄປກວ່າເກົ່າ.
ອ້າງອີງ:
